ବାର୍‌ହା ମାରିବାକୁ ଯାଇ ଶିକାରୀ ମୃତ: ପୋଲିସକୁ ନ ଜଣାଇ ମୃତଦେହ ସତ୍କାର କଲେ ଗ୍ରାମବାସୀ, ପୋଲିସର ତନାଘନା
6:00 pmSeptember 14, 2019 / 09

କେସିଙ୍ଗା, ୧୪।୯(ଡି.ଏନ୍‌.ଏ.): କଳାହାଣ୍ଡି ଜିଲା କେସିଙ୍ଗା ଥାନା ଅଧୀନ ପଲମଫାଣ୍ଡି ଅନ୍ତର୍ଗତ ଟକର୍ଲା ପଞ୍ଚାୟତ ରାଏଧୁନିପଦର ଗ୍ରାମର କେତେକ ଲୋକ ସଂଘବଦ୍ଧ ହୋଇ ନିକଟସ୍ଥ ବଜରଗଡ଼ ଜଙ୍ଗଲକୁ ଯାଇ ବାର୍‌ହା ଶିକାର କରୁଥିବା ସମୟରେ ଜଣେ ଶିକାରୀଙ୍କ ମୃତ୍ୟୁ ଘଟିଥିଲା। ସେ ହେଲେ ରାଜୁ ମାଝି। ଏହି ଘଟଣା ପରେ ଅନ୍ୟ ଶିକାରୀ ଓ ଗ୍ରାମବାସୀ ପୋଲିସକୁ ନ ଜଣାଇ ଶବ ସତ୍କାର କରିଥିଲେ। ମୃତ ରାଜୁ ମାଝିଙ୍କ ଭଉଣୀ ନିର୍ମଳା ଏହି ଘଟଣା ବିଷୟରେ ଜାଣି ଶୁକ୍ରବାର ଫାଣ୍ଡିରେ ଅଭିଯୋଗ କରିଛନ୍ତି। ପୋଲିସ ପହଞ୍ଚି କେସ୍‌ ନଂ .୨୪୭/ ୧୯ରେ ମାମଲା ରୁଜୁକରି ତଦନ୍ତ ଚଳାଇଛି।
ସୂଚନାଯୋଗ୍ୟ, ଉପରୋକ୍ତ ଗ୍ରାମର ୭ଜଣ ଶିକାରୀ ଗତ ମଙ୍ଗଳବାର ନିକଟସ୍ଥ ବଜ୍ରଗଡ଼ ଜଙ୍ଗଲକୁ ଶିକାର କରିବାକୁ ଯାଇଥିଲେ। ଏକ ବାର୍‌ହାକୁ ସଂଘବଦ୍ଧ ହୋଇ ଘେରିଥିଲେ। ବାର୍‌ହାକୁ ଗୁଳିମାରିବା ସମୟରେ ତାହା ବାର୍‌ହା ଦେହରେ ନ ବାଜି ଶିକାରୀ ରାଜୁଙ୍କ ଦେହରେ ବାଜିଥିଲା। ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା।