ଭୋପାଳ,୧୬ା୨(ପି.ଟି.): ମଧ୍ୟପ୍ରଦେଶ କଂଗ୍ରେସରେ ଫାଟ ସ୍ପଷ୍ଟ ହୋଇଛି। କଂଗ୍ରେସ ନେତା ଜ୍ୟୋତିରାଦିତ୍ୟ ସିନ୍ଧିଆ ଏବଂ ମୁଖ୍ୟମନ୍ତ୍ରୀ କମଳନାଥଙ୍କ ମଧ୍ୟରେ ରହିଥିବା ବିରୋଧଭାସ ପୁଣିଥରେ ସାମନାକୁ ଆସିଛି। କମଳନାଥଙ୍କ ନେତୃତ୍ୱକୁ ନେଇ ସିନ୍ଧିଆ ଅସନ୍ତୋଷ ବ୍ୟକ୍ତ କରିଛନ୍ତି। ନିର୍ବାଚନ ବେଳେ ଦଳ ପକ୍ଷରୁ ଦିଆଯାଇଥିବା ପ୍ରତିଶ୍ରୁତି ପୂରଣ କରାଯାଉ ନ ଥିବାରୁ ସେ ଏହା ବିରୋଧରେ ଆନ୍ଦୋଳନକୁ ଓହ୍ଲାଇବେ ବୋଲି କହିଛନ୍ତି। ସିନ୍ଧିଆଙ୍କ ଏହି ଚେତାବନୀର ଦିନକ ପରେ କମଳନାଥ ଏହାର ଜବାବ ରଖିଛନ୍ତି। ସେ କହିଛନ୍ତି, ନିର୍ବାଚନ ଇସ୍ତାହାରରେ ଦିଆଯାଇଥିବା ପ୍ରତିଶ୍ରୁତି ୫ ବର୍ଷ ପାଇଁ, ତାହା ୫ ମାସ ପାଇଁ ନୁହେଁ। ଯଦି ସରକାର ପ୍ରତିଶ୍ରୁତି ରଖିବାରେ ବିଫଳ ହୋଇଛନ୍ତି, ତେବେ ସିନ୍ଧିଆ ଏହା ବିରୋଧରେ ଆନ୍ଦୋଳନକୁ ଓହ୍ଲାନ୍ତୁ ବୋଲି କମଳନାଥ ଚ୍ୟାଲେଞ୍ଜ କରିଛନ୍ତି। ତାଙ୍କୁ ରାସ୍ତାକୁ ଓହ୍ଲାଇବାକୁ କିଏ ମନା କରୁଛି କି ବୋଲି କମଳନାଥ କହିଛନ୍ତି।
ଦୁଇ କଂଗ୍ରେସ ନେତାଙ୍କ ମଧ୍ୟରେ ଏଭଳି କାଦୁଅଫିଙ୍ଗାକୁ ନେଇ ରାଜନୈତିକ ନେତାଙ୍କ ମଧ୍ୟରେ ମିଶ୍ର ପ୍ରତିକ୍ରିୟା ପ୍ରକାଶ ପାଇଛି। କେତେକ ସିନ୍ଧିଆଙ୍କୁ ସମର୍ଥନ କରିଥିବାବେଳେ ଦଳ ଭିତରେ ଆଭ୍ୟନ୍ତରୀଣ କନ୍ଦଳ ବନ୍ଦ ହେବା ଆବଶ୍ୟକ ବୋଲି ଅନ୍ୟମାନେ ମତ ଦେଇଛନ୍ତି। ନିର୍ବାଚନ ଜିତି କ୍ଷମତାକୁ ଆସିଲେ କଂଗ୍ରେସ କୃଷିଋଣ ଛାଡ଼ କରିବା ସହ ଅତିଥି ଶିକ୍ଷକମାନଙ୍କୁ ସ୍ଥାୟୀ କରିବାକୁ ପ୍ରତିଶ୍ରୁତି ଦେଇଥିଲା। ଏଥିସହିତ ନିର୍ବାଚନୀ ଇସ୍ତାହାରରେ ଅନେକ ପ୍ରତିଶ୍ରୁତି ଦିଆଯାଇଥିଲା, ଯାହା ପାଳନ ହେବା ଆବଶ୍ୟକ। ଜଣେ ବରିଷ୍ଠ ନେତା ଭାବରେ ସିନ୍ଧିଆ ଏଥିପାଇଁ ଚିନ୍ତାପ୍ରକଟ କରିବା ସ୍ବାଭାବିକ ବୋଲି ଦଳର ଅନ୍ୟତମ ନେତା କେଟିଏସ୍ ତୁଲ୍ସି କହିଛନ୍ତି। ଅନ୍ୟପକ୍ଷରେ ଭାଜପା ନେତା ଜି.ଭି.ଏଲ୍ ନରସିଂହ ରାଓ କହିଛନ୍ତି, ମଧ୍ୟପ୍ରଦେଶର କମଳନାଥ ସରକାର ନିର୍ବାଚନୀ ପ୍ରତିଶ୍ରୁତି ପାଳନ ନ କରି ଜନସାଧାରଣଙ୍କୁ ପ୍ରତାରିତ କରିଛନ୍ତି। ସିନ୍ଧିଆଙ୍କ ଆନ୍ଦୋଳନ ନିଷ୍ପତ୍ତି ସରକାରଙ୍କ ପାଇଁ ଏକ ଚେତାବନୀ ବୋଲି ସେ କହିଛନ୍ତି। ସିନ୍ଧିଆଙ୍କୁ ରାଜ୍ୟ କଂଗ୍ରେସ ସଭାପତି କରାଯାଇ ନାହିଁ କିମ୍ବା ମୁଖ୍ୟମନ୍ତ୍ରୀ କରାଗଲା ନାହିଁ। ତେଣୁ ଦଳ ଭିତରେ କ୍ଷମତାକୁ ନେଇ କନ୍ଦଳ ଜାରି ରହିଥିବା ଭାଜପା ନେତା ଗଣେଶ ସିଂ କହିଛନ୍ତି। ଦିଲ୍ଲୀ ନିର୍ବାଚନରେ କଂଗ୍ରେସର ଶୋଚନୀୟ ପ୍ରଦର୍ଶନକୁ ନେଇ ସିନ୍ଧିଆ ଦଳର କେନ୍ଦ୍ରୀୟ ନେତୃତ୍ୱକୁ ସମାଲୋଚନା କରିଥିଲେ।
ଶୁକ୍ରବାର ଟିକମଗଡ଼ ଜିଲାର କୁଡିଲା ଗ୍ରାମରେ ଏକ ସଭାକୁ ଉଦ୍ବୋଧନ ଦେଇ ସେ ଅତିଥି ଶିକ୍ଷକମାନଙ୍କୁ ଦିଆଯାଇଥିବା ପ୍ରତିଶ୍ରୁତି ପୂରଣ ପାଇଁ ଲଢ଼େଇ କରିବେ ବୋଲି କହିଥିଲେ। ଏଥିସହିତ ଫସଲ କ୍ଷୟକ୍ଷତି ସର୍ଭେ ଓ କୃଷିଋଣ ଛାଡ଼ ପ୍ରତିଶ୍ରୁତି ପୂରଣ ହୋଇ ନ ଥିବାରୁ ସେ ସରକାରଙ୍କୁ କଡ଼ା ସମାଲୋଚନା କରିଥିଲେ। ଆବଶ୍ୟକ ପଡିଲେ ସେ ରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଥିଲେ। ସୂଚନାଯୋଗ୍ୟ ମଧ୍ୟପ୍ରଦେଶରେ କଂଗ୍ରେସ ସରକାର ଗଢ଼ିବା ଦିନଠାରୁ ଦୁଇ ବରିଷ୍ଠ ନେତାଙ୍କ ମଧ୍ୟରେ ମତପାର୍ଥକ୍ୟ ଜାରି ରହିଛି। ସିନ୍ଧିଆ ସମର୍ଥକମାନେ ତାଙ୍କୁ ମୁଖ୍ୟମନ୍ତ୍ରୀ ଭାବେ ଦେଖିବାକୁ ଚାହୁଁଥିଲେ। ପରେ ତାଙ୍କୁ ରାଜ୍ୟ କଂଗ୍ରେସ ସଭାପତି କରିବା ପାଇଁ ଦାବି ହୋଇଥିଲା।
