ଢେଙ୍କାନାଳ ଅଫିସ,୧୫।୫- ଶିଳ୍ପରେ ସମୃଦ୍ଧ। ପାଣ୍ଠିର ଅଭାବ ନାହିଁ। ତଥାପି ବିଶୁଦ୍ଧ ପାଣି ମୁନ୍ଦାଏ ପାଇଁ ଡହଳବିକଳ ହେଉଛନ୍ତି ଢେଙ୍କାନାଳ ସହରବାସୀ। ପାନୀୟ ଜଳର ବୃହତ୍ତମ ସାଧନ ବ୍ରାହ୍ମଣୀ ନଦୀ ଜଳକୁ ଶିଳ୍ପସଂସ୍ଥା ଶୋଷୁଥିବାବେଳେ ଖରାଦିନେ ଜଳସଙ୍କଟ ତୀବ୍ର ହେବାରେ ଲାଗିଛି। ସମସ୍ୟା ସମାଧାନ ପାଇଁ ଜିଲା ପ୍ରଶାସନ କିମ୍ବା ରାଜନୈତିକ ଦଳ ଆନ୍ତରିକତା ଦେଖାଉ ନ ଥିବାବେଳେ ଜଳକଷ୍ଟରେ ହୀନସ୍ତା ହେଉଛନ୍ତି ଜନସାଧାରଣ।
ମହାନଦୀରୁ ପାଣି ଆସିବ। ଲୋକଙ୍କ କଷ୍ଟ ଦୂର ହେବ। ଢେଙ୍କାନାଳବାସୀଙ୍କୁ ଏପରି ସ୍ବପ୍ନ ଦେଖାଇଥିଲେ ରାଜ୍ୟ ସରକାର। ଦୀର୍ଘଦିନର ସମସ୍ୟା ଅନ୍ତ ହେବାକୁ ଯାଉଥିବା ଭାବି ଲୋକେ ମଧ୍ୟ ବେଶ୍ ଉତ୍ସାହିତ ଥିଲେ। ହେଲେ ଏହା ଏବେ ଦିବାସ୍ବପ୍ନ ପାଲଟିଛି। ମହାନଦୀ ପାଣି ତ ଦୂରର କଥା ବ୍ରାହ୍ମଣୀ ନଦୀ ପାଣିର ମଧ୍ୟ ଶତ ପ୍ରତିଶତ ସଦୁପଯୋଗ ହେଉନାହିଁ, ଯାହା ଜଳକଷ୍ଟକୁ ବହୁଗୁଣିତ କରିଛି।
ଢେଙ୍କାନାଳ ସହରର ପାଣି ସମସ୍ୟାର ସମାଧାନ ଲାଗି ରାଜ୍ୟ ସରକାରଙ୍କ ନିର୍ଦ୍ଦେଶକ୍ରମେ ୨୦୧୬-୧୭ ଆର୍ଥତ୍କ ବର୍ଷରେ ଯୋଜନା ପ୍ରସ୍ତୁତ କରିଥିଲା ଜନସ୍ବାସ୍ଥ୍ୟ ବିଭାଗ। ବୃହତ୍ ପାନୀୟ ଜଳ ପ୍ରକଳ୍ପ ଲାଗି ୧୬୦ କୋଟି ଟଙ୍କାର ପ୍ରସ୍ତାବ ରାଜ୍ୟ ସରକାରଙ୍କ ନିକଟକୁ ପଠାଯାଇଥିଲା। ଉକ୍ତ ପ୍ରକଳ୍ପରେ ମହାନଦୀରୁ ଆଠଗଡ଼ ଦେଇ ସିଧାସଳଖ ପାଣି ଆସିବା ପ୍ରସ୍ତାବ ରହିଥିଲା। ଏହାର ଡିପିଆର ମଧ୍ୟ ପ୍ରସ୍ତୁତ ହୋଇଥିଲା। ଏଥିପାଇଁ ୮ନଂ. ଓ୍ବାର୍ଡ ମହିଷାପାଟରେ ଓ୍ବାଟର ଟ୍ରିଟ୍ମେଣ୍ଟ ପ୍ଲାଣ୍ଟ କରିବାକୁ ଯୋଜନା ରହିଥିଲା। କିନ୍ତୁ ଅଦ୍ୟାବଧି ଏ ସମ୍ପର୍କିତ ଫାଇଲ ପଡ଼ିରହିଛି। ଏଥିପୂର୍ବରୁ ୩୧ କୋଟି ଟଙ୍କାର ଅନ୍ୟ ଏକ ପ୍ରସ୍ତାବ ଯାଇଥିଲେ ମଧ୍ୟ କୌଣସି ପଦକ୍ଷେପ ଗ୍ରହଣ କରାଯାଉନାହିଁ।
ଖରାଦିନ ଆସିଲେ ୭୦ହଜାରରୁ ଊର୍ଦ୍ଧ୍ୱ ଜନସଂଖ୍ୟା ବିଶିଷ୍ଟ ଢେଙ୍କାନାଳ ସହରବାସୀ ପ୍ରମାଦ ଗଣନ୍ତି। ବ୍ରାହ୍ମଣୀ ନଦୀରେ ଜଳସ୍ତର କମିଗଲେ ସମସ୍ୟା ଆହୁରି ବଢ଼ିଯାଏ। କ୍ରମବର୍ଦ୍ଧିଷ୍ଣୁ ଜନସଂଖ୍ୟା ଦୃଷ୍ଟିରୁ ଏବେ ସହରକୁ ଦୈନିକ ୧୧ମିଲିୟନ ଲିଟର ଜଳର ଆବଶ୍ୟକତା ରହିଥିବାବେଳେ ବିଭିନ୍ନ ଉତ୍ସରୁ ମିଳୁଛି ମାତ୍ର ୮ମିଲିୟନ ଲିଟର, ଯାହା ଆବଶ୍ୟକତା ଦୃଷ୍ଟିରୁ ୪ ମିଲିୟନ ଲିଟର କମ୍। ପୌରସଂସ୍ଥାର ୨୩ୱାର୍ଡ ମଧ୍ୟରୁ ୧୦ଟି ଓ୍ବାର୍ଡକୁ ଠିକ୍ ଭାବେ ପାଣି ଯୋଗାଣ ହେଉନାହିଁ। ୨୦୧୮ରେ ରାଜ୍ୟ ଯୋଜନା ଆନୁକୂଲ୍ୟରେ ୧୦କୋଟି ୩୦ଲକ୍ଷ ଟଙ୍କା ବ୍ୟୟରେ ବିଭିନ୍ନ ଓ୍ବାର୍ଡକୁ ପାଇପ୍ ବିଛାଯାଇଥିଲା। ବାଞ୍ଝକୁସୁମ, ବନମାଳୀପ୍ରସାଦ, ଖମାରସାହି, ଭଗବାନପୁର, କୁଞ୍ଜକାନ୍ତ ଲଳିତନଗର ଅଞ୍ଚଳରେ ଅଣ୍ଡରଗ୍ରାଉଣ୍ଡ୍ ୱାଟର ରିଜର୍ଭୟର ମଧ୍ୟ ନିର୍ମାଣ କରାଯାଇଛି। ହେଲେ ଏହା ଅଦ୍ୟାବଧି କାର୍ଯ୍ୟକ୍ଷମ ହୋଇନାହିଁ। ପ୍ରକଳ୍ପରେ ଖର୍ଚ୍ଚ କରାଯାଇଥିବା କୋଟି କୋଟି ଟଙ୍କା କେଉଁ କାମକୁ ନୁହେଁ ବୋଲି ବୁଦ୍ଧିଜୀବୀମାନେ କହିଛନ୍ତି। ରାଜନୈତିକ ଇଚ୍ଛା ଶକ୍ତି ଅଭାବରୁ ପାନୀୟ ଜଳ ପ୍ରକଳ୍ପ ପଦ୍ମ ଘୁଞ୍ଚତ୍ ଘୁଞ୍ଚତ୍ ଯାଉଛି ବୋଲି ସେମାନେ ଅଭିଯୋଗ କରିଛନ୍ତି। ସହରରେ ପାନୀୟଜଳ ସମସ୍ୟା ଜଟିଳ ରୂପ ଧାରଣ କରିଥିବାବେଳେ ଏହାର ସମାଧାନ କରିବା ପ୍ରଶାସନ ପାଇଁ ଚ୍ୟାଲେଞ୍ଜ ପାଲଟିଛି।
ଏ ନେଇ ଜନସ୍ବାସ୍ଥ୍ୟ ବିଭାଗ ସହକାରୀ ନିର୍ବାହୀଯନ୍ତ୍ରୀ ଅଲେଖ ବିହାରୀ ପରିଡ଼ା କୁହନ୍ତି, ପାନୀୟଜଳ ପ୍ରକଳ୍ପ ପାଇଁ ୨୦୧୬-୧୭ରେ ସରକାରଙ୍କୁ ୧୬୦ କୋଟି ଟଙ୍କାର ପ୍ରସ୍ତାବ ଦିଆଯାଇଥିଲା। ବ୍ରାହ୍ମଣୀ ନଦୀରେ ଜଳସ୍ତର କମିଚାଲିଛି। ମହାନଦୀରୁ ପାଣି ଅଣାଯାଇପାରିଲେ ସମସ୍ୟା ସମାଧାନ ହୋଇପାରନ୍ତା। ଏ ନେଇ ସରକାରଙ୍କୁ ଅବଗତ କରାଯାଇଛି। ଏହାକୁ କାର୍ଯ୍ୟକାରୀ କରିବା ନେଇ କୌଣସି ନିର୍ଦ୍ଦେଶନାମା ଆସିନାହିଁ ା ଭୂତଳ ଜଳସ୍ତର କମୁଥିବାରୁ ସମସ୍ୟା ଆହୁରି ବଢୁଛି ବୋଲି ସେ ସୂଚନା ଦେଇଛନ୍ତି।
