କଟକ ଅଫିସ, ୩।୧୧ ଆସନ୍ତା ୧୨ରେ ଐତିହାସିକ କଟକ ବାଲିଯାତ୍ରା। ଏହି ଯାତ୍ରା ଆଉ ୯ଦିନ ବାକି ଥିବା ବେଳେ ଜିଲା ପ୍ରଶାସନ ଏବଂ କଟକ ମହାନଗର ନିଗମ(ସିଏମ୍ସି) ଅଧିକାରୀଙ୍କ ଆନ୍ତରିକତା ଅଭାବ ଯୋଗୁ ଏ ପର୍ଯ୍ୟନ୍ତ ୫୦ ପ୍ରତିଶତ ଶେଷ କାମ ହୋଇନି। ଏପରି କି ବାଲିଯାତ୍ରା ପଡିଆ ସଫେଇ କାର୍ଯ୍ୟ ଆରମ୍ଭ ହୋଇନି। ସେହିପରି ବିଦ୍ୟୁତ୍କରଣ କାର୍ଯ୍ୟ ଧିମା ଗତିରେ ଚାଲିଛି। ବାଲିଯାତ୍ରାକୁ ସଂଯୋଗ କରୁଥିବା ରାସ୍ତା ସଫେଇ ସାଙ୍ଗକୁ ସୌନ୍ଦର୍ଯ୍ୟକରଣ କାମ ହୋଇନାହିଁ। ଅନ୍ୟପକ୍ଷରେ କିଛି ସାମାଜିକ ସଙ୍ଗଠନ ବାଲିଯାତ୍ରାକୁ ଜାତୀୟ ମହୋତ୍ସବ ମାନ୍ୟତା ପାଇଁ ମୁଖ୍ୟମନ୍ତ୍ରୀଙ୍କୁ ଭେଟି ସ୍ମାରକପତ୍ର ଦେଇଛନ୍ତି। ମୋଟାମୋଟି ଭାବେ କହିବାକୁ ଗଲେ ଏଠାରେ ବିଭିନ୍ନ ସଙ୍ଗଠନର କର୍ମକର୍ତ୍ତା ଓ ଲୋକମାନେ ବାଲିଯାତ୍ରାକୁ ନେଇ ଉତ୍ସାହିତ ଥିବାବେଳେ ଏଥିପ୍ରତି ପ୍ରଶାସନ କିମ୍ବା ସିଏମ୍ସି ସେଭଳି ଆନ୍ତରିକତା ନ ଥିବା ଅଭିଯୋଗ ହେଉଛି, ଯାହାଫଳରେ ବିଭିନ୍ନ କାର୍ଯ୍ୟ ଧିମା ଗତିରେ ଚାଲିଛି। ଏ ନେଇ ଆଇନଜୀବୀ ରାଜୀବ ପଟ୍ଟନାୟକ କହିଛନ୍ତି, ବାଲିଯାତ୍ରା ହେଉଛି ବହୁ ପୁରାତନ ଯାତ୍ରା। ଏଠାକୁ ବହୁ ଦୂରଦୂରାନ୍ତରରୁ ପର୍ଯ୍ୟଟକମାନେ ବୁଲିବାକୁ ଆସିଥାନ୍ତି। ଏହାକୁ ସୁରୁଖୁରୁରେ ସମାପନ କରିବା ପାଇଁ ପ୍ରଶାସନ ପକ୍ଷରୁ ମାସକ ପୂର୍ବରୁ ବୈଠକ କରାଯାଇ କାର୍ଯ୍ୟ ଶେଷ କରିବା କଥା। ମାତ୍ର ଜିଲା ପ୍ରଶାସନ ବାହାବା ନେବାରେ ବ୍ୟସ୍ତ କିନ୍ତୁ କାର୍ଯ୍ୟ ସାରିବାକୁ ଆନ୍ତରିକତା ନାହିଁ। ସେହିପରି ସାମାଜିକ କର୍ମୀ ଅଭୟ ପଟ୍ଟନାୟକ କହିଛନ୍ତି, ପ୍ରଶାସନ ଏବେ ଷ୍ଟଲ ବିକି ଟଙ୍କା ଗୋଟେଇବାରେ ବ୍ୟସ୍ତ। ପରିବେଶ ପ୍ରଦୂଷଣ ମୁକ୍ତ କରିବା ପାଇଁ ପ୍ରଶାସନ ପକ୍ଷରୁ ଲୋକଙ୍କ ପାଇଁ ରିକ୍ସା ବ୍ୟବସ୍ଥା କରାଯାଇଛି। ସାଇକେଲ ଶୋଭାଯାତ୍ରା କରିବାକୁ ଯାଉଛି। ହେଲେ ଏହା ଗୋଟିଏ ଦିନ କଲେ ପ୍ରଦୂଷଣ ମୁକ୍ତ ହୋଇଯିବନି। ସେଥିପାଇଁ ବାଲିଯାତ୍ରା ଠାରୁ ସହରରେ ମୋ ସାଇକେଲ ବ୍ୟବସ୍ଥା ଲାଗୁ କରାଯାଉ ବୋଲି ସେ କହିଛନ୍ତି।
ଏ ନେଇ ସିଏମ୍ସି କମିଶନର ଅନନ୍ୟା ଦାସ କହିଛନ୍ତି, ବାଲିଯାତ୍ରା ପାଇଁ ସିଏମ୍ସି ପ୍ରସ୍ତୁତ ହୋଇ ରହିଛି। ଖୁବ୍ଶୀଘ୍ର ସଫେଇ କାର୍ଯ୍ୟ ସହ ବିଭିନ୍ନ ସ୍ଥାନରେ ଲାଇଟ୍ ଲଗା କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଶେଷ କରାଯିବ। ସେହିପରି ଜିଲାପାଳ ଭବାନୀ ଶଙ୍କର ଚୟନୀ କହିଛନ୍ତି, ବାଲିଯାତ୍ରା ପାଇଁ ପ୍ରସ୍ତୁତି ଯୋରଦାର ଚାଲିଛି। ଖୁବ୍ଶୀଘ୍ର ସମସ୍ତ କାର୍ଯ୍ୟ ଶେଷ ହେବ। ଯେପରି କୌଣସି ସମସ୍ୟା ସୃଷ୍ଟି ନ ହେବ ସେ ଦିଗରେ ପଦକ୍ଷେପ ନିଆଯାଉଛି।
