ଭୁବନେଶ୍ୱର,୨୨ା୪(ବ୍ୟୁରୋ)
କରୋନା ସଂକ୍ରମଣ ଭୟ କେତେକ ଖରାପ ଅଭ୍ୟାସ ଛାଡିବାକୁ ମଣିଷକୁ ବାଧ୍ୟ କରିଛି। ଛେପ ଓ ଖଙ୍କାର ଦ୍ୱାରା ଏହି ଭୂତାଣୁ ସଂକ୍ରମଣର ଆଶଙ୍କା ରହିଛି। ସର୍ବସାଧାରଣ ସ୍ଥାନରେ ଛେପ ନ ପକାଇବାକୁ ଜନସାଧାରଣଙ୍କୁ ରାଜ୍ୟ ସରକାର ତାଗିଦ କରିଛନ୍ତିି। ମାତ୍ର ସରକାରୀ କର୍ମଚାରୀମାନେ ପାନ ଓ ଗୁଟ୍ଖା ଖାଇ ଛେପ ପକାଉଛନ୍ତି। ଏ ନେଇ ବିଧାନସଭା ବାଚସ୍ପତି ସୂର୍ଯ୍ୟ ନାରାୟଣ ପାତ୍ର ମଧ୍ୟ ବିଧାନସଭା କର୍ମଚାରୀଙ୍କୁ ସତର୍କ କରାଇ ଦେଇଛନ୍ତି। ବିଧାନସଭା ପରିସରରେ ଯଦି କୌଣସି କର୍ମଚାରୀ ପାନ, ସୁପାରି କିମ୍ବା ଗୁଟ୍ଖା ଛେପ ପକାଇବେ ସେଥିପାଇଁ ସେମାନଙ୍କୁ ଆର୍ଥିକ ଦଣ୍ଡରେ ଦଣ୍ଡିତ କରାଯିବ। ମଙ୍ଗଳବାର ବାଚସ୍ପତି ଏଭଳି କଡା ନିର୍ଦ୍ଦେଶ ଦେଇଛନ୍ତି। ଏପ୍ରିିଲ ୨୦ରୁ ବିଧାନସଭାକୁ ସମସ୍ତ ଗ୍ରୁପ-ଏ ଏବଂ ୫୦ ପ୍ରତିଶତ ଗ୍ରୁପ୍-ବି,ସି ଓ ଡି କର୍ମଚାରୀଙ୍କୁ କାର୍ଯ୍ୟରେ ଯୋଗ ଦେବାକୁ ନିର୍ଦ୍ଦେଶ ଦିଆଯାଇଛି। ଅଫିସରେ ଅନେକ କର୍ମଚାରୀ ପାନ ଓ ଗୁଟ୍ଖା ଖାଇ ଏଣେତେଣେ ଛେପ ପକାଉଛନ୍ତି। ଏହାଦ୍ୱାର ବିଧାନସଭା ବାତାବରଣ ଖରାପ ହେଉଛି। କର୍ମଚାରୀଙ୍କ ଉପରେ କଡା ନଜର ରଖିବାକୁ ବାଚସ୍ପତି ନିର୍ଦ୍ଦେଶ ଦେଇଛନ୍ତି। ଏଥିସହିତ ବିଧାନସଭା ପରିସରରେ ଏକ ନିୟନ୍ତ୍ରଣ କକ୍ଷ ଖୋଲିବାକୁ ନିଷ୍ପତ୍ତି ହୋଇଛି। ନିଜ ନିର୍ବାଚନ ମଣ୍ଡଳୀର ଯଦି କୌଣସି ଲୋକ ଅନ୍ୟ ରାଜ୍ୟରେ ଥିବେ ତେବେ ସେମାନଙ୍କର ସମସ୍ତ ବିବରଣୀ ବିଧାୟକମାନେ ଏଠାରେ ଦେଇ ପାରିବେ। ଏହାଦ୍ୱାରା ଲୋକ ସଭା ବାଚସ୍ପତି, ସମ୍ପୃକ୍ତ ରାଜ୍ୟ ବାଚସ୍ପତି ତଥା ସେହି ରାଜ୍ୟ ସରକାରଙ୍କୁ ତୁରନ୍ତ ଖବର ଦେଲେ ସମସ୍ୟାର ସମାଧାନ କରାଯିବ।
ବାଚସ୍ପତି ପାତ୍ର ମଙ୍ଗଳବାର ରାଜ୍ୟରେ କରୋନା ସ୍ଥିତି ନେଇ ଭିଡିଓ କନଫରେନ୍ସିଂରେ ଲୋକ ସଭା ବାଚସ୍ପତି ଓମ୍ ପ୍ରକାଶ ବିର୍ଲାଙ୍କ ସହ ଆଲୋଚନା କରିଥିଲେ। ଏହି ମହାମାରୀକୁ ମୁକାବିଲା କରିବା ନେଇ ବିର୍ଲା ସମସ୍ତ ଏମ୍ପି ଓ ବିଧାୟକଙ୍କ ସହଯୋଗ କାମନା କରିଥିଲେ। କୋଭିଡ୍-୧୯ ସଂକ୍ରମଣକୁ କିପରି ହ୍ରାସ କରାଯାଇ ପାରିବ ସେ ନେଇ ରାଜ୍ୟ ସରକାର ନେଇଥିବା ପଦକ୍ଷେପ ସମ୍ପର୍କରେ ଓଡିଶା ବାଚସ୍ପତି ଲୋକ ସଭା ବାଚସ୍ପତିଙ୍କୁ ସୂଚନା ଦେଇଥିଲେ। ଓଡିଶାରେ ଲକ୍ଡାଉନ, ସାମାଜିକ ଦୂରତ୍ୱ, ହାତଧୁଆ, କ୍ୱାରାଣ୍ଟାଇନ୍ ଆଦିକୁ କଡାକଡି ପାଳନ କରାଯାଉଛି। ସମ୍ଭାବ୍ୟ ସଂକ୍ରମଣକୁ ଦେଖି ରାଜ୍ୟ ସରକାର ବିଦେଶ ଫେରନ୍ତାଙ୍କୁ ବାଧ୍ୟତାମୂଳକ ପଞ୍ଜୀକରଣ ଓ କ୍ୱାରାଣ୍ଟାଇନ୍ରେ ରଖିବା ସହ ସମସ୍ତ ଜିଲାରେ କୋଭିଡ୍ ହସ୍ପିଟାଲ ସ୍ଥାପନ କରିବାକୁ ନେଇ ମଧ୍ୟ ପାତ୍ର ସୂଚନା ଦେଇଥିଲେ।
ଏନ୍ଆଇସିରେ ଅନୁଷ୍ଠିତ ଭିଡିଓ କନଫରେନ୍ସିଂ ବେଳେ ବିଧାନସଭା ସଚିବ ଦାଶରଥି ଶତପଥୀ, ଏନ୍ଆଇସିର ରାଜ୍ୟ ସୂଚନା ଅଧିକାରୀ ପ୍ରତିଭା ସିଂ ଏବଂ ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ।
