ନାଉଗାଁ,୧୯ା୧(ସ୍ବ.ପ୍ର.): ଘରୋଇ କଳହକୁ ନେଇ ଶନିବାର ଜଗତ୍ସିଂହପୁର ଜିଲା ନାଉଗାଁ ଥାନା ଅନ୍ତର୍ଗତ ହରିଶପୁର ଗ୍ରାମରେ ସାନ ଭାଇ ମଝିଆ ଭାଇଙ୍କୁ ଶିଳପୁଆରେ ଛେଚି ହତ୍ୟା କରିଛନ୍ତି। ଏନେଇ ଥାନାରେ ବଡ଼ଭାଇଙ୍କ ସ୍ତ୍ରୀ ଅଭିଯୋଗ କରିଛନ୍ତି। ପୋଲିସ ଏକ ମାମଲା ରୁଜୁ କରିବା ସହ ସାନଙ୍କୁ ଥାନାରେ ଅଟକ ରଖି ତଦନ୍ତ ଆରମ୍ଭ କରିଛି। ଏହି ଘଟଣା ଅଞ୍ଚଳରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି।
ବଡ଼ଭାଇ ପ୍ରମୋଦ ରାଉଳଙ୍କ ସ୍ତ୍ରୀ ଝୁନିଲତା ଥାନାରେ ଦେଇଥିବା ଅଭିଯୋଗରେ ଦର୍ଶାଇଛନ୍ତି, ସକାଳେ ତଙ୍କ ସାନ ଦିଅର ସୁକାନ୍ତ ଓ ମଝିଆ ଦିଅର ହେମନ୍ତଙ୍କ ପରିବାର ମଧ୍ୟରେ ଝଗଡା ହୋଇଥିଲା। ଏହାର କିଛି ସମୟ ପରେ ସୁକାନ୍ତ ଘରେ ଥିବା ସମସ୍ତ ଜିନିଷ ଆଣି ବାଡି ପଛପଟେ ରଖି ଏଥିରେ କେହି ଲାଗିବ ନାହିଁ ବୋଲି କହିଥିଲୋ। ଏହି ସମୟରେ ହେମନ୍ତ ଘରେ ଶୋଇଥିଲେ। ଏହାଶୁଣି କାହିଁକି ପାଟି କରୁଛୁ ବୋଲି ତାଙ୍କୁ ପଚାରିଥିଲେ। ଏଥିରେ ସୁକାନ୍ତ ଉତ୍ତ୍ୟକ୍ତ ହୋଇ ବାରିପଟେ ଥିବା ଏକ ଶିଳପୁଆ ଆଣି ହେମନ୍ତଙ୍କ ମୁଣ୍ଡକୁ ଛେଚି ଦେଇଥିଲେ। ସେ ଦୌଡି ପଳାଇ ଯାଉଥିବା ସମୟରେ ସୁକାନ୍ତ ତାଙ୍କୁ ଧକ୍କା ମାରି ତଳେ ପକାଇଥିଲେ। ତଳେ ପଡି ଯିବା ପରେ ହେମନ୍ତ ଚେତାଶୂନ୍ୟ ହୋଇଯାଇଥିଲେ। ତାଙ୍କୁ ନାଉଗାଁ ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଅଭିଯୋଗ ପାଇବା ପରେ ଥାନାଧିକାରୀ ପ୍ରଜ୍ଞା ରିତାମ୍ବର କର ପହଞ୍ଚତ୍ ଏହାର ତଦନ୍ତ କରିଛନ୍ତି। ଏନେଇ ଏକ ମାମଲା ନଂ-୧୨/୨୦ରୁଜୁ ହୋଇଛି। ମୃତଦେହକୁ ପୋଲିସ ଜବତ କରି ବ୍ୟବଚ୍ଛେଦ ନିମନ୍ତେ ଜଗତସିଂହପୁର ମୁଖ୍ୟ ଚିକିତ୍ସାଳୟକୁ ପଠାଇଛି।
