ନ୍ୟୁୟର୍କ, ୨୮ା୨ (ଏପି)- କିମ୍ବଦନ୍ତୀ ବାସ୍କେଟବଲ ଖେଳାଳି କୋବେ ବ୍ରାଏଣ୍ଟଙ୍କ କେତୋଟି ପ୍ରମୁଖ ସ୍ମାରକୀ ନିଲାମ ହେବ। ତନ୍ମଧ୍ୟରେ ତାଙ୍କର ଦୁଇଟି ଲସ୍ ଏଞ୍ଜେଲ୍ସ ଲେକର୍ସ ୟୁନିଫର୍ମ, ଗ୍ରାଉମାନ୍ସ ଚାଇନିଜ ଥିଏଟର ହଲ୍ ଅଫ୍ ଫେମ୍ ଗ୍ୟାଲେରୀରେ ସ୍ଥାନ ପାଇବା ବେଳର ସିମେଣ୍ଟ ହ୍ୟାଣ୍ଡ୍ପ୍ରିଣ୍ଟ୍ ଅନ୍ୟତମ। ଏସବୁର ଏପ୍ରିଲରେ ନିଲାମ ଏପ୍ରିଲ ୩୦ରେ ହେବ ବୋଲି ନିଲାମକାରୀ ଜୁଲିଏନ୍ସ ଅକ୍ସନ୍ସ ତରଫରୁ ସୂଚନା ଦିଆଯାଇଛି। ସଂସ୍ଥା ତରଫରୁ ପ୍ରତିବର୍ଷ ବିଭିନ୍ନ କ୍ରୀଡ଼ାସ୍ମାରକୀ ନିଲାମ କରାଯାଇଥାଏ। ଏଥର ନିଲାମୀରେ ୧୯୮୪ ଲସ୍ଏଞ୍ଜେଲ୍ସ ଗ୍ରୀଷ୍ମକାଳୀନ ଅଲିମ୍ପିକ୍ସର ଏକ ରୌପ୍ୟ ପଦକ ଏବଂ ୨୦୦୨ ଫିଫା ବିଶ୍ୱକପ୍ ସ୍ବର୍ଣ୍ଣ ବିଜେତାଙ୍କ ଏକ ପଦକ ସ୍ଥାନ ପାଇଛି। ଜାନୁୟାରୀ ୨୬ରେ ଏକ ହେଲିକପ୍ଟର ଦୁର୍ଘଟଣାରେ ବ୍ରାଏଣ୍ଟ , ତାଙ୍କ ଝିଅ ଗାଏନା ଏବଂ ଅନ୍ୟ ୭ ଜଣଙ୍କ ମୃତ୍ୟୁ ଘଟିଥିଲା। ଏହା ପରେ ବ୍ରାଏଣ୍ଟଙ୍କ କିଛି ସ୍ମାରକୀ ନିଲାମ ପାଇଁ ଯୋଜନା ହୋଇଥିଲା। ବ୍ରାଏଣ୍ଟଙ୍କ ଭଳି କିମ୍ବଦନ୍ତୀ ଖେଳାଳିଙ୍କୁ ଶ୍ରଦ୍ଧାଞ୍ଜଳି ଦେବା ଉଦ୍ଦେଶ୍ୟରେ ଏହା କରାଯାଉଛି ବୋଲି ଜୁଲିଏନ୍ସ ଅକ୍ସନ୍ସର ସଭାପତି ତଥା ସୁଇଓ ଡାରେନ ଜୁଲିଏନ୍ ପ୍ରକାଶ କରିଛନ୍ତି। ଯେଉଁ ୟୁନିଫର୍ମଗୁଡ଼ିକ ନିଲାମ ହେବ ତନ୍ମଧ୍ୟରୁ ଗୋଟିଏ ସେ ୨୦୦୦ ଏନ୍ବିଏ ଫାଇନାଲ୍ସରେ ପରିଧାନ କରିଥିଲେ। ସେଥିରେ ତାଙ୍କର ଓରିଜିନାଲ ନମ୍ବର ୮ ଲେଖା ଥିଲା। ସେଦିନ ଓ୍ବିଲ୍ଟ ଚାମ୍ବରଲେନ୍ଙ୍କ ସ୍ମୃତି ଉଦ୍ଦେଶ୍ୟରେ ସେ ବ୍ୟବହାର କରିଥିବା ଏକ କଳା ଆର୍ମ ବ୍ୟାଣ୍ଡ୍ଟିର ମଧ୍ୟ ବିକ୍ରି ହେବ। ଚାମ୍ବରଲେନ୍ଙ୍କ ସେହି ସିଜନରେ ମୃତ୍ୟୁ ଘଟିଥିଲା। ନିଲାମ ହେବାକୁଥିବା ବ୍ରାଏଣ୍ଟଙ୍କ ସାମଗ୍ରୀଗୁଡ଼ିକ ମଧ୍ୟରେ ତାଙ୍କ ଦସ୍ତଖତ ସମ୍ବଳିତ ଆଡିଡାସ ଜୋତା ଏକ ବାସ୍କେଟବଲ ରହିଛି। ଏହି ବାସ୍କେଟବଲ୍ଟିରେ ବ୍ରାଏଣ୍ଟଙ୍କ ବ୍ୟତୀତ ୨୦୧୦-୧୧ ଲେକର୍ସ ଟିମ୍ର ଅନ୍ୟ ଷ୍ଟାର ଖେଳାଳି ରନ୍ ଆର୍ଟେଷ୍ଟ ଏବଂ ପାଉ ଗାସୋଲଙ୍କ ସ୍ବାକ୍ଷର ରହିଥିଲା। ବ୍ରାଏଣ୍ଟଙ୍କ ସ୍ମାରକୀଗୁଡ଼ିକ କେଣ୍ଟିକିସ୍ଥିତ ଜଣେ ସଂଗ୍ରହକାରୀ ତାଙ୍କୁ ବିକ୍ରି କରିଥିବା ଜୁଲିଏନ୍ସ କହିଛନ୍ତି।
