କଟକ ଅଫିସ, ୨୩ା୧୧: ୧୦ହଜାର ଟଙ୍କା ଲାଞ୍ଚ ନେଇ ଭିଜିଲାନ୍ସ ହାତରେ ଗିରଫ ହୋଇଛନ୍ତି ବିଦ୍ୟୁତ୍ ବିଭାଗର କନିଷ୍ଠ ଯନ୍ତ୍ରୀ ଭବାନୀ ଶଙ୍କର ମହାନ୍ତ। ସେ ଭୁବନେଶ୍ୱର ସିଟି ଡିଷ୍ଟ୍ରିବ୍ୟୁଶନ ଡିଭିଜନ-୨ ଅଧୀନରେ ଥିବା ଗୋଡ଼ିସାହି ସେକ୍ସନରେ କାର୍ଯ୍ୟରତ। ଶୁକ୍ରବାର ସେ ଏହି ଲାଞ୍ଚ କଟକ ମଙ୍ଗଳାବାଗ ଥାନା ଅଧୀନ ମଲ୍ଲାସାହି ଅଞ୍ଚଳର ବିଜୟ କୁମାର ପାତ୍ରଙ୍କଠାରୁ ଗ୍ରହଣ କରୁଥିଲେ। ବିଜୟଙ୍କ ଜଣେ ସମ୍ପର୍କୀୟଙ୍କ ଘରକୁ ବିଦ୍ୟୁତ୍ ସଂଯୋଗ ଦେବା ପାଇଁ ମହାନ୍ତ ଏହି ଲାଞ୍ଚ ଦାବି କରିଥିଲେ। ସିଡିଏ ସେକ୍ଟର-୨ ନିକଟରେ ମହାନ୍ତ ଲାଞ୍ଚ ୧୦ହଜାର ଟଙ୍କା ବିଜୟଙ୍କଠାରୁ ଗ୍ରହଣ କରୁଥିବା ବେଳେ ଭିଜିଲାନ୍ସ ଅଧିକାରୀଙ୍କ ହାତରେ ଧରାପଡ଼ିଥିଲେ। ତାଙ୍କ ନିକଟରୁ ଉକ୍ତ ଟଙ୍କା ଜବତ କରାଯାଇଥିଲା। ଏହାପରେ ଭିଜିଲାନ୍ସ ପକ୍ଷରୁ ମହାନ୍ତଙ୍କ କେନ୍ଦୁଝର ଜିଲା ବରିଆ ଥାନା ଅଧୀନ କଳିଙ୍ଗା ଗ୍ରାମର ଘରକୁ ଯାଞ୍ଚ କରାଯାଇଥିଲା। ଏ ସମ୍ପର୍କରେ କଟକ ଭିଜିଲାନ୍ସ ଥାନାରେ ଏକ ମାମଲା(ନଂ.୩୯/୨୦୧୯) ରୁଜୁ ହୋଇଛି।
