ଭଣ୍ଡାରିପୋଖରୀ, ୧୪ା୮(ଡି.ଏନ୍.ଏ.)- ଲଘୁଚାପ ଜନିତ ବର୍ଷା ଯୋଗୁ ବୈତରଣୀ ନଦୀ ଫୁଲିବା ଆରମ୍ଭ କରିଛି। ନଦୀର ଜଳସ୍ତର ଆଖୁଆପଦା ଆନିକଟ ଠାରେ ମଙ୍ଗଳବାର ସକାଳ ୬ଟାରୁ ବୃଦ୍ଧି ପାଉଥିବା ଜଣାପଡିଛି। ସକାଳ ୫ଟାରେ ବନ୍ୟାଜଳ ସ୍ତର ୧୬.୬୦ ମିଟର ଥିବାବେଳେ ଏହା ବୃଦ୍ଧି ପାଇ ଅପରାହ୍ନ ୩ଟା ସୁଦ୍ଧା ବନ୍ୟାଜଳ ୧୬.୯୫ ମିଟରରେ ପହଞ୍ଚିଥିଲା। ଆଖୁଆପଦା ଆନିକଟଠାରେ ବୈତରଣୀର ବିପଦସଙ୍କେତ ୧୭.୮୩ ମିଟର । ଉପରମୁଣ୍ଡରେ ବର୍ଷା ଲାଗି ରହିଥିବାରୁ ନଦୀର ଜଳସ୍ତର ବୃଦ୍ଧି ପାଉଥିବା ଜଣାପଡିଛି। ୨୪ ଘଣ୍ଟାରେ ଆଖୁଆପଦା ଠାରେ ୫୮.୪ ମି.ମି., ଆନନ୍ଦପୁର ଠାରେ ୬୪.୪ ମି.ମି., ସୋମପାଟଣାରେ ୨୭.୨ ମି.ମି., କେନ୍ଦୁଝର ଠାରେ ୪୩.୨ ମି.ମି., ଠାକୁରମୁଣ୍ଡା ଠାରେ ୫୯.୨ ମି.ମି., ଚମ୍ପୁଆ ଠାରେ ୨୬.୬ ମି.ମି. ବର୍ଷା ହୋଇଥିବା ରେକର୍ଡ କରାଯାଇଛି। ତେବେ ବୈତରଣୀରେ ବନ୍ୟା ଆଶଙ୍କା ନାହିଁ ବୋଲ ଆଖୁଆପଦା ଫ୍ଲଡ ସେଲ ପକ୍ଷରୁ କୁହାଯାଇଛି।
