ଭବାନୀପାଟଣା,୨୨।୨(ଡି.ଏନ୍.ଏ.): ଓଡ଼ିଶା ପୋଲିସ ମହାନିର୍ଦ୍ଦେଶକ ଅଭୟ ଶନିବାର କଳାହାଣ୍ଡି ଜିଲା ଗସ୍ତକରି ମାଓବାଦୀଙ୍କ ଗତିବିଧି, ମାଓବାଦୀ ଦମନ ଓ ଆବଶ୍ୟକୀୟ ଭିତ୍ତିଭୂମିର ବିକାଶ ସମ୍ପର୍କରେ ସ୍ଥାନୀୟ ରିଜର୍ଭ ପୋଲିସ କାର୍ଯ୍ୟାଳୟରେ ଆୟୋଜିତ ଏକ ବୈଠକରେ ସମୀକ୍ଷା କରିଥିଲେ। ପରେ ଜିଲା ପୋଲିସ କାର୍ଯ୍ୟାଳୟଠାରେ ଆୟୋଜିତ ଏକ ଖବରଦାତା ସମ୍ମିଳନୀରେ ଉପସ୍ଥିତ ରହି କୋରାପୁଟ ଡିଆଇଜି ସଫିନ ଅହମ୍ମଦ୍ ମାଓବାଦୀଙ୍କ ଦମନ ତଥା ପୋଲିସ ବିଭାଗର ତତ୍ପରତା ସମ୍ପର୍କରେ ସୂଚନା ଦେଇଥିଲେ। କଳାହାଣ୍ଡି ଜିଲା ଲାଞ୍ଜିଗଡ଼, ଥୁଆମୂଳ ରାମପୁର, ଗୋଲାମୁଣ୍ଡା ଓ ମଦନପୁର ରାମପୁର ବ୍ଲକର ବିଭିନ୍ନ ଅଞ୍ଚଳରେ ଅନେକ ସମୟରେ ମାଓବାଦୀମାନେ ପୋଷ୍ଟର ମାରିବା, ଠିକା କ୍ୟାମ୍ପ କରି ଅତର୍କିତ ଆକ୍ରମଣ, ପ୍ରଜାକୋର୍ଟ ବସାଇ ବିଭିନ୍ନ କାଣ୍ଡ ଆଦି ଘଟାଇ ନିଜର ଉପସ୍ଥିତି ଜାହିର କରି ଆସୁଛନ୍ତି। ଏଭଳି ପରିସ୍ଥିତିରେ ଜିଲା ପୋଲିସ ମାଓବାଦୀମାନଙ୍କୁ ଉପଯୁକ୍ତ ଜବାବ ଦେବାରେ ବ୍ୟାପକ ପ୍ରସ୍ତୁତ ହୋଇରହିଛି ବୋଲି ଡିଆଇଜି କହିଥିଲେ। ଉକ୍ତ ଖବରଦାତା ସମ୍ମିଳନୀରେ ଏସ୍ପି ବାତୁଲା ଗଙ୍ଗାଧର, ଆଡିଶନାଲ ଏସ୍ପି ଗୋପୀନାଥ ମଣିପାତ୍ର ଯୋଗ ଦେଇଥିଲେ। ସମୀକ୍ଷା ବୈଠକରେ ଓଡ଼ିଶା ପୋଲିସ ମହାନିର୍ଦ୍ଦେଶକ ଅଭୟଙ୍କ ସହିତ ଡିଜି ସତ୍ୟଜିତ୍ ମହାନ୍ତି, ଏଡିଜି, ବିନୟତୋଷ ମିଶ୍ର, ଆଇଜିପି ଅପରେଶନ୍ ଅମିତାଭ୍ ଠାକୁର, ଡିଆଇଜି ଅନିରୁଦ୍ଧ କୁମାର, ଡିଆଇଜି କୋରାପୁଟ ସଫିନ୍ ଅହମ୍ମଦ, ରାୟଗଡ଼ା ଏସ୍ପି ଡ. ଶ୍ରବଣା ବିବେକ ଏମ୍, କନ୍ଧମାଳ ଏସ୍ପି ପ୍ରତୀକ ସିଂ ପ୍ରମୁଖ ଉପସ୍ଥିତ ଥିଲେ।
