ଦେଶର ଆଭ୍ୟନ୍ତରୀଣ ସୁରକ୍ଷା ପୋଲିସର ପ୍ରମୁଖ ଦାୟିତ୍ୱ। ଏହି ଦାୟିତ୍ୱ ସମ୍ପାଦନରେ ଅନେକ ପୋଲିସ କର୍ମଚାରୀ ନିଜ ଜୀବନ ଉତ୍ସର୍ଗ କରିଥିବା ନଜିର ରହିଛି। ଅନେକେ ନିଜର କର୍ତ୍ତବ୍ୟ ସମ୍ପାଦନା କରୁଥିବାବେଳେ ମୃତ୍ୟୁକୁ ଅତି ନିକଟରୁ ଦେଖିଛନ୍ତି। ଚାକିରି ଜୀବନରେ ଏଭଳି ଏକ ଅନୁଭୂତିକୁ ସାଉଁଟିଛନ୍ତି ବାଦାମବାଡ଼ି ଥାନା ଅଧିକାରୀ ହିମାଂଶୁ ଭୂଷଣ ସ୍ବାଇଁ, ଯାହା ତାଙ୍କ ପାଇଁ ଅପାସୋରା ହୋଇ ରହିବ। ଏ ସମ୍ପର୍କରେ ସ୍ବାଇଁ କୁହନ୍ତି, ୨୦୧୧ ମସିହାର ଘଟଣା। ସୁନ୍ଦରଗଡ଼ ଜିଲା ବଣାଇ ସବ୍ଡିଭିଜନ କେ. ବଲାଙ୍ଗ ଥାନାରେ ମୋର ପୋଷ୍ଟିଂ ହୋଇଥାଏ। ତାହା ଏକ ମାଓବାଦୀପ୍ରବଣ ଅଞ୍ଚଳ। ବିଶ୍ରା ଥାନା ଅଧୀନ ଦୀଘା ଜଙ୍ଗଲରେ ୩୦ରୁ ଅଧିକ ମାଓବାଦୀ ଏକତ୍ର ହେଉଥିବା ଖବର ମିଳିଲା। ୩୦ଜଣ ଏସ୍ଓଜି କମାଣ୍ଡର, ଡିଭିଏଫ୍ କମାଣ୍ଡରଙ୍କ ସହ ମୁଁ ରାତି ପ୍ରାୟ ୧୨ଟାରେ ଅପରେଶନରେ ବାହାରିଲି। ପ୍ରାୟ ୭ଘଣ୍ଟା ପାହାଡ଼ି ରାସ୍ତାରେ ଚାଲିଚାଲି ଯିବା ପରେ ଘଞ୍ଚ ଜଙ୍ଗଲ ମଧ୍ୟରେ ଦୂରରୁ ମାଓବାଦୀଙ୍କ ଉପସ୍ଥିତି ଜଣାପଡ଼ିଥିଲା। ମାଓବାଦୀମାନେ ଆମକୁ ଦେଖି ଗୁଳିବର୍ଷଣ କଲେ। ଆମେ ମଧ୍ୟ ପ୍ରତିଜବାବ ଦେଲୁ। ତେବେ କିଛି ସମୟ ଗୁଳିବର୍ଷଣ ପରେ ମୋ ପାଖରେ ଥିବା ଜଣେ କନଷ୍ଟେବଳ ଲକ୍ଷ୍ମଣ କିଷାନଙ୍କ ବନ୍ଧୁକ ଧୀରେ ଧୀରେ ତଳ ମୁହଁା ହେଉଥିବା ଦେଖିଲି। ପଛକୁ ଚାହିଁଲା ବେଳକୁ ଲକ୍ଷ୍ମଣଙ୍କ ଛାତିରୁ ପିଚକାରୀ ମାରିବା ଭଳି ରକ୍ତ ବାହାରୁଥାଏ। କିଛି କ୍ଷଣ ମଧ୍ୟରେ ସେ ଟଳିପଡ଼ିଲେ। ମାଓବାଦୀଙ୍କ ପ୍ରଚଣ୍ଡ ଗୁଳି ବର୍ଷଣ ଓ ସାଥୀଙ୍କ ମୃତ୍ୟୁ ଯୋଗୁ ଆଉ ଆଗକୁ ବଢ଼ିବାକୁ ସମ୍ଭବ ହେଲାନି। ପ୍ରାୟ ୨ଘଣ୍ଟା ଧରି ଗୁଳି ବିନିମୟ ହୋଇଥିଲା। ଏଥିରେ ଅଢ଼େଇ ହଜାର ରାଉଣ୍ଡ ଗୁଳି ଫାୟାରିଂ ହୋଇଥିଲା। ଶେଷରେ ଆମେ ପଛକୁ ଫେରି ଆସିଲୁ। ଏହାର ଦୁଇଦିନ ପରେ ଶହୀଦ ଲକ୍ଷ୍ମଣଙ୍କ ମୃତଦେହ ଆଣିଥିଲୁ। ତେବେ ଏହି ଘଟଣା ମୋର ନିଦ ହଜାଇଦେଲା। ସାଥୀଙ୍କ ମୃତ୍ୟୁର ପ୍ରତିଶୋଧ ନେବା ପାଇଁ ବିଚଳିତ ହୋଇପଡ଼ିଥିଲି। ଏହାର କିଛିଦିନ ପରେ ପୁଣି ସେଠାରେ ମାଓବାଦୀଙ୍କ ଉପସ୍ଥିତି ନେଇ ଖବର ମିଳିଥିଲା। ଅଧିକ ପ୍ରସ୍ତୁତ ହୋଇ ପୁନର୍ବାର ସେହିଠାରେ ପହଞ୍ଚିଥିଲୁ। ଆମ ଗୁଳିରେ ୩ଜଣ ମାଓବାଦୀ କମାଣ୍ଡର ପ୍ରାଣ ହରାଇଲେ। ଆହୁରି କେତେଜଣ ଆହତ ହୋଇଥିଲେ। ଏହାପରେ ମାଓବାଦୀ ଛତ୍ରଭଙ୍ଗ ଦେଇ ସେହି ସ୍ଥାନ ଛାଡ଼ି ପଳାଇଲେ। ସାଥୀଙ୍କ ମୃତ୍ୟୁର ପ୍ରତିଶୋଧ ନେଇ ମୋ ମନକୁ କିଛିଟା ଶାନ୍ତି ମିଳିଥିଲା। ତେବେ ସେହି ସାଥୀଙ୍କ ମୃତ୍ୟୁର ଦୃଶ୍ୟ ମନେପଡ଼ିଲେ ଆଜି ବି ଲୋମ ଟାଙ୍କୁରିଉଠେ।
– ରିପୋର୍ଟ: ଓଁକାର ମିଶ୍ର, କଟକ
