ଛତ୍ରପୁର,୨୦ା୧୦(ଡି.ଏନ.ଏ)-ବ୍ରହ୍ମପୁର ମହାନଗର ନିଗମରେ ପାଣି ସମସ୍ୟା ଦୂର କରିବା ପାଇଁ ବ୍ୟୟ ବହୁଳ ଜାନିବିଲି ପ୍ରକଳ୍ପ ପ୍ରତିଷ୍ଠା ହୋଇଛି। ଏହି ପ୍ରକଳ୍ପ ଉଦ୍ଘାଟନ ହୋଇଥିଲେ ହେଁ ଏହା ସମ୍ପୂର୍ଣ୍ଣ ଭାବେ କାର୍ଯ୍ୟକ୍ଷମ ହୋଇନି। ଏପରିକି ପାଇପ୍ ବିଛା କାମଠାରୁ ଆରମ୍ଭ କରି ସମସ୍ତ ଘରକୁ ପାଣି ଯୋଗାଣ ହୋଇ ନ ଥିବା ଜଣାପଡିଛି। ଶନିବାର ଛତ୍ରପୁରସ୍ଥିତ ଜିଲାପାଳଙ୍କ ସମ୍ମିଳନୀ ଗୃହରେ ଏହି ପ୍ରକଳ୍ପ ସମ୍ବନ୍ଧୀୟ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା। ଏଥିରେ ଜିଲାପାଳ ବିଜୟ ଅମୃତା କୁଲାଙ୍ଗେ ଅଧ୍ୟକ୍ଷତା କରିଥିଲେ। ଏହି ପ୍ରକଳ୍ପ ପାଇଁ ପାଇପ୍ ଲାଇନ୍ ବିଛା କାମ ଓ ସମସ୍ତ ଘରକୁ ଜଳ ଯୋଗାଣ ଆସନ୍ତା ବର୍ଷ ଜାନୁୟାରୀ ସୁଦ୍ଧା ତ୍ୱରାନ୍ବିତ କରିବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ଏଥିରେ ଖିଲାପ କଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲାପାଳ ସତର୍କ କରାଇଛନ୍ତି। ଦିନ ବେଳା ପାଇପ୍ କାମ ଚାଲୁଥିବାରୁ ଟ୍ରାଫିକ୍ ସମସ୍ୟା ଉପଜୁଛି। ଏଣୁ ରାତିରେ ହିଁ ଏହି କାମ କରିବାକୁ ଜିଲାପାଳ କହିଥିଲେ। ଏଥିସହ ଏହି କାର୍ଯ୍ୟରେ ଅଧିକ ଶ୍ରମିକଙ୍କୁ ନିୟୋଜିତ କରିବାକୁ ଠିକା ସଂସ୍ଥାକୁ ନିର୍ଦ୍ଦେଶ ଦିଆଯାଇଛି। ପାଇପ୍ ବିଛାଇବା ପାଇଁ ରାସ୍ତାଗୁଡିକୁ ଖୋଳା ଯାଉଛି। ଏହାକୁ ଠିକ୍ କରିବାକୁ କୁହାଯାଇଛି। କେତେକ ସ୍ଥାନରେ ବିଦ୍ୟୁତ କେବୁଲ୍ ମଧ୍ୟ ମାଟି ତଳେ ଯାଇଛି। ଫଳରେ ପାଇପ୍ ବିଛା କାମ ବିପଦପୂର୍ଣ୍ଣ ହୋଇଛି। ଏଣୁ କେଉଁଠି ବିଦ୍ୟୁତ୍ କେବୁଲ୍ ମାଟି ତଳେ ଯାଇଛି, ମିଟର ଦ୍ୱାରା ଯାଞ୍ଚ କରି ବିଦ୍ୟୁତ୍ ବିଭାଗ ପକ୍ଷରୁ ଠିକା ସଂସ୍ଥାକୁ ଅବଗତ କରିବାକୁ ଜିଲାପାଳ କହିଥିଲେ। ଏହି ବୈଠକରେ ବ୍ରହ୍ମପୁର ମହାନଗର ନିଗମ କମିଶନର ଚକ୍ରବର୍ତ୍ତୀ ସିଂ ରାଠୋର, ପ୍ରକଳ୍ପ ଇନ୍ଚାର୍ଜ ସୀତାରାମ ପଣ୍ଡା ପ୍ରମୁଖ ଉପସ୍ଥିତ ଥିଲେ।
