ବଇଣ୍ଡା,୯।୫(ଡି.ଏନ.ଏ.)-ଆଠମଲ୍ଲିକ ବ୍ଲକ ଠାକୁରଗଡ଼ ଥାନା ତଲେଇପଥର ଗ୍ରାମର ନଥିଲା ଭୋଇଙ୍କ ଏକ ବାଛୁରିକୁ ଶୁକ୍ରବାର ରାତିରେ କଟକ ଜିଲା ମାହାଙ୍ଗା ଥାନା ନିଆଳି ଗ୍ରାମର ଅମରେଶ୍ୱର ବାରିକ ଠେଙ୍ଗାରେ ପିଟିପିଟି ମାରି ଦେଇଥିବା ଶନିବାର ନଥିଲା ଠାକୁରଗ଼ଡ଼ ଥାନାରେ ଅଭିଯୋଗ କରିଛନ୍ତି। ପୋଲିସ ନଂ. ୫୬/୨୦ରେ ଏକ ମାମଲା ରୁଜୁ କରି ଅଭିଯୁକ୍ତ ଅମରେଶ୍ୱରଙ୍କୁ ଗିରଫ କରି ଆଠମଲ୍ଲିକ କୋର୍ଟ ଚାଲାଣ କରିଛି।
ପୋଲିସ କହିଛି, ଅମରେଶ୍ୱର ତାଙ୍କ ସମ୍ପର୍କୀୟ ଚୈତନ୍ୟ ସାହୁଙ୍କ ଘରକୁ ୩ ମାସ ହେବ ବୁଲିବାକୁ ଆସିଥିଲେ। ନଥିଲାଙ୍କ ବାଛୁରି ରାସ୍ତା କଡ଼ରେ ବନ୍ଧା ହୋଇଥିବାବେଳେ କୌଣସି କାରଣରୁ ଅମରେଶ୍ୱର ଉତକ୍ଷିପ୍ତ ହୋଇ ବାଛୁରିକୁ ଠେଙ୍ଗାରେ ଆକ୍ରମଣ କରିଥିଲେ। ଫଳରେ ବାଛୁରିର ମୃତ୍ୟୁ ହୋଇଥିବା ଅଭିଯୋଗପତ୍ରରେ ଦର୍ଶାଯାଇଛି।
