ବୌଦ୍ଧ, ୩୧ା୩(ସ୍ବପ୍ର): କରୋନା ସଂକ୍ରମଣ ମୁକାବିଲା ପାଇଁ ବୌଦ୍ଧ ଜିଲା ପ୍ରଶାସନ ପକ୍ଷରୁ ପ୍ରସ୍ତୁତି ଜୋରସୋରରେ ଚାଲିଛି। ଜିଲାରେ ୩ଟି ବ୍ଲକ ଓ ଏନଏସିରେ ୮୨ଟି ସ୍ଥାନକୁ ସଙ୍ଗରୋଧ କେନ୍ଦ୍ର ଭାବରେ ଚିହ୍ନଟ କରାଯାଇଥିବା ଜିଲାପାଳ ଲଲାଟେନ୍ଦୁ ମିଶ୍ର ସୂଚନା ଦେଇଛନ୍ତି। ସଙ୍ଗରୋଧ କେନ୍ଦ୍ରଗୁଡିକରେ ବିଦ୍ୟୁତ, ପାଣି ଓ ପାଇଖାନା ବ୍ୟବସ୍ଥା ହୋଇସାରିଛି। ଲକ୍ଡାଉନ ଯୋଗୁଁ ଖଟ ବ୍ୟବସ୍ଥାରେ କିଛିଟି ବିଳମ୍ବ ହୋଇଛି। ତେବେ ଖୁବ୍ଶୀଘ୍ର ପ୍ରତ୍ୟେକ କେନ୍ଦ୍ରରେ ସମସ୍ତ ବ୍ୟବସ୍ଥା ସମ୍ପୂର୍ଣ୍ଣ କରାଯିବ ବୋଲି ଜିଲାପାଳ ମିଶ୍ର କହିଛନ୍ତି। ବୌଦ୍ଧ ସହରର ପୂରୁଣା ଜେଲଠାରେ ପ୍ରସ୍ତୁତ ହୋଇଥିବା ସଙ୍ଗରୋଧ କେନ୍ଦ୍ରକୁ ଜିଲାପାଳ ମିଶ୍ର ମଙ୍ଗଳବାର ପରିଦର୍ଶନ କରିବା ସହିତ ସମସ୍ତ ପ୍ରସ୍ତୁତିର ସମୀକ୍ଷା କରିଛନ୍ତି। ଜିଲାରେ କୌଣସି ବ୍ୟକ୍ତିଙ୍କୁ ସରକାରଙ୍କ ପକ୍ଷରୁ ପ୍ରସ୍ତୁତ ସଙ୍ଗରୋଧ କେନ୍ଦ୍ରରେ ରଖାଯାଇ ନାହିଁ। ତେବେ ବାହାରୁ ଆସିଥିବା ଲୋକମାନଙ୍କୁ ସେମାନଙ୍କ ନିଜ ଘରେ ରହିବା ପାଇଁ ଓ ବାହାର ଲୋକଙ୍କ ସହିତ ମିଳାମିଶା ନକରିବାକୁ ପରାମର୍ଶ ଦିଆଯାଇଛି। ବୌଦ୍ଧ ଏନଏସିରେ ୨୪ଜଣ ଶ୍ରମିକଙ୍କୁ ରାତ୍ରିକାଳୀନ ବିଶ୍ରାମ ଗୃହରେ ରଖାଯାଇଛି। ସେହିପରି ଜିଲାରେ ୨୨୭୯ ଜଣଙ୍କ ପାଇଁ ରନ୍ଧାଖାଦ୍ୟର ବ୍ୟବସ୍ଥା କରାଯାଇଛି। ବୌଦ୍ଧ ଏନଏସିରେ ୭୨ ଜଣ, ବୌଦ୍ଧ ବ୍ଲକରେ ୧୯୭, ହରଭଙ୍ଗା ବ୍ଲକରେ ୮୭୦ ଜଣ ଓ କଣ୍ଟାମାଳ ବ୍ଲକରେ ୧୧୪୬ ଜଣଙ୍କ ପାଇଁ ପ୍ରଶାସନ ପକ୍ଷରୁ ରନ୍ଧାଖାଦ୍ୟର ବ୍ୟବସ୍ଥା କରାଯାଇଛି। ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ଶଶାଙ୍କ ଶେଖର ଦାଶ, ଉପଜିଲାପାଳ ଏନସି ଜ୍ୟୋତି ରଞ୍ଜନ ନାଏକ, ଜିଲା ମୁଖ୍ୟ ଚିକିତ୍ସାଧିକାରୀ ଡ. ଲକ୍ଷ୍ମୀଧର ସାହୁ, ଏନଏସି ନିର୍ବାହୀ ଅଧିକାରୀ ଇଂ.ମନୋରଞନ ପଣ୍ଡା, ତିନି ବ୍ଲକର ବିଡିଓ, ତହସିଲଦାରଙ୍କ ସମେତ ସମସ୍ତ ଜିଲାସ୍ତରୀୟ ଅଧିକାରୀମାନେ ସଙ୍ଗରୋଧ କେନ୍ଦ୍ରଗୁଡିକ ପରିଦର୍ଶନ କରିଥିଲେ।
