ଢେଙ୍କାନାଳ ଅଫିସ, ୧୫।୫- ଢେଙ୍କାନାଳ ଜିଲାର କାଜୁ ଚାଷୀଙ୍କ ଅଣ୍ଟା ଭାଙ୍ଗିଦେଇଛି ସାମୁଦ୍ରିକ ବାତ୍ୟା ‘ଫନୀ’। ଫସଲ ହରାଇ ଚାଷୀମାନେ ଏବେ ମୁଣ୍ଡରେ ହାତଦେଇ ବସିଥିବାବେଳେ କ୍ଷତିଗ୍ରସ୍ତଙ୍କୁ ସହାୟତା ଯୋଗାଇଦେବାକୁ ଦାବି ହେଉଛି।
ସଦର ବ୍ଲକ ନଡ଼ିଆଳୀ ଗ୍ରାମର ୩ ସ୍ବୟଂ ସହାୟକ ଗୋଷ୍ଠୀ (ଏସ୍ଏଚ୍ଜି)କୁ କାଜୁ ଚାଷ କରିବାକୁ ପ୍ରୋତ୍ସାହିତ କରାଯାଇଥିଲା। ମୃତ୍ତିକା ସଂରକ୍ଷଣ ବିଭାଗ ପକ୍ଷରୁ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନାରେ ୧୦୦ ଏକର ସରକାରୀ ଜମିରେ ସେମାନେ କାଜୁ ଚାଷ କରିଥିଲେ। ଏସ୍ଏଚ୍ଜିରେ ଅନ୍ତର୍ଭୁକ୍ତ ୪୦ ପରିବାର ଏହାର ରକ୍ଷଣାବେକ୍ଷଣ କରି ଆସୁଥିଲେ। ବାତ୍ୟାରେ କାଜୁଗଛଗୁଡ଼ିକ ସମ୍ପୂର୍ଣ୍ଣ ନଷ୍ଟ ହୋଇଯାଇଛି। ଉଜୁଡି ଯାଇଥିବା ବଗିଚାର ପୁନରୁଦ୍ଧାର କରିବା ଦିଗରେ ପଦକ୍ଷେପ ନେବାକୁ କମଳା ଦେହୁରୀ, କବିତା ଦେହୁରୀ, ଦୁହିତା ଦେହୁରୀ, ଟୁନି ଦେହୁରୀ, ସବିତା ଦେହୁରୀଙ୍କ ସମେତ ଶତାଧିକ ଏସ୍ଏଚ୍ଜି ସଦସ୍ୟା ଦାବି କରିଛନ୍ତି। ଏ ନେଇ ସେମାନେ ମଙ୍ଗଳବାର ଜିଲାପାଳ ନିଖିଲ ପଓ୍ବନ କଲ୍ୟାଣଙ୍କ ଦ୍ୱାରସ୍ଥ ହୋଇ ସହାୟତାର ହାତ ବଢ଼ାଇବାକୁ ନିବେଦନ କରିଛନ୍ତି।
