ପାରାଦୀପ,୧୯ା୧(ସ୍ବ.ପ୍ର.): ପାରାଦୀପ ମାଛଧରା ବନ୍ଦର ପରିସରରେ ଶନିବାର ମତ୍ସ୍ୟଜୀବୀଙ୍କ ଏକ ମହା ସମାବେଶ ଅନୁଷ୍ଠିତ ହୋଇଛି। ଏଥିରେ ମୁଖ୍ୟଅତିଥିଭାବେ କୃଷି, ମତ୍ସ୍ୟ ଓ ପଶୁପାଳନ ମନ୍ତ୍ରୀ ଅରୁଣ କୁମାର ସାହୁ ଯୋଗଦେଇ କହିଥିଲେ, ମତ୍ସ୍ୟଜୀବୀଙ୍କ ସମସ୍ୟା ସମ୍ପର୍କରେ ମୁଁ ପୂର୍ବରୁ ଅବଗତ ଅଛି। ବିଭାଗୀୟ ମନ୍ତ୍ରୀ ହିସାବରେ ଏଠାକୁ ଆସିଛି। ଆଗକୁ ମତ୍ସ୍ୟଜୀବୀଙ୍କ ସମସ୍ୟା ସମାଧାନ ପାଇଁ ଜିଲାର ଏମ୍ପି, ବିଧାୟକ ଓ ମନ୍ତ୍ରୀଙ୍କୁ ନେଇ ଏକ କମିଟି ଗଠନ କରାଯିବ। ଏହି କମିଟି ମାଧ୍ୟମରେ ମତ୍ସ୍ୟଜୀବୀଙ୍କ ସମସ୍ୟାର ସମାଧାନ କରାଯିବ। କମିଟି ଗଠନ ପରେ ଆମେ ବୈଷୟିକ ଅଧିକାରୀଙ୍କୁ ନେଇ ଆସନ୍ତା ଫେବୃୟାରୀରେ ପୁଣି ଥରେ ଆସିବୁ। ରାଜ୍ୟର ୧୦ରୁ ୧୨ ଲକ୍ଷ୍ୟ ମତ୍ସ୍ୟଜୀବୀଙ୍କ ପାଇଁ ମୁଖ୍ୟମନ୍ତ୍ରୀ ସ୍ବତନ୍ତ୍ର ପ୍ୟାକେଜ ଘୋଷଣା କରିଛନ୍ତି। ସେହି ମଧ୍ୟରେ ପାରାଦୀପ ସମସ୍ୟାକୁ ସହୃଦୟତାର ସହ ସମାଧାନ କରାଯିବ ବୋଲି ପ୍ରକାଶ କରିଥିଲେ। ସମ୍ମାନିତ ଅତିଥିଭାବେ କ୍ରୀଡ଼ା ମନ୍ତ୍ରୀ ତୁଷାରକାନ୍ତି ବେହେରା, ଜଳସମ୍ପଦ ମନ୍ତ୍ରୀ ରଘୁନନ୍ଦନ ଦାସ, ଏମ୍ପି ରାଜଶ୍ରୀ ମଲିକ, ବିଧାୟକ ସମ୍ବିତ ରାଉତରାୟ, ଅଖିଳ ଓଡ଼ିଶା ମତ୍ସ୍ୟ ଉତ୍ପାଦକ ମହାସଂଘ ସଭାପତି କାମେଶ୍ୱର ନାରାୟଣ ପ୍ରହରାଜ ପ୍ରମୁଖ ଯୋଗ ଦେଇଥିଲେ। ଓମ୍ଫା ସଭାପତି ସୁମନ୍ତ ବିଶ୍ୱାଳଙ୍କ ଅଧ୍ୟକ୍ଷତାରେ ଆୟୋଜିତ ବୈଠକରେ ମାଛଧରା ବନ୍ଦରର ବହୁବିଧ ସମସ୍ୟା ସମ୍ପର୍କରେ ମନ୍ତ୍ରୀଙ୍କୁ ଏକାଧିକ ସଂଗଠନ ପକ୍ଷରୁ ଅବଗତ କରାଯାଇଥିଲା। ଓଡ଼ିଶା ପାରମ୍ପରିକ ମତ୍ସ୍ୟ ୟୁନିୟନ ସଭାପତି ପ୍ରସନ୍ନ ବେହେରା ମତ୍ସ୍ୟଜୀବୀଙ୍କ ସମସ୍ୟା, ଟ୍ରଲର ଶିଳ୍ପରେ ବ୍ୟବହାର ହେଉଥିବା ଇଞ୍ଜିନ କ୍ଷମତାକୁ ଅପବ୍ୟବହାର କରାଯାଉଥିବା ପ୍ରସଙ୍ଗ, ସମୁଦ୍ରରେ ମୃତ୍ୟୁବରଣ କରୁଥିବା ମତ୍ସ୍ୟଜୀବୀଙ୍କୁ ରାଜ୍ୟ ସରକାରଙ୍କ ପକ୍ଷରୁ ଘୋଷଣା କରାଯାଇଥିବା ୪ଲକ୍ଷ ଟଙ୍କା ନ ମିଳିବା, ଓଡ଼ିଶାରୁ ଉତ୍ପାଦିତ ୭.୫୦ ମେଟ୍ରିକ ଟନ୍ ମାଛ ପାଇଁ ନିଜସ୍ବ ସୁପର ବଜାର ହଳଦିଆଠାରେ କରିବା, ହାଇଜେନିକ୍ମୁକ୍ତ ଶୁଖୁଆ ତିଆରି କରିବା, ସାମୁଦ୍ରିକ ମତ୍ସ୍ୟ କଟକଣା ସମୟରେ ସମସ୍ତ ମତ୍ସ୍ୟଜୀବୀଙ୍କୁ ସରକାରୀ ସହାୟତା, ଡିଜେଲ ମୂଲ୍ୟରେ ସବ୍ସିଡ୍, ନୋଳିଆ ମତ୍ସ୍ୟଜୀବୀଙ୍କ ପାଇଁ ସ୍ବତନ୍ତ୍ର ବର୍ଥ, ଜଳାଶୟ, ଫନୀ ବାତ୍ୟା କ୍ଷତିଗସ୍ତ ହୋଇଥିବା ମହାନଦୀ ଅତଡ଼ାକୁ ମରାମତି କରିବା ପ୍ରସଙ୍ଗ ଉଠାଇଥିଲେ। ସମାନ ପ୍ରସଙ୍ଗରେ ବିଧାୟକ ରାଉତରାୟ ଓ ଏମ୍ପି ମଲିକ ମନ୍ତ୍ରୀ ସାହୁଙ୍କ ଦୃଷ୍ଟି ଆକର୍ଷଣ କରିଥିଲେ। ମନ୍ତ୍ରୀ ବେହେରା କହିଥିଲେ, ସବୁକିଛି ସରକାରଙ୍କ ଉପରେ ଛାଡ଼ିଲେ ଚଳିବ ନାହିଁ। କିଛି କାମ ମତ୍ସ୍ୟ କମ୍ୟୁନିଟି କରିବାକୁ ପଡ଼ିବ। ଏହି ଅବସରରେ ଓଡ଼ିଶା ସାମୁଦ୍ରିକ ମତ୍ସ୍ୟ ଉତ୍ପାଦକ ସଂଘ (ଓମ୍ଫା)ର ପ୍ରାକ୍ତନ ସଭାପତି ସ୍ବର୍ଗତ ତରୁଣ ପଟ୍ଟନାୟକଙ୍କ ଅର୍ଦ୍ଧ ଅବୟବ ପ୍ରତିମୂର୍ତ୍ତି ଅନାବରଣ କରାଯାଇଥିଲା। ଶେଷରେ ସଂଘ ସମ୍ପାଦକ ସୁବାସ ରାଉତ ଧନ୍ୟବାଦ ଦେଇଥିଲେ।
