ଭଦ୍ରକ ଅଫିସ, ୨୬ା୨- ମହନୀୟତା ଦେଖାଇଲେ ନଳିନୀକାନ୍ତ ପଣ୍ଡା। ଯଦିଓ ସେ ଜଣେ ମୋବାଇଲ ଦୋକାନୀ କିନ୍ତୁ ତାଙ୍କ ମାନବିକତାକୁ ନେଇ ଭଦ୍ରକ ସହରରେ ଚର୍ଚ୍ଚା ଜୋର ଧରିଛି। ୨ ଦିନ ପୂର୍ବେ ତାଙ୍କ ମା’ ତାରିଣୀ ଫୋନ୍ ଇନ୍ ମୋବାଇଲ ଦୋକାନ ନିକଟରେ ଥିବା ଏସ୍ବିଆଇ ଏଟିଏମ୍ କାଉଣ୍ଟରରେ କେହି ଜଣେ ୨୦ ହଜାର ଟଙ୍କା ଛାଡ଼ି ଚାଲିଯାଇଥିଲେ। ଏହି ଟଙ୍କା ପାଇ ସେ ତାଙ୍କ ଦୋକାନରେ ଲାଗିଥିବା ସିସିଟିଭି ଫୁଟେଜ ଦେଖି ଜଣେ ବ୍ୟକ୍ତି ଟଙ୍କା କାଢ଼ିବା ପାଇଁ ପାସୱାର୍ଡ ଦେଇଥିଲେ କିନ୍ତୁ ମେଶିନରୁ ଟଙ୍କା ବାହାରିବା ପର୍ଯ୍ୟନ୍ତ ଅପେକ୍ଷା ନ କରି ମେଶିନ ଖରାପ ଥିବା ଭାବି ଚାଲିଯାଇଥିଲେ। ଉକ୍ତ ଟଙ୍କା ଏଟିଏମ୍ କାଉଣ୍ଟରରେ ବାହାରି ରହିଥିଲା। ଏହି ଟଙ୍କା ସେ ପାଇବା ପରେ ସୋସିଆଲ ମିଡିଆରେ ପୋଷ୍ଟ କରି ପ୍ରକୃତ ତଥ୍ୟ ଦେଇ ନେଇଯିବା ପାଇଁ ଅନୁରୋଧ କରିଥିଲେ। ହେଲେ ୨ ଦିନ ଅପେକ୍ଷା ପରେ ମଧ୍ୟ କେହି ଟଙ୍କା ନ ନେବାରୁ ମଙ୍ଗଳବାର ଏସ୍ବିଆଇ ଭଦ୍ରକ ମୁଖ୍ୟ ବ୍ରାଞ୍ଚ ମ୍ୟାନେଜର୍ଙ୍କୁ ଜିମା ଦେଇଥିଲେ। ଏହିଭଳି ମାନବିକତାକୁ ନେଇ ସୋସିଆଲ ମିଡିଆରେ ନଳିନୀଙ୍କୁ ପ୍ରଶଂସାର ସୁଅ ଛୁଟୁଛି। ସୂଚନା ଥାଉକି, ନଳିନୀ କାନ୍ତ ପଣ୍ଡାଙ୍କ ଘର ଭଦ୍ରକ ଗ୍ରାମାଞ୍ଚଳ ଥାନା ଅଧୀନ ବଣିଆଁ ଗାଁରେ। ସେ ଚରମ୍ପା କଲେଜରେ ୨୦୦୭ରେ ଛାତ୍ର ସଙ୍ଗଠନର ସମ୍ପାଦକ ଓ ୨୦୦୮ରେ ସଭାପତି ଭାବେ ନିର୍ବାଚିତ ହୋଇ ଛାତ୍ର ଜୀବନରୁ ରାଜନୀତିରେ ଯୋଗ ଦେଇଛନ୍ତି। ଏବେ ଭଦ୍ରକ ବିଜୁ ଜନତା ଦଳର ଅଗ୍ରଣୀ ସଦସ୍ୟ ଭାବେ କାର୍ଯ୍ୟ କରିଆସୁଛନ୍ତି ଏବଂ କଲେଜ ରୋଡରେ ଏକ ମୋବାଇଲ ଦୋକାନ ଖୋଲି ଜୀବିକା ଚଳାଇ ଆସୁଛନ୍ତି। ପରବର୍ତ୍ତୀ ସୂଚନା ମୁତାବକ ଉକ୍ତ ଟଙ୍କା ବାଉଦପୁର ଅଞ୍ଚଳର ଜଣେ ସରକାରୀ କର୍ମଚାରୀ ସୁବୋଧ କୁମାର ଦାସଙ୍କ ବୋଲି ଜଣାପଡ଼ିଛି। ବ୍ୟାଙ୍କ ମାଧ୍ୟମରେ ସୁବୋଧଙ୍କୁ ଉକ୍ତ ଟଙ୍କା ପ୍ରଦାନ କରାଯିବ ବୋଲି ସୂଚନା ମିଳିଛି।
