ଚିତ୍ରକୋଣ୍ଡା,୨୬।୮(ଡି.ଏନ୍.ଏ.): ମାଲକାନଗିରି ଜିଲା ଚିତ୍ରକୋଣ୍ଡା ବିଚ୍ଛିନ୍ନାଞ୍ଚଳବାସୀ ୨ ଦିନ ଧରି ଆନ୍ଦୋଳନ କରିବା ପରେ ପ୍ରଶାସନିକ ଅଧିକାରୀମାନେ ଆନ୍ଦୋଳନସ୍ଥଳରେ ପହଞ୍ଚି ସମସ୍ୟା ଉପରେ ଆଲୋଚନା କରି ପ୍ରତିଶ୍ରୁତି ଦେବାରୁ ଆନ୍ଦୋଳନ ହଟିଛି। ସୂଚନା ଯେ, ଲାଲ କରଡ଼ି ପାଣି ଘେରା ପାହାଡ଼ ଭିତରେ ବାହ୍ୟଜଗତରୁ ବିଚ୍ଛିନ୍ନ ହୋଇ ରହୁଥିବା ୫ଟି ପଞ୍ଚାୟତର ଲୋକମାନେ ମୌଳିକ ସୁବିଧାରୁ ବଞ୍ଚିତ ହେବା ନେଇ ଚିତ୍ରକୋଣ୍ଡା ସ୍ପିଲବାଇ ଲଞ୍ଚଘାଟଠାରେ ଗଣଧାରଣା ଦେଇଥିଲେ। ସୋମବାର ପ୍ରଶାସନ ପକ୍ଷରୁ ଉପ-ଜିଲାପାଳ ରାମେଶ୍ୱର ପ୍ରଧାନ, ଜିଲା ଆରକ୍ଷୀ ଅଧ୍ୟକ୍ଷ ଋଷିକେଶ ଖିଲାର, ଚିତ୍ରକୋଣ୍ଡା ତହସିଲଦାର ଟି. ପଦ୍ମନାଭ ଦୋରା, ବିଡିଓ ଲରିମନ ଖରସେଲ, ଏସ୍ଡିପି ମାନସ ରଞ୍ଜନ ବାରିକ ଓ ସିଡିପିଓ ଅନ୍ନପୂର୍ଣ୍ଣା ବୁରିଦା, ମାଲକାନଗିରି ଥାନାଧିକାରୀ ରାମ ପ୍ରସାଦ ନାଗ, ଚିତ୍ରକୋଣ୍ଡା ଥାନାଧିକାରୀ ଯୁଗଳ ଶବର, ପାପରମେଟଲା ଓଆଇସି ଲଷ୍ମୀନାରାୟଣ ମୁଦୁଲିଙ୍କ ସମେତ ଜିଲାର ବହୁ ବିଭାଗୀୟ ଅଧିକାରୀ ଘଟଣାସ୍ଥଳରେ ଉପସ୍ଥିତ ରହି ବିଚ୍ଛିନ୍ନାଞ୍ଚଳର ଆଦିବାସୀ ନେତା ଘନଶ୍ୟାମ ମାଡକାମୀ, ସୋନୁ ଏନୁଗ, ଘେନୁ ମୁଦୁଲି ଓ ପଦୁ ମାଝିଙ୍କ ସହ ଆଲୋଚନା କରିଥିଲେ। ଚିତ୍ରକୋଣ୍ଡା ଲଞ୍ଚଘାଟଠାରେ ଆସନ୍ତା ନଭେମ୍ବର ୧୦ ତାରିଖରେ ବସି ଉନ୍ନୟନମୂଳକ କାର୍ଯ୍ୟ ପ୍ରଗତି ଉପରେ ଆଲୋଚନା କରାଯିବ ବୋଲି ନିଷ୍ପତ୍ତି ପରେ ଅଞ୍ଚଳବାସୀ ଆନ୍ଦୋଳନରୁ ଓହରିଛନ୍ତି। ଅନ୍ୟପକ୍ଷରେ ଦାବିଗୁଡିକ ପୂରଣ ନ ହେଲେ ପୁଣି ଆଦିବାସୀମାନେ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।
