ନୂଆଦିଲ୍ଲୀ,୨୩ା୯:ବଂଶଧାରା ଜଳବିବାଦ ଟ୍ରିବ୍ୟୁନାଲ ରାୟକୁ ଚ୍ୟାଲେଞ୍ଜ କରି ଓଡ଼ିଶା ସରକାରଙ୍କ ପକ୍ଷରୁ ଦାଏର ଏକାଧିକ ପିଟିଶନର ଶୁଣାଣିକୁ ଗୁରୁବାର ସର୍ବୋଚ୍ଚ ଅଦାଲତ ଘୁଞ୍ଚାଇ ଦେଇଛନ୍ତି। ଜଷ୍ଟିସ୍ ଡି.ଓ୍ବାଇ. ଚନ୍ଦ୍ରଚୂଡ଼ ଏବଂ ହିମା କୋହଲିଙ୍କ ଖଣ୍ଡପୀଠ ଶୁଣାଣିକୁ ଆସନ୍ତା ସପ୍ତାହ ପର୍ଯ୍ୟନ୍ତ ସ୍ଥଗିତ ରଖିଛନ୍ତି। ବଂଶଧାରା ନଦୀରେ ନେରାଡ଼ି ବ୍ୟାରେଜ୍ ନିର୍ମାଣ ଲାଗି ଟ୍ରିବ୍ୟୁନାଲ ୨୦୨୧ ଜୁନ୍ରେ ଆନ୍ଧ୍ରପ୍ରଦେଶ ସରକାରଙ୍କୁ ଅନୁମତି ଦେଇଥିଲେ। ବ୍ୟାରେଜ ଡାହାଣ ପାର୍ଶ୍ୱରେ ୮,୦୦୦ କ୍ୟୁସେକ୍ କ୍ଷମତା ବିଶିଷ୍ଟ ସ୍ଲୁଇସ୍ ରହିବ ଯାହା ଆନ୍ଧ୍ରକୁ ଆବଶ୍ୟକ ବେଳେ ପାଣି ଯୋଗାଇବ। ସେହିପରି ବାମପାର୍ଶ୍ୱରେ ଥିବା ହେଡ୍ ସ୍ଲୁଇସ୍ (ଏଲ୍ଏଚ୍ଏସ୍) ଓଡ଼ିଶାର ଜଳ ଆବଶ୍ୟକତା ପୂରଣ କରିବ। ଉକ୍ତ ସ୍ଲୁଇସ୍ ନିର୍ମାଣ ବାବଦ ଖର୍ଚ୍ଚ ଓଡ଼ିଶା ସରକାର ବହନ କରିବେ ବୋଲି ଟ୍ରିବ୍ୟୁନାଲ ନିର୍ଦ୍ଦେଶ ଦେଇଥିଲେ। ଯେଉଁବର୍ଷ ଜଳ ପରିମାଣ କମ୍ ରହିବ, ସେହି ଅନୁପାତରେ ଜଳବଣ୍ଟନ କମ୍ କରାଯିବ ବୋଲି ଟ୍ରିବ୍ୟୁନାଲ କହିଥିଲେ। ଓଡ଼ିଶା ପକ୍ଷରୁ ଏହାକୁ ଚ୍ୟାଲେଞ୍ଜ କରାଯାଇଥିଲା। ଗତବର୍ଷ ସେପ୍ଟେମ୍ବରରେ ସର୍ବୋଚ୍ଚ ଅଦାଲତ ଉଭୟ ରାଜ୍ୟକୁ ସମସ୍ତ ଆନୁଷଙ୍ଗିକ ଡକୁମେଣ୍ଟାରୀ ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଥିଲେ। ପୂର୍ବରୁ ଟ୍ରିବ୍ୟୁନାଲ ନିର୍ଦ୍ଦେଶରେ ନେରାଡ଼ି ବ୍ୟାରେଜର ମିଳିତ ସର୍ଭେକୁ ବିରୋଧ କରି ୨୦୧୮ ଏବଂ ୨୦୧୯ରେ ଓଡ଼ିଶା ପକ୍ଷରୁ ସୁପ୍ରିମକୋର୍ଟରେ ଦୁଇଟି ପିଟିଶନ ଦାଏର ହୋଇଥିଲା।
