ଯାଜପୁରରୋଡ,୭ା୬(ନି.ପ୍ର)- ଯାଜପୁର ରୋଡସ୍ଥିତ ବ୍ୟାସନଗର ସ୍ବୟଂଶାସିତ ମହାବିଦ୍ୟାଳୟ ରାଜ୍ୟର ଏକ ପ୍ରମୁଖ ମହାବିଦ୍ୟାଳୟ ଭାବେ ନିଜର ସ୍ବତନ୍ତ୍ର ପରିଚୟ ହାସଲ କରିଛି। ମାତ୍ର ଏବେ ମହାବିଦ୍ୟାଳୟର ପୂର୍ବତନ ଅଧ୍ୟକ୍ଷଙ୍କ ଅବହେଳା ଯୋଗୁ ଏହି ମହାବିଦ୍ୟାଳୟ ସ୍ବୟଂଶାସିତ ମାନ୍ୟତା ହରାଇବା ଆଶଙ୍କା ଦେଖାଦେଇଛି। ଜାନୁୟାରୀରେ ନାକ୍ କମିଟି ଗଠନ କରିବାକୁ ଥିବାବେଳେ ପୂର୍ବତନ ଅଧ୍ୟକ୍ଷ ତାହା ନ କରି ଅବସର ନେଇ ସାରିଥିବାରୁ ନୂତନ ଅଧ୍ୟକ୍ଷ ଆବୁ ତାହିର ଅଡ଼ୁଆରେ ପଡିଛନ୍ତି।
ସୂଚନାଯୋଗ୍ୟ, ପୂର୍ବତନ ଅଧ୍ୟକ୍ଷ ଗତ ଜାନୁୟାରୀରେ ନାକ୍ କମିଟି ଗଠନ କରି ସ୍ବୟଂଶାସିତ ମାନ୍ୟତା ସମ୍ପର୍କରେ ଏକ ରିପୋର୍ଟ ଅଟୋନୋମସ୍ ମଞ୍ଜୁରୀ କମିଟିକୁ ପ୍ରଦାନ କରିବା କଥା। ସେ ସମ୍ପର୍କିତ ସମସ୍ତ ଆନୁଷଙ୍ଗିକ କାଗଜାଦି ପ୍ରସ୍ତୁତ କରାଯାଇ ବିଶ୍ୱ ବିଦ୍ୟାଳୟ ମଞ୍ଜୁରୀ ଆୟୋଗଠାରେ ଯଥା ସମୟରେ ପୈଠ ହେବା କଥା। କିନ୍ତୁ ବିଡ଼ମ୍ବନାର ବିଷୟ ଯେ, ଦୀର୍ଘ ୬ ମାସ ପରେ ନାକ୍ କମିଟି ଗଠନ କରାଯାଇଛି। ଏହି କମିଟି ସ୍ବୟଂଶାସିତ ସମ୍ପର୍କିତ କାଗଜାଦି ପ୍ରସ୍ତୁତ କରିବାକୁ ସମୟ ଲାଗିବ ବୋଲି କୁହାଯାଉଛି। ମହାବିଦ୍ୟାଳୟର ବିଭିନ୍ନ ବିଭାଗର କାଯର୍ୟ ଦକ୍ଷତା ସର୍ମ୍ପକରେ ଉଲ୍ଲେଖ କରାଯାଇ ଆବଶ୍ୟକ ନଥିପତ୍ର ଦେବା ପାଇଁ କମିଟିକୁ ଦାୟିତ୍ୱ ଦିଆଯାଇଛି। ୩ବର୍ଷ ଧରି ମହାବିଦ୍ୟାଳୟ ୟୁଜିସି ଦେଇ ନ ଥିବାରୁ କଲେଜକୁ ବିଶ୍ୱବିଦ୍ୟାଳୟ ଅନୁଦାନ ପାଣ୍ଠି ବନ୍ଦ ରହିଛି। ଫଳରେ ମହାବିଦ୍ୟାଳୟ ବିକାଶରେ ଏହା ବାଧକ ସାଜିଛି। ଛାତ୍ରୀଛାତ୍ରଙ୍କ ସଂଖ୍ୟାନୁପାତରେ ମହାବିଦ୍ୟାଳୟରେ ଆବଶ୍ୟକ ଶ୍ରେଣୀଗୃହ ନାହିଁ। ଖେଳ ପଡିଆର ଉନ୍ନତିକରଣ, ପାଠାଗାରର ଉନ୍ନତି, ବିଜ୍ଞାନଗାରରେ ଆବଶ୍ୟକୀୟ ଯନ୍ତ୍ରପାତି, ସେମିନାର ଆୟୋଜନ ଆଦିରେ ଏଥିଯୋଗୁ ବାଧକ ସାଜିଛି। ପୂର୍ବତନ ବିଦାୟୀ ଅଧ୍ୟକ୍ଷଙ୍କ ଗୋଷ୍ଠୀ ଓ ଅନ୍ୟ କେତେଜଣ ଅଧ୍ୟାପକଙ୍କ ମଧ୍ୟରେ ଶୀତଳ ଯୁଦ୍ଧ ଚାଲିଥିବାରୁ କଲେଜ ପରିଚାଳନାରେ ଅନେକ ସମୟରେ ବ୍ୟାଘାତ ସୃଷ୍ଟି ହେଉଥିଲା। ଏହାର ଉଦାହରଣ ଭାବେ କଲେଜର ସୁବର୍ଣ୍ଣ ଜୟନ୍ତୀ ସମାରୋହକୁ ବିଚାରକୁ ନିଆଯାଇପାରେ। ସ୍ବୟଂଶାସିତ ମାନ୍ୟତା ଯଦି କୈାଣସି ପରିସ୍ଥିତିରେ କଲେଜ ହରାଏ ସେଥିପାଇଁ ପୂର୍ବତନ ଅଧ୍ୟକ୍ଷ ଓ କଲେଜ ପରିଚାଳନା କମିଟିର ଅଧ୍ୟକ୍ଷ ପୂର୍ବତନ କୋରେଇ ବିଧାୟକ ଉତ୍ତରଦାୟୀ ବୋଲି ପୁରାତନ ଛାତ୍ର ସଂସଦ ସଭାପତି ବିଦ୍ୟାଧର ମହାନ୍ତି ଅଭିଯୋଗ କରିଛନ୍ତି। ପୁରାତନ ଛାତ୍ର ନେତା ପ୍ରଫୁଲ୍ଲ ନାୟକ, ଦୁଷ୍ମନ୍ତ କୁମାର ରାଉତ ପ୍ରମୁଖ ମହାବିଦ୍ୟାଳୟର ସ୍ବୟଂଶାସିତ ମାନ୍ୟତା ବଜାୟ ରଖିବା ପାଇଁ ଆନୁଷଙ୍ଗିକ କାଗଜାଦି ଆୟୋଗ ନିକଟକୁ ତୁରନ୍ତ ପଠାଇବାକୁ ଦାବି କରିଛନ୍ତି। ଏ ସମ୍ପର୍କରେ ପୂର୍ବତନ ଅଧ୍ୟକ୍ଷ ହେମନ୍ତ ରାଉତଙ୍କୁ ପଚାରିବାରେ, ସ୍ବୟଂଶାସିତ ମାନ୍ୟତା ବଜାୟ ରଖିବାକୁ ନାକ୍ କମିଟି ଗଠନର ସମୟସୀମା ଡିସେମ୍ବର ପର୍ଯ୍ୟନ୍ତ ରହିଛି। ତେଣୁ ହାତରେ ସମୟ ଥିବାରୁ ସେ କମିଟି ଗଠନ କରି ନ ଥିବା କହିଥିବାବେଳେ ମହାବିଦ୍ୟାଳୟର ଅଧ୍ୟକ୍ଷ ତାହିରଙ୍କୁ ପଚାରିବାରେ, ଜାନୁୟାରୀରୁ ନାକ୍ କମିଟି ଗଠନ ହେବା କଥା। କାରଣ ଏ ସମ୍ପର୍କିତ କାଗଜାଦି ପ୍ରସ୍ତୁତ କରିବାକୁ ସମୟ ଲାଗିଥାଏ। ଗତ ମେ ୩୧ରେ ସେ ଅଧ୍ୟକ୍ଷ ଦାୟିତ୍ୱ ନେବା ପରେ ଜୁନ ୧ରେ ନାକ୍ କମିଟି ଗଠନ କରିଛନ୍ତି। ଆନୁଷଙ୍ଗିକ କାଗଜପତ୍ର ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଛନ୍ତି। ବିଶ୍ୱବିଦ୍ୟାଳୟ ମଞ୍ଜୁରୀ କମିଟି ପରିଦର୍ଶନ କରିବା ପାଇଁ ମଧ୍ୟ ଚେଷ୍ଟା ଚଳାଇଥିବା କହିଛନ୍ତି।
