ନୂଆଦିଲ୍ଲୀ,୨୩।୧୨- ଚଳିତବର୍ଷ ଭାରତୀୟ ଅଧିନାୟକ ବିରାଟ କୋହଲି ଓ ଉପଅଧିନାୟକ ରୋହିତ ଶର୍ମାଙ୍କ ମଧ୍ୟରେ ଚାଲିଥିବା ଦୌଡ଼ ଶେଷ ହୋଇଛି। ରୋହିତଙ୍କୁ ପଛରେ ପକାଇ କୋହଲି ୨୦୧୯ରେ ଅନ୍ତର୍ଜାତୀୟ ସ୍ତରରେ ସର୍ବାଧିକ ରନ୍ କରିଥିବା ବ୍ୟାଟ୍ସମ୍ୟାନ ହେବାର ରେକର୍ଡ କରିଛନ୍ତି। ଚଳିତବର୍ଷ କୋହଲି ମୋଟ ୨,୪୫୫ ରନ୍ କରିଥିବାବେଳେ ମାତ୍ର ୧୩ ରନ୍ ପଛରେ ରହି ଯାଇଛନ୍ତି ରୋହିତ। କୋହଲି ୨୬ ଦିନିକିଆରେ ୧୩୭୭ ରନ୍ କରିଥିବାବେଳେ ୮ ଟେଷ୍ଟରେ ୬୧୨ ରନ୍ ଓ ୧୦ ଟି୨୦ରେ ୪୬୬ ରନ୍ କରିଛନ୍ତି। ସେହିଭଳି ରୋହିତ ୨୮ ଦିନିକିଆ ମ୍ୟାଚ୍ରେ ୧୪୯୦, ୫ ଟେଷ୍ଟରେ ୫୫୬ ଓ ୧୪ ଟି୨୦ ଖେଳି ୩୯୬ ରନ୍ ହାସଲ କରିଛନ୍ତି। ଏହି ତାଲିକାରେ ପାକିସ୍ତାନର ବାବର ଆଜମ ତୃତୀୟ ସ୍ଥାନରେ ରହିଛନ୍ତି। ତାଙ୍କ ପଛକୁ ନ୍ୟୁଜିଲାଣ୍ଡର ରସ ଟେଲର (୧୮୨୦) ଓ ଇଂଲଣ୍ଡର ଜୋ ରୁଟ (୧୭୯୦) ଟପ୍ ୫ରେ ରହିଛନ୍ତି। ତେବେ ଚଳିତବର୍ଷ କେବଳ ଦିନିକିଆରେ ସର୍ବାଧିକ ରନ୍ କରିବାରେ ରୋହିତ ଶୀର୍ଷ ସ୍ଥାନ ଅଧିକାର କରି ବର୍ଷ ଶେଷ କରିଛନ୍ତି।
