ପରଜଙ୍ଗ/ତାଳଚେର, (ଡି.ଏନ.ଏ./ନି.ପ୍ର.)- ଢେଙ୍କାନାଳ ଜିଲା ପରଜଙ୍ଗ ଥାନା ସରାଙ୍ଗ ଫାଣ୍ଡି ଅଧୀନ ୫୩ନଂ. ଜାତୀୟ ରାଜପଥର ସରାଙ୍ଗ ବିଦ୍ୟୁତ୍ ସବ୍ଷ୍ଟେଶନ ନିକଟରେ ଶନିବାର ସା ୬ଟାରେ ଦୁର୍ଘଟଣା ଘଟିଛି। ଏକ ୧୦ ଚକିଆ ଟ୍ରକ୍ (ଓଆର ୦୯ ଜେ ୫୮୧୧) ଚଢ଼ିଯିବାରୁ ୩ଜଣ ସ୍କୁଟି ଆରୋହୀ ପ୍ରାଣ ହରାଇଛନ୍ତି। ମୃତକ ହେଲେ ତାଳଚେର କାକୁଡ଼ିଆ ଗ୍ରାମର ଶ୍ରାବଣୀ ଶତପଥୀ (୨୫), ତାଙ୍କ ମା’ ନମିତା ଶତପଥୀ (୪୫) ଏବଂ ମାମୁ ଝିଅ ଭଉଣୀ ଶୁଭଶ୍ରୀ ଦେବତା (୮)। ସମ୍ପୃକ୍ତ ୩ଜଣ କାକୁଡ଼ିଆରୁ ପରଜଙ୍ଗ ଥାନା ମୁଣ୍ଡେଇଲୋ ଗ୍ରାମସ୍ଥିତ ବନ୍ଧୁ ଘରକୁ ଯାଉଥିଲେ। ଏହି ସମୟରେ ଟ୍ରକ୍ଟି ପଛପଟୁ ସ୍କୁଟି ଉପରେ ଚଢ଼ିଯାଇଥିଲା। ଘଟଣାସ୍ଥଳରେ ଶ୍ରାବଣୀଙ୍କ ପ୍ରାଣବାୟୁ ଉଡ଼ିଯାଇଥିବାବେଳେ ତାଳଚେର ଡାକ୍ତରଖାନାରେ ଶୁଭଶ୍ରୀଙ୍କ ମୃତ୍ୟୁ ଘଟିଥିଲା। ନମିତାଙ୍କୁ ଅନୁଗୋଳ ଜିଲା ଚିକିତ୍ସାଳୟକୁ ସ୍ଥାନାନ୍ତର କରାଯାଉଥିବାବେଳେ ରାସ୍ତାରେ ତାଙ୍କର ମୃତ୍ୟୁ ଘଟିଛି।
ଦୁର୍ଘଟଣା ଘଟାଇ ଡ୍ରାଇଭର ଗାଡ଼ି ଧରି ଫେରାର ହୋଇଯିବାକୁ ଉଦ୍ୟମ କରୁଥିଲେ। ସ୍ଥାନୀୟ ଲୋକେ ଚାଳକଙ୍କୁ କାବୁ କରି ପୋଲିସ ଜିମା ଦେଇଛନ୍ତି। ଅଭିଯୁକ୍ତ ଚାଳକ ହେଲେ ଶନି କୁମାର। ତାଙ୍କ ଘର ବିହାର ହାଜିପୁର ମହୁଆ ଥାନା ଅଞ୍ଚଳରେ।
ଘଟଣା ପରେ ଉତ୍ତ୍ୟକ୍ତ ଲୋକେ କ୍ଷତିପୂରଣ ଦାବିରେ ଜାତୀୟ ରାଜପଥ ଅବରୋଧ କରିଛନ୍ତି। ଉକ୍ତ ରାସ୍ତାରେ ଦୈନିକ ଶତାଧିକ ଭାରିଯାନ ଚଳାଚଳ କରୁଛି। ଗାଡ଼ିଗୁଡ଼ିକରେ ଧାର୍ଯ୍ୟଠାରୁ ଅଧିକ ମାଲ୍ ପରିବହନ କରାଯାଉଛି। ଓଭର ଲୋଡିଂ ଗାଡ଼ିଗୁଡ଼ିକ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେମାନେ ଦାବି କରିଛନ୍ତି। ଥାନାଧିକାରୀ ଆନନ୍ଦ ଚନ୍ଦ୍ର ଡୁଙ୍ଗ୍ଡୁଙ୍ଗ୍, ଏସ୍ଆଇ ସମରଜିତ ପଟ୍ଟନାୟକ ପ୍ରମୁଖ ପହଞ୍ଚତ୍ ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରୁଛନ୍ତି। ଖବର ଲେଖାଯିବା ଯାଏ ଉତ୍ତେଜନା ଲାଗିରହିଛି।
