ଲିଅନ, ୮।୭-ଫିଫା ମହିଳା ବିଶ୍ୱକପ୍ର ଅଷ୍ଟମ ସଂସ୍କରଣରେ ଏଥର ଗତଥରର ଚାମ୍ପିୟନ ଆମେରିକା ବାଜି ମାରିଛି। ଏଠାରେ ରବିବାର ଖେଳାଯାଇଥିବା ଫାଇନାଲ ମ୍ୟାଚ୍ରେ ଆମେରିକା ୨-୦ ଗୋଲରେ ନେଦରଲାଣ୍ଡ୍ସକୁ ହରାଇ ଚାମ୍ପିୟନ ହେବା ସହ ପ୍ରଥମ ଦଳ ଭାବେ ଟାଇଟଲ ବଜାୟ ରଖିଛି। ଏଥିସହିତ ଆମେରିକା ରେକର୍ଡ ଚତୁର୍ଥଥର ପାଇଁ ବିଶ୍ୱକପ୍ ଟାଇଟଲ ଅର୍ଜନ କରିଛି। ପ୍ରଥମାର୍ଦ୍ଧରେ ବେଶ୍ ସଂଘର୍ଷ ଦେଖିତ୍ବାକୁ ମିଳିଥିଲା। ତେବେ ଦ୍ୱିତୀୟାର୍ଦ୍ଧରେ ଆମେରିକା ପ୍ରଭାବ ବିସ୍ତାର କରି ଦୁଇଟି ଗୋଲ ଦେଇଥିଲା। ଦଳ ତରଫରୁ ମେଗାନ ଆନା ରାପିନୋଏ ୬୧ତମ ମିନିଟ୍ରେ ପେନାଲ୍ଟି କର୍ନର ଜରିଆରେ ଗୋଲ ଦେଇ ଦଳକୁ ୧-୦ରେ ଅଗ୍ରଣୀ କରାଇଥିଲେ। ଏହାର ୮ ମିନିଟ୍ ପରେ ୬୯ତମ ମିନିଟ୍ରେ ରୋଜ ଲାଭେଲେ ଆଉ ଏକ ଗୋଲ ଦେଇ ଦଳକୁ ୨-୦ରେ ଅଗ୍ରଣୀ କରାଇଥିଲେ। ବାରମ୍ବାର ପ୍ରୟାସ କରିଥିଲେ ମଧ୍ୟ ନେଦରଲାଣ୍ଡ୍ସ କୌଣସି ଗୋଲ ଦେବାକୁ ସକ୍ଷମ ହୋଇ ନ ଥିଲା। ପୂର୍ବରୁ ଆମେରିକା ୧୯୯୧, ୧୯୯୯, ୨୦୧୫ରେ ଚାମ୍ପିୟନ ହୋଇଥିଲା। ଟୁର୍ନାମେଣ୍ଟରେ ଆମେରିକାର ମେଗାନ ରାପିନୋଏ, ଆଲେକ୍ସ ମୋର୍ଗାନ ଓ ଇଂଲଣ୍ଡର ଏଲେନ ଟୋନୀ ହ୍ବାଇଟ ସର୍ବାଧିକ ୬ଟି ଲେଖାଏ ଗୋଲ ସ୍କୋର କରିଥିଲେ। ମେଗାନ ରାପିନୋଏ ଶ୍ରେଷ୍ଠ ଖେଳାଳି ଓ ନେଦରଲାଣ୍ଡ୍ସର ସାରି ଭାନ ଭିନେନଡାଲ ଶ୍ରେଷ୍ଠ ଗୋଲକିପର ବିବେଚିତ ହୋଇଛନ୍ତି। ଆୟୋଜକ ଫ୍ରାନ୍ସକୁ ଫେୟାର ପ୍ଲେ ପୁରସ୍କାର ପ୍ରଦାନ କରାଯାଇଛି। ଜୁନ ୭ରୁ ଆରମ୍ଭ ହୋଇ ଏହି ବିଶ୍ୱକପ୍ ମାସେ ବ୍ୟାପୀ ଚାଲିଥିଲା ଓ ଜୁଲାଇ ୭ ତାରିଖରେ ଶେଷ ହୋଇଛି। ତୃତୀୟ ସ୍ଥାନ ପାଇଁ ଅନୁଷ୍ଠିତ ମ୍ୟାଚ୍ରେ ସ୍ବିଡେନ ୨-୧ ଗୋଲରେ ଇଂଲଣ୍ଡକୁ ହରାଇଛି। ସ୍ବିଡେନ ତୃତୀୟ ଓ ଇଂଲଣ୍ଡ ଚତୁର୍ଥ ସ୍ଥାନରେ ରହି ଅଭିଯାନ ଶେଷ କରିଛନ୍ତି।
