ଖୀଷ୍ଟଚର୍ଚ୍ଚ,୨୮।୨(ପି.ଟି.)- ଯୁବ ଓପନର ପୃଥ୍ବୀ ଶ ପାଦ ଜନିତ ଆହତ ସମସ୍ୟାରୁ ମୁକୁଳି ସାରିଛନ୍ତି। ସେ ନ୍ୟୁଜିଲାଣ୍ଡ ବିପକ୍ଷ ଦ୍ୱିତୀୟ ତଥା ଅନ୍ତିମ ଟେଷ୍ଟରେ ଖେଳିବେ ବୋଲି ଭାରତୀୟ ଦଳର ମୁଖ୍ୟ କୋଚ୍ ରବି ଶାସ୍ତ୍ରୀ କହିଛନ୍ତି। ପାଦ ଫୁଲି ଥିବାରୁ ଶ’ ଗୁରୁବାର ଟ୍ରେନିଂ ସେସନରେ ଯୋଗଦେଇ ନ ଥିଲେ। ଏହା ଟିମ୍ ମ୍ୟାନେଜମେଣ୍ଟର ଚିନ୍ତା ବଢ଼ାଇ ଦେଇଥିଲା। କିନ୍ତୁ ଭଲ ଖବର ହେଲା ସେ ଫିଟ୍ ହୋଇ ନେଟ୍ସକୁ ଫେରିଛନ୍ତି। ଶନିବାର ସେ ଲମ୍ବା ସମୟ ଧରି ନେଟ୍ସରେ ବ୍ୟାଟିଂ ଅଭ୍ୟାସ କରିଥିଲେ। ଅଧିନାୟକ ବିରାଟ କୋହଲି କିଛି ଗୁରୁତ୍ୱପୂର୍ଣ୍ଣ ଟିପ୍ସ ଯୁବ ଓପନରଙ୍କୁ ଦେଇଥିଲେ। ଶ’ ପ୍ରଥମ ଟେଷ୍ଟରେ ସମ୍ପୂର୍ଣ୍ଣ ବିଫଳ ହୋଇଥିଲେ। ଉଭୟ ଇନିଂସରେ ସେ ମୋଟ ୩୦ ରନ୍ ପାରିଥିଲେ।
