ରଣପୁର, ୭।୯(ସ୍ବ.ପ୍ର.): ନୟାଗଡ଼ ଜିଲା ରଣପୁର ବାଳିକା ଉଚ୍ଚ ବିଦ୍ୟାଳୟର ନବ ନିର୍ମିତ କୋଠାର ନିମିଟାଲ ଓ ତାଜା ଶନିବାର ସକାଳେ ହଠାତ୍ ଭୁଶୁଡି ପଡ଼ିଛି। ଏହି ଦୁର୍ଘଟଣାରୁ ଛାତ୍ରୀମାନେ ମୃତ୍ୟୁ ମୁଖରୁ ଅଳ୍ପକେ ବର୍ତ୍ତିଯାଇଛନ୍ତି। ଶନିବାର ସକାଳୁଆ ସ୍କୁଲ ଥିବାରୁ ଛାତ୍ରୀମାନେ ବିଦ୍ୟାଳୟକୁ ଆସି ପ୍ରାର୍ଥନା କରୁଥିଲେ। ସେହି ସମୟରେ ହଠାତ୍ ନିମିଟାଲ ଓ ତାଜା ତଳକୁ ଖସିପଡ଼ିଥିଲା। ଏଥିରେ କାହାର କିଛି କ୍ଷତି ହୋଇ ନ ଥିବା ବେଳେ ଛାତ୍ରୀ ଓ ଶିକ୍ଷକଙ୍କ ମଧ୍ୟରେ ଭୟର ବାତାବରଣ ଖେଳିଯାଇଥିଲା। ସୂଚନାଯୋଗ୍ୟ, ପୁର୍ତ୍ତ ବିଭାଗ ଦ୍ୱାରା ବାଳିକା ଉଚ୍ଚ ବିଦ୍ୟାଳୟର ଉପର ମହଲା କୋଠ ଘର ଉପରେ କାର୍ଯ୍ୟ କରାଯାଉଛି। ଠିକାଦାର ମନଇଛା କାମ କରୁଥିବା ବେଳେ ବିଭାଗୀୟ ଅଧିକାରୀ ଉପସ୍ଥିତ ରହୁ ନ ଥିବା ଅଭିଯୋଗ ହୋଇଛି। ନିମ୍ନମାନର କାର୍ଯ୍ୟ ଯୋଗୁ ଏହି ଦୁର୍ଘଟଣା ଘଟିଛି ବୋଲି ଅଭିଭାବକମାନେ କହିଛନ୍ତି।
