ନୂଆଦିଲ୍ଲୀ, ୪-୯: ଘରୋଇ ବଜାରରେ ବାଣିଜ୍ୟ ସମସ୍ୟା ଏବଂ ଅର୍ଥନୈତିକ ମାନ୍ଦାବସ୍ଥାର ପ୍ରଭାବ ପୁଞ୍ଜି ବଜାର ଉପରେ ପରିଲକ୍ଷିତ ହୋଇଛି। ଏଭଳି ପ୍ରମୁଖ କାରଣ ଲାଗି ମଙ୍ଗଳବାର ଦେଶର ପୁଞ୍ଜି ବଜାର ଗଭୀର ଭାବେ ପ୍ରଭାବିତ ହୋଇଛି। ଏହି ସମୟରେ ନିବେଶକମାନେ ୨.୫୫ ଲକ୍ଷ କୋଟି ଟଙ୍କା କ୍ଷତି ସହିଛନ୍ତି। ଏହି ସମୟରେ ବମ୍ବେ ଷ୍ଟକ ଏକ୍ସଚେଞ୍ଜର ସୁଚକାଙ୍କ ୭୬୯.୮୮ ପଏଣ୍ଟ(୨.୦୬) ପଏଣ୍ଟ ହ୍ରାସ ଘଟି ୩୬,୫୬୨.୯୧ ପଏଣ୍ଟରେ କାରବାର ବନ୍ଦ ହୋଇଛି। ଏହି ସମୟରେ ବିଏସ୍ସି ସୂଚୀଭୁକ୍ତ କମ୍ପାନୀଗୁଡିକର ବଜାର ପୁଞ୍ଜିକରଣ ୨.୫୫ ଲକ୍ଷ କୋଟି ଟଙ୍କା ଖସିଯିବା ଫଳରେ ଏହା ୧.୩୮ ଲକ୍ଷ କୋଟି ଟଙ୍କାକୁ ହ୍ରାସ ଘଟିଛି।
ଦେଶରେ ଅଟୋମୋବାଇଲ କ୍ଷେତ୍ରରେ ବିକ୍ରି ହ୍ରାସ ହେବା ନେଇ ନିକଟରେ ରିପୋର୍ଟ ଆସିଛି। ପ୍ରାୟ ସବୁ ଯାନ କମ୍ପାନୀର ବିକ୍ରି ହ୍ରାସ ଘଟିଛି। ଏହାବାଦ ଦେଶର ଜିଡିପି ଅଭିବୃଦ୍ଧି ଆଶା ଠାରୁ କମ୍ ରହିଛି। ଏହା ଏପ୍ରିଲ-ଜୁନ ତ୍ରୈମାସରେ ୫% ଖସିଛି। ବଜାରରେ ମାନ୍ଦାବସ୍ଥା ଘନାଉଥିବା ଏହାର ପ୍ରତିଫଳନ ବୋଲି ନିବେଶକ ମାନେ ଆଶଙ୍କା କରୁଛନ୍ତି। ବିତ୍ତିୟ ଏବଂ ମୁଦ୍ରାନୀତି କ୍ଷେତ୍ରରେ ସରକାର ବିଭିନ୍ନ ପଦକ୍ଷେପ ନେବାର ଆବଶ୍ୟକତା ରହିଥିବା ବଜାର ବିଶେଷଜ୍ଞମାନେ ମତ ପୋଷଣ କରିଛନ୍ତି। ଅର୍ଥମନ୍ତ୍ରୀ ନିର୍ମଳା ସୀତାରାମନ ନିକଟରେ ଘୋଷଣା କରିଥିବା ବିଭିନ୍ନ ପଦକ୍ଷେପ ବଜାରର ମାନ୍ଦାବସ୍ଥା ବିରୋଧରେ ଲଢେଇ କରିବାକୁ ସକ୍ଷମ ହେବ ବୋଲି ବିଶେଷଜ୍ଞ ଆଶା କରିଛନ୍ତି। ମାତ୍ର ସ୍ଥିତି ଜଟିଳ ଥିବାରୁ ଏହାକୁ ଟାଳିବା ଲାଗି ଅଧିକ ସକ୍ରିୟ ଭାବେ କାର୍ଯ୍ୟାନୁଷ୍ଠାନ ନେବାର ଆବଶ୍ୟକତା ରହିଥିବା ସେମାନେ ମତ ଦେଇଛନ୍ତି।
ଆମେରିକା-ଚାଇନା ବାଣିଜ୍ୟ ଯୁଦ୍ଧ ଏବେ ଘନୀଭୂତ ହୋଇଥିବା ବେଳେ ଏହା ଅନ୍ୟ ଦେଶର ଅର୍ଥନୀତି ଉପରେ ପ୍ରଭାବ ପକାଉଥିବା ଆକ୍ସିସ ସିକ୍ୟୁରିଟିଜର ଏମ୍ଡି ତଥା ସିିଇଓ ଅରୁଣ ଠୁକରାଲ କହିଛନ୍ତି। ସେନସେକ୍ସର ୩୦ ସେୟାର ବାସ୍କେଟ ମଧ୍ୟରେ ୨୮ଟି କ୍ଷତି ସହିଛି। ଆଇସିଆଇସିଆଇ ବ୍ୟାଙ୍କ, ଟାଟା ଷ୍ଟିଲ, ବେଦାନ୍ତ, ଏଚ୍ଡିଏଫସି ବ୍ୟାଙ୍କ, ଇଣ୍ଡସଇଣ୍ଡ ବ୍ୟାଙ୍କ ଏବଂ ଟାଟା ମୋଟର୍ସର ପୁଞ୍ଜି ବଜାର କାରବାର ପ୍ରାୟ ୪.୪୫% ହ୍ରାସ ଘଟିଛି। ବିଏସ୍ଇର ୧୬୧୩ ସଂସ୍ଥାଙ୍କ ଶେୟାର ହ୍ରାସ ଘଟିଛି। ଏହାବାଦ ୮୧୭ର କାରବାର ଉନ୍ନତ ସ୍ଥିତିରେ ରହିଥିବା ୧୭୮ର କାରବାର ଅପରିବର୍ତ୍ତିତ ରହିଛି। ଏହା ମଧ୍ୟରେ ମଙ୍ଗଳବାର ୨୦୦ରୁ ଅଧିକ ଷ୍ଟକ ୫୨ ସପ୍ତାହର ନିମ୍ନରେ ରହିଛି। ଜିଡିପି ଅଭିବୃଦ୍ଧି ହ୍ରାସ, ପ୍ରମୁଖ କ୍ଷେତ୍ର ଅଭିବୃଦ୍ଧି ମନ୍ଥର ହେବା ଯୋଗୁ ବଜାର ଉପରେ ଏହାର ପ୍ରଭାବ ରହିଛି। ଆମେରିକା-ଚାଇନା ଭଳି ଦେଶ ଉଭୟେ ଉଭୟଙ୍କ ଉପରେ ଟାରିଫ ଲାଗୁ କରିବା ଯୋଗୁ ଏହା ବିଶ୍ୱ ବଜାରର ସ୍ଥିତିକୁ ଦୋହଲାଇ ଦେଇଛି। ଏପରି ସ୍ଥିତିରେ ବିଏସ୍ଇର ମିଡ୍ କ୍ୟାପ ଏବଂ ସ୍ମଲ କ୍ୟାପ ସୂଚୀ ପ୍ରାୟ ୧.୬୫% ନିମ୍ନରେ ରହିଛି। ଇଣ୍ଟ୍ରା ଡେ କାରବାରରେ ଡଲାର ତୁଳନାରେ ଟଙ୍କା ୯୦ ପଇସା ହ୍ରାସ ଘଟିଛି।