ନୂଆଦିଲ୍ଲୀ, ୧୦।୮: ଅସୁବିଧା ହିଁ ନୂଆ ଆବିଷ୍କାର ପାଇଁ ପ୍ରେରଣା ଦେଇଥାଏ। ଏହା ଦିଲ୍ଲୀର ଗାଜିଆବାଦ୍ରେ ବାସ କରୁଥିବା ୭ ଜଣ ଉଦ୍ୟମୀଙ୍କ ଲାଗି ସତ୍ୟରେ ପରିଣତ ହୋଇଛି। ଏଠାରେ ଏହି ୭ଜଣଙ୍କ ପ୍ରୟାସରେ ସ୍ବରେଜ୍ ଗ୍ୟାସ୍ରୁ ରୋଷେଇ ଘରେ ଚୁଲି ଜଳିପାରୁଛି। ସ୍ଥାନୀୟ ବୃଜ୍ ବିହାର ଅଞ୍ଚଳରେ ବାସ କରୁଥିବା ୫୮ ବର୍ଷ ବୟସ୍କ ଇଞ୍ଜିନିୟର ହେମନ୍ତ ଭରଦ୍ୱାଜଙ୍କ ନେତୃତ୍ୱରେ ଅନ୍ୟ ୬ ଜଣ ସ୍ବରେଜ୍ରୁ ଗ୍ୟାସ୍ ପ୍ରସ୍ତୁତ କରି ଏଠାରେ ପୂର୍ବତନ ପ୍ରଧାନମନ୍ତ୍ରୀ ଅଟଳବିହାରୀ ବାଜପେୟୀଙ୍କ ନାମରେ ଅଟଳ ଜ୍ୟୋତି ପ୍ରଜ୍ଜଳିତ କରିଛନ୍ତି। ଏହା ସହିତ କେତେକ ପରିବାରକୁ ଏହି ଗ୍ୟାସ୍ କନେକସନ୍ ଦିଆଯାଇଛି। ପ୍ରତି ରବିବାର ଏଠାରେ ଗରିବ ପିଲାଙ୍କ ପାଇଁ ଖାଦ୍ୟ ରନ୍ଧା ଯାଇ ବଣ୍ଟନ କରାଯାଇଥାଏ। ୧୯୯୬ରେ ହେମନ୍ତ ଏଠାକୁ ରହିବାକୁ ଆସିଥିଲେ। ତେବେ ସ୍ବରେଜ୍ରୁ ସୃଷ୍ଟି ହେଉଥିବା ଦୁର୍ଗନ୍ଧ ଗ୍ୟାସ୍ରେ ଏଠାରେ ରହିବା ସମ୍ଭବପର ନ ଥିଲା। ମାତ୍ର ସେ ହାର୍ ମାନି ନ ଥିଲେ। ଏଥିରେ ତାଙ୍କ ଦୁଇ ପୁଅ ହେମନ୍ତଙ୍କୁ ସହଯୋଗ କରିଥିଲେ। ହେମନ୍ତଙ୍କ ଏହି କାର୍ଯ୍ୟକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମନ୍ କି ବାତ୍ କାର୍ଯ୍ୟକ୍ରମରେ ମଧ୍ୟ ପ୍ରଶଂସା କରି ସାରିଛନ୍ତି। ହେମନ୍ତ ୟୁଟ୍ୟୁବ୍ରୁ ନାଳ ପାଣିରୁ ଗ୍ୟାସ୍ ପ୍ରସ୍ତୁତ କରିବାର ପ୍ରଣାଳୀ ସମ୍ପର୍କରେ ଶିକ୍ଷା ଲାଭ କରିଥିଲେ। ପରବର୍ତ୍ତୀ ସମୟରେ ହେମନ୍ତଙ୍କୁ ଏଥିରେ ରାମ ନିବାସ, ବୀରନ୍ଦ୍ର ନୈଟିୟାଲ, ବସନ୍ତ ଲାଲ୍, ଦେବ ନୈଟିୟାଲ୍, ବୋବି ତ୍ୟାଗୀ ଏବଂ ପ୍ରଦୀପ ଗୁପ୍ତା ପ୍ରମୁଖ ସହାୟତା କରିଥିଲେ। ସେମାନେ ନିଜ ହାତରୁ ଟଙ୍କା ଖର୍ଚ୍ଚ କରି ଏହା କରିପାରିଛନ୍ତି।
