ନୂଆଦିଲ୍ଲୀ,୧।୬: ଦେଶରେ କରୋନା ସଂକ୍ରମଣ ନେଇ ଆତଙ୍କ ଦେଖାଦେଇଛି। ସରକାରୀ ଭାବେ କୁହାଯାଉଛି ଯେ, ଦେଶରେ କରୋନାର ଗୋଷ୍ଠୀ ସଂକ୍ରମଣ ଏପର୍ଯ୍ୟନ୍ତ ହୋଇନାହିଁ। ତେବେ ପ୍ରିଭେଣ୍ଟିଭ୍ ଏବଂ ସୋସିଆଲ୍ ମେଡିସିନ୍ ବିଶେଷଜ୍ଞ ତଥା ଇପିଡେମିଓଲୋଜିଷ୍ଟ୍ ଓ ପବ୍ଲିକ୍ ହେଲଥ୍ ପ୍ରାକ୍ଟିଶନର ସଙ୍ଘ ପକ୍ଷରୁ ମିଳିତ ଭାବେ କୁହାଯାଇଛି ଯେ, ଭାରତରେ ବହୁ ପୂର୍ବରୁ କରୋନାର ଗୋଷ୍ଠୀ ସଂକ୍ରମଣ ଆରମ୍ଭ ହୋଇସାରିଛି। ସରକାରଙ୍କ ପକ୍ଷରୁ ସଂକ୍ରମଣ ରୋକିବା ପାଇଁ ଲକ୍ଡାଉନ୍ ଜାରି କରାଯାଇଥିଲା। କିନ୍ତୁ ଯଦି ଭୂତାଣୁ ଓ ମହାମାରୀ ସଂକ୍ରମଣ ଅଭିଜ୍ଞଙ୍କ ସହିତ ପରାମର୍ଶ ଆଧାରରେ ଆବଶ୍ୟକ ପଦକ୍ଷେପ ଗ୍ରହଣ କରାଯାଇଥାନ୍ତା ତେବେ ହୁଏତ ସୁଫଳ ମିଳିଥାନ୍ତା । ମାତ୍ର ଏକ୍ଷେତ୍ରରେ କମ୍ ଜ୍ଞାନ ଥିବା ଅଭିଜ୍ଞଙ୍କ ପରାମର୍ଶ ଗ୍ରହଣ କରାଯାଇଥିବାରୁ ଦେଶରେ ଉଭୟ ଜନ ଓ ଧନ ଅଧିକ କ୍ଷୟ ହୋଇଥିବା ସଂଘ ପକ୍ଷରୁ କୁହାଯାଇଛି।
