ନ୍ୟୁୟର୍କ,୨୩।୮(ପିଟି): ଭାରତୀୟ ଟେନିସ ଖେଳାଳି ସୁମିତ ନାଗଲ କ୍ୟାରିୟରର ପ୍ରଥମ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ଖେଳିବାର ନିକଟତର ହୋଇଛନ୍ତି। ୟୁଏସ୍ ଓପନ ଟୁର୍ନାମେଣ୍ଟର କ୍ୱାଲିଫାୟର୍ସରେ ନାଗଲ ଦ୍ୱିତୀୟ ବାଧା ଅତିକ୍ରମ କରିବାରେ ସଫଳ ହୋଇଛନ୍ତି। ବିଶ୍ୱ ର଼୍ୟାଙ୍କିଙ୍ଗ୍ର ୧୯୦ ତମ ସ୍ଥାନରେ ଥିବା ନାଗଲ ୭-୫, ୭-୬(୭/୦) ସେଟ୍ରେ କାନାଡାର ପିଟର ପୋଲାନ୍ସକିଙ୍କୁ ହରାଇ ଦେଇଛନ୍ତି। ବିଜୟ ଲାଗି ତାଙ୍କୁ ୨ ଘଣ୍ଟା ୮ ମିନିଟ୍ ଧରି ସଂଘର୍ଷ କରିବାକୁ ପଡ଼ିଥିଲା। ୨୨ ବର୍ଷୀୟ ହରିୟାଣା ଖେଳାଳି ଫାଇନାଲ କ୍ୱାଲିଫାଇଂ ରାଉଣ୍ଡରେ ୨୧୨ ର଼୍ୟାଙ୍କ ବ୍ରାଜିଲର ଜୋଆ ମେନେଜେସଙ୍କ ସହ ମୁକାବିଲା କରିବେ। ଗତ ବର୍ଷ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ଅଷ୍ଟ୍ରେଲିଆନ ଓପନ, ଫ୍ରେଞ୍ଚ ଓପନ ଓ ଓ୍ବିମ୍ବେଲଡନ ଓପନର ଯୋଗ୍ୟତା ପର୍ଯ୍ୟାୟରେ ଖେଳିଥିଲେ। ହେଲେ କୌଣସି ଥର ପ୍ରଥମ ମୁକାବିଲାକୁ ଜିତିବାକୁ ସକ୍ଷମ ହୋଇ ନ ଥିଲେ। ଏହା ବ୍ୟତୀତ ଦେଶର ଏକମାତ୍ର ସିଙ୍ଗଲ୍ସ ଖେଳାଳି ଭାବେ ପ୍ରଜନେଶ ଗୁଣେଶ୍ୱରନ ସିଧାସଳଖ ୟୁଏସ୍ ଓପନ ମୁଖ୍ୟ ପର୍ଯ୍ୟାୟରେ ଖେଳିବାକୁ ଯାଉଛନ୍ତି। ସେ ପ୍ରଥମ ରାଉଣ୍ଡରେ ୫ମ ସିଡ୍ ଡାନିଏଲ ମେଡଭେଡେଭଙ୍କ ସହ ମୁକାବିଲା କରିବେ।
