କାକଟପୁର, ୨।୭(ଡି.ଏନ୍.ଏ.): ରଥଯାତ୍ରାକୁ ଆଉ ରହିଲା ୨ଦିନ। ମଙ୍ଗଳବାର ନେତ୍ରୋତ୍ସବ ଥିବାବେଳେ ବୁଧବାର ନବଯୌବନ ଦର୍ଶନ। ଗୁରୁବାର ଶ୍ରୀଜୀଉମାନେ ରଥାରୁଢ଼ ହୋଇ ବଡ଼ଦାଣ୍ଡରେ ଭକ୍ତମାନଙ୍କୁ ଦର୍ଶନ ଦେବେ। ପ୍ରାୟ ସବୁଠି ଠାକୁରମାନେ ରଥକୁ ପହଣ୍ଡି ହୋଇ ଆସୁଥିବାବେଳେ ପ୍ରାଚୀ ଉପତ୍ୟକାର ତୁଳସୀପୁର ଗ୍ରାମରେ ଅନୁଷ୍ଠିତ ରଥଯାତ୍ରାରେ ଠାକୁରମାନେ ପାଲିଙ୍କିରେ ଆସିଥାନ୍ତି। ଏଠାରେ ଅନୁଷ୍ଠିତ ରଥଯାତ୍ରାରେ ରଥାରୁଢ଼ ହୁଅନ୍ତି ବନ୍ଧେଶ୍ୱର ଗ୍ରାମରେ ପୂଜା ପାଉଥିବା ଶ୍ରୀଗୁରୁଦେବ। ପ୍ରାଚୀ ନଦୀକୂଳରେ ବନ୍ଧେଶ୍ୱର ଗ୍ରାମରେ ରହିଛି ଶ୍ରୀଗୁରୁଦେବଙ୍କ ମନ୍ଦିର। ଏଠାରେ ବର୍ଷଯାକ ଠାକୁର ପୂଜାପାଉଥିବାବେଳେ ରଥଯାତ୍ରା ଦିନ ୪କିମି ଦୂର ତୁଳସୀପୁରକୁ ପାଲିଙ୍କିରେ ଯାଇ ରଥାରୁଢ଼ ହୋଇଥାନ୍ତି।
ଶ୍ରୀଗୁଣ୍ଡିଚା ତିଥିରେ ତୁଳସୀପୁର ଗ୍ରାମବାସୀମାନେ ପହଞ୍ଚତ୍ଥାନ୍ତି ବନ୍ଧେଶ୍ୱର ଗ୍ରାମରେ। ପୂଜକ କୈଳାସ ପାଣି ଠାକୁରଙ୍କୁ ସ୍ନାନ, ମାର୍ଜଣା ନୀତି କରିବାପରେ ଅନ୍ନପ୍ରସାଦ ଭୋଗ ଲାଗି କରିଥାନ୍ତି। ପରେ ତୁଳସୀପୁର ଗ୍ରାମବାସୀ ପ୍ରସାଦ ସେବନକରି ଠାକୁରଙ୍କୁ ନବବସ୍ତ୍ର, ପୁଷ୍ପମାଲ୍ୟ ପିନ୍ଧାଇ ଏକ ସୁସଜ୍ଜିତ ପାଲିଙ୍କିରେ ବସାଇ ଶୋଭାଯାତ୍ରାରେ ନିଜ ଗ୍ରାମକୁ ଆଣି ରଥାରୁଢ଼ କରିଥାନ୍ତି। ପରେ ରଥଟଣା ଆରମ୍ଭ ହୋଇଥାଏ। ଠାକୁର ଘରଘର ଭୋଗ ଖାଇ ସନ୍ଧ୍ୟାରେ ଗୁଣ୍ଡିଚାମନ୍ଦିରରେ ପହଞ୍ଚତ୍ଥାନ୍ତି। ସେଠାରେ ବାହୁଡ଼ା ଯାତ୍ରା ପର୍ଯ୍ୟନ୍ତ ଗ୍ରାମବାସୀ ପାଳିକରି ପ୍ରତ୍ୟେକ ଦିନ କ୍ଷିରି ଭୋଗ ଲାଗିକରିଥାନ୍ତି। ଶ୍ରୀଗୁଣ୍ଡିଚାଠାରୁ ବାହୁଡ଼ା ପର୍ଯ୍ୟନ୍ତ ଗ୍ରାମବାସୀ ଆମିଷ ରୋଷେଇ କରି ନ ଥାନ୍ତି। ବାହୁଡ଼ା ପରେ ରଥ ଉପରେ ଯଥାବିଧି ଠାକୁରଙ୍କ ସୁନାବେଶ, ଅଧରପଣା ନୀତି ଅନୁଷ୍ଠିତ ହେବାପରେ ନିଳାଦ୍ରୀବିଜେ ଦିନ ଗ୍ରାମବାସୀ ଠାକୁରଙ୍କୁ ପୁଣି ପାଲିଙ୍କିରେ ବସାଇ ଶୋଭାଯାତ୍ରାରେ ବନ୍ଧେଶ୍ୱର ଗ୍ରାମକୁ ନେଇ ସ୍ବ ମନ୍ଦିରକୁ ପ୍ରବେଶ କରାଇଥାନ୍ତି। ଠାକୁରଙ୍କ ପାଖରେ ଅନ୍ନ ପ୍ରସାଦ ଲାଗିହେବାପରେ ଗ୍ରାମବାସୀ ଫେରିଥାନ୍ତି। ଏ ସମ୍ପର୍କରେ ଗ୍ରାମବାସୀ କୈଳାସ ତ୍ରିପାଠୀ କୁହନ୍ତି, ଗଁା ଗଁା ଭିତରେ ରହିଥିବା ଭାତୃଭାବକୁ ଉଜ୍ଜିବୀତ ରଖିବାପାଇଁ ଏହି ଯାତ୍ରା ଚାଲି ଆସୁଛି। କ୍ଷମାନିଧି ତ୍ରିପାଠୀ କୁହନ୍ତି, ଶ୍ରୀଗୁରୁଦେବ ଠାକୁରଙ୍କ ସ୍ବପ୍ନାଦେଶ ପାଇ ଗ୍ରାମର ତତ୍କାଳୀନ ଜମିଦାର ଏହି ରଥଯାତ୍ରା ପ୍ରାରମ୍ଭ କରିଥିଲେ। ସେବେଠୁ ଆଜି ପର୍ଯ୍ୟନ୍ତ ଏହା ଚାଲିଆସୁଛି।
