ନୂଆଗାଁ,୧୪।୯ (ଡି.ଏନ.ଏ.): ନୟାଗଡ ଜିଲା ନୂଆଗାଁ ଥାନା ମାଇଛେଳି ନିକଟସ୍ଥ ରାଇଖମଣ ବାଙ୍କଠାରେ ମଙ୍ଗଳବାର ସନ୍ଧ୍ୟାରେ ବାଇକ୍ରେ ଯାଉଥିବା ଜଣେ ମହିଳାଙ୍କ ଠାରୁ ଲୁଟେରା ମାନେ ଭ୍ୟାନିଟ୍ ଝାମ୍ପି ନେଇଥିଲେ। ଫଳରେ ଗାଡିରୁ ଖସି ପଡି ମହିଳା ଗୁରୁତର ହୋଇଛନ୍ତି। ରାଜପଥ ଲୁଟେରାଙ୍କ ଶିକାର ହୋଇଥିବା ମହିଳା ହେଲେ ସସ୍ମିତା ସାହୁ (୩୫)। ତାଙ୍କ ଅବସ୍ଥା ସଙ୍କଟାପନ୍ନ ଥିବାବେଳେ ସେ ଭୁବନେଶ୍ୱରସ୍ଥିତ ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଛନ୍ତି ।
ଯେ,ଖଣ୍ଡପଡା ଥାନା ଶିଖରପୁର ଗ୍ରାମର ସସ୍ମିତା ସାହୁ ସ୍ବାମୀ ପ୍ରମୋଦ ସାହୁଙ୍କ ସହ ବାଇକ୍ରେ ଯାଉଥିବାବେଳେ ତାଙ୍କ ଦିଅର ସୋମନାଥ ସାହୁ ମଧ୍ୟ ଅନ୍ୟ ଏକ ବାଇକ୍ରେ ଯାଉଥିଲେ। ସମସ୍ତେ ଲୁଗା କିଣିବା ପାଇଁ ଦଶପଲା ଯାଇଥିଲେ । ସେଠାରେ ସମସ୍ତ କାମ ସାରି ଦିଅର ଲୁଗା ନେଇ ଗୋଟିଏ ବାଇକରେ ଯାଉଥିବା ସମୟରେ ସସ୍ମିତା ସ୍ବାମୀଙ୍କ ସହ ହିରୋହୁଣ୍ଡା ସ୍ପ୍ଲେଣ୍ଡର ବାଇକ ଯୋଗେ ଯାଉଥିଲେ । ସନ୍ଧ୍ୟା ସମୟରେ ରାଇଖମଣ ବାଙ୍କଠାରେ ନିଛାଟିଆ ଦେଖି ୁ ପଲସର ବାଇକରେ ପିଛା କରୁଥିବା ଦୁଇଜଣ ରାଜପଥ ଲୁଟେରା ସସ୍ମିତା କାନ୍ଧରେ ଧରିଥିବା ଭ୍ୟାନିଟ୍ ବ୍ୟାଗଟିକୁ ଝାମ୍ପି ନେଇଥିଲେ । ଫଳରେ ବାଇକରୁ ଖସି ପଡି ଗୁରୁତର ହୋଇଥିଲେ । ତାଙ୍କୁ ନୟାଗଡ ଜିଲା ମୁଖ୍ୟ ଚିକିତ୍ସାଳୟକୁ ନିଆ ଯାଇଥିଲା । ସେଠାରେ ଅବସ୍ଥା ଗୁରୁତର ହେବାରୁ ଭୁବନେଶ୍ୱର ସ୍ଥାନାନ୍ତର କରାଯାଇଥିଲା । ଲୁଟେରା ଝାମ୍ପି ନେଇଥିବା ଭ୍ୟାନିଟରେ ଗୋଟିଏ ମୋବାଇଲ ଓ ନଗଦ ୧୨ ହଜାର ଟଙ୍କା ଥିବା ଅଭିଯୋଗ ହୋଇଛି । ଏ ନେଇ ଆହତଙ୍କ ଦିଅର ସୋମନାଥ ନୂଆଗାଁ ଥାନାରେ ଲିଖିତ ଅଭିଯୋଗ କରିଥିଲେ। ପୋଲିସ କେଶ ନଂ ୬୯/୧୯ ରୁଜୁ କରିବା ସହ ଘଟଣାର ତଦନ୍ତ କରି ଲୁଟେରାଙ୍କୁ ଧରିବାର ପ୍ରୟାସ ଜାରି ରହିଥିବା ନୂଆଗାଁ ଆଇ ଆଇ ସି ମନୋରମା ମଲିକ କହିଛନ୍ତି।
