ଅଭିନେତ୍ରୀ କ୍ୟାଟ୍ରିନା କୈଫ୍ ଅପ୍କମିଂ ଫିଲ୍ମ ‘ଭାରତ’କୁ ନେଇ ବହୁତ ଖୁସି। ଫିଲ୍ମଟି ଆସନ୍ତା ଜୁନ୍ ୫ରେ ରିଲିଜ ହେବ। ଫିଲ୍ମର ପ୍ରମୋଶନକୁ ନେଇ କ୍ୟାଟି୍ରିନା ମିଡିଆ ଜରିଆରେ ଫ୍ୟାନମାନଙ୍କ ସହ ସିଧା କଥାବାର୍ତ୍ତା ଚାଲିଛି। ଏହି ସୁଯୋଗରେ କ୍ୟାଟ୍ରିନାଙ୍କୁ ଫିଲ୍ମ ବ୍ୟତୀତ ବିବାହ ସମ୍ପର୍କରେ ପ୍ରଶ୍ନ ପଚାରିଥିଲେ କିଛି ଫ୍ୟାନ। ଏକ ରିପୋର୍ଟ ଅନୁଯାୟୀ, ଫ୍ୟାନମାନଙ୍କ ମଧ୍ୟରୁ ଜଣେ କ୍ୟାଟ୍ରିନାଙ୍କୁ ବିବାହ କରିବାକୁ ଚାହାନ୍ତି ବୋଲି କହିଥିଲେ। ଫ୍ୟାନଙ୍କଠାରୁ ବିବାହ ପ୍ରସ୍ତାବ ପାଇ କ୍ୟାଟ୍ରିନା ଖୁବ୍ ସୁନ୍ଦର ଭାବେ ଉତ୍ତର ଦେଇଥିଲେ। ପ୍ରଶଂସକ ବି ଏହି ଉତ୍ତରକୁ ଖୁବ୍ ତାରିଫ କରିଛନ୍ତି।
ବିବାହ ବିଷୟରେ କ୍ୟାଟ୍ରିନା କୁହନ୍ତି, ଏହା ଏକ ପବିତ୍ର ସମ୍ପର୍କ। ସେ ଏହାକୁ ବିଶ୍ୱାସ କରନ୍ତି। ସେ ଆହୁରି ମଧ୍ୟ କହିଥିଲେ, ପିଲାମାନଙ୍କୁ ମଧ୍ୟ ସେ ଖୁବ୍ ଭଲପାଆନ୍ତି। ତେଣୁ ବିବାହ ପରେ ସେ ଖୁବ୍ଶୀଘ୍ର ମାଆ ହେବାକୁ ଚାହାନ୍ତି। ଏହି ପ୍ରଶ୍ନ ପଚାରିଥିବା ଫ୍ୟାନଜଣକ କ୍ୟାଟ୍ରିନାଙ୍କଠାରୁ ଏପରି ଉତ୍ତର ଶୁଣି ଖୁସିରେ ଫାଟି ପଡ଼ିଥିଲେ। କ୍ୟାଟ୍ରିନା କହିଥିଲେ, ଫ୍ୟାନମାନେ ମୋ ସହ ଏତେ ନିକଟତର ଜାଣି ମୁଁ ବହୁତ ଖୁସି। ମୋ’ ବିବାହ ପାଇଁ ସେମାନେ ଏତେ ଚିନ୍ତା କରୁଛନ୍ତି। କହି ରଖୁଛୁ, କ୍ୟାଟ୍ରିନା ବଲିଉଡ୍ର ସବୁଠୁ ଅଧିକ ପାରିଶ୍ରମିକ ପାଉଥିବା ଅଭିନେତ୍ରୀଙ୍କ ମଧ୍ୟରୁ ଜଣେ। ‘ଭାରତ’ ଫିଲ୍ମରେ ସେ ସଲମାନଙ୍କ ସହ ନଜର ଆସିବେ। ଏହାର ଶୁଟିଂ ଆବୁଧାବି, ସ୍ପେନ୍, ପଞ୍ଜାବ ଏବଂ ଦିଲ୍ଲୀରେ ଶେଷ ହୋଇଛି।
