ହାଇଦ୍ରାବାଦ,୨୩ା୭(ପି.ଟି.):
ପ୍ରୋ-କବାଡି ଲିଗ୍ର ସିଜନ୍-୭ରେ ଜୟପୁର ପାନ୍ଥର୍ସ ଓ ହରିୟାଣା ଷ୍ଟିଲର୍ସ ବିଜୟରୁ ଅଭିଯାନ ଆରମ୍ଭ କରିଛନ୍ତି। ସ୍ଥାନୀୟ ଗାଚିବାଓ୍ବଲି ଇନ୍ଡୋର ଷ୍ଟାଡ଼ିୟମରେ ସୋମବାର ଅନୁଷ୍ଠିତ ପ୍ରଥମ ମ୍ୟାଚରେ ଜୟପୁର ଟିମ ୟୁ ମୁମ୍ବା ବିପକ୍ଷରେ ବଡ଼ ବିଜୟ ହାସଲ କରିଛି। ଏହି ମ୍ୟାଚକୁ ଜୟପୁର ୪୨-୨୩ ପଏଣ୍ଟରେ ବିଜୟୀ ହୋଇଥିଲା। ବିଜୟୀ ଦଳ ପକ୍ଷରୁ ଦୀପକ ହୁଦା ସୁପର-୧୦ ପଏଣ୍ଟ ହାସଲ କରିଥିବାବେଳେ ଦୀପକ ନରଓ୍ବାଲ ଓ ନିତିନ ରାଓ୍ବଲ ଦଳ ପାଇଁ ଯଥାକ୍ରମେ ୬ ଓ ୭ ପଏଣ୍ଟ ହାସଲ କରିଥିଲେ। ୟୁ ମୁମ୍ବା ଏହି ମ୍ୟାଚରେ ଟ୍ୟାକେଲରେ ଦୁର୍ବଳ ରହିଥିଲା। ସେହିପରି ଦିନର ଦ୍ୱିତୀୟ ମ୍ୟାଚରେ ହରିୟାଣା ଷ୍ଟିଲର୍ସ ୩୪-୨୪ ପଏଣ୍ଟରେ ପୁନେରୀ ପଲଟନ୍କୁ ପରାସ୍ତ କରିଛି। ଏହି ମ୍ୟାଚରେ ହରିୟାଣା ପକ୍ଷରୁ ନବୀନ ସର୍ବାଧିକ ୧୪ ପଏଣ୍ଟ ପାଇ ସୁପର ଟେନ ହାସଲ କରିଥିଲେ। ନବୀନ ରେଡ୍ରୁ ୧୨ ଓ ଟ୍ୟାକେଲରୁ ୨ ପଏଣ୍ଟ ହାସଲ କରିଥିଲେ। ଅନ୍ୟପକ୍ଷରେ ପୁନେରୀ ପଲଟନ୍ ପକ୍ଷରୁ ପଓ୍ବନ କୁମାର କାଦିଆନ ୮ ରେଡ୍ ପଏଣ୍ଟ ଓ ୨ଟି ବୋନସ୍ ପଏଣ୍ଟ ସହ ମୋଟ ୧୦ ପଏଣ୍ଟ ପାଇ ସୁପର ଟେନ୍ ହାସଲ କରିଥିଲେ।
