ଭଦ୍ରକ ଅଫିସ/ବାସୁଦେବପୁର, ୧୬।୩(ଡି.ଏନ.ଏ.)- ଭଦ୍ରକ ଜିଲା ଗ୍ରାମାଞ୍ଚଳ ଥାନା ଅଧୀନ ସନିଆ ସାବରଙ୍ଗ ଓ ବାସୁଦେବପୁର ବ୍ଲକ ଆର୍ତ୍ତୁଂ ଗ୍ରାମରେ ସୋମବାର ପାଣିରେ ବୁଡ଼ି ୩ ବାଳକଙ୍କ ମୃତ୍ୟୁ ଘଟିଛି। ସନିଆ ସାବରଙ୍ଗର ମୃତକଦ୍ୱୟ ହେଲେ ରଞ୍ଜନ କୁମାର ଧୂପାଳଙ୍କ ପୁଅ ଦେବୀଦତ୍ତ(୮) ଓ ପାର୍ଥସାରଥୀ ବେହେରାଙ୍କ ପୁଅ ବିଶ୍ୱଜିତ୍(୯)। ସୂଚନା ଅନୁଯାୟୀ, ଦୁଇ ସାଙ୍ଗ ଦେବୀଦତ୍ତ ଓ ବିଶ୍ୱଜିତ ଅପରାହ୍ନରେ ଖେଳୁଥିବାବେଳେ ଗଁା ନିକଟ ବିଲ ମଝିରେ ନୂଆ କରି ଖୋଳା ଯାଇଥିବା ଏକ ଗାଡ଼ିଆରେ ପଡ଼ିଯାଇଥିଲେ। ଖବର ପାଇ ପରିବାର ଲୋକ ଓ ଗ୍ରାମବାସୀ ପହଞ୍ଚି ଦୁଇଜଣଙ୍କୁ ଉଦ୍ଧାର କରି ଜିଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। ସେଠାରେ ଡାକ୍ତର ଦୁହିଁଙ୍କୁ ମୃତ ଘୋଷଣା କରିଥିଲେ। ଗ୍ରାମାଞ୍ଚଳ ପୋଲିସ ମୃତଦେହ ଜବତ କରିବା ପରେ ବ୍ୟବଚ୍ଛେଦ ପାଇଁ ଡାକ୍ତରଖାନାରେ ରଖାଯାଇଛି।
ସେହିପରି ବାସୁଦେବପୁର ଆର୍ତ୍ତୁଂ ଗ୍ରାମର ଦେବାଶିଷ ରାଉଳ ନାମକ ଜଣେ ବାଳକ ସନ୍ଧ୍ୟାରେ ପୋଖରୀରେ ପଡ଼ି ଯିବାରୁ ମୃତ୍ୟୁ ଘଟିଛି। ଦେବାଶିଷ ମାଙ୍କଡ଼ ଗୋଡ଼ାଉଥିବାବେଳେ ଅସାବଧାନତାବଶତଃ ନିକଟସ୍ଥ ଏକ ପୋଖରୀ ମଧ୍ୟକୁ ଖସି ପଡ଼ିଥିଲେ। ସଂଜ୍ଞାହୀନ ଅବସ୍ଥାରେ ତାଙ୍କୁ ଉଦ୍ଧାର କରି ବାସୁଦେବପୁର ଡାକ୍ତରଖାନାକୁ ନିଆଯାଇଥିଲା। ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
