ଭୋପାଳ,୮।୩: ମଧ୍ୟପ୍ରଦେଶ ଭୋପାଳର ୪୯ ବର୍ଷୀୟା ଯୋଗିତା ଜଣେ ଉଚ୍ଚ ଶିକ୍ଷିତା ହୋଇଥିବା ବେଳେ ପରିବାର ଭରଣପୋଷଣ ପାଇଁ ଟ୍ରକ୍ ଡ୍ରାଇଭର ପାଲଟି ଯାଇଛନ୍ତି। ସହର ବଜାରରେ ମହିଳାମାନେ ଗାଡି ଚଳାଇବା ଦେଖିବାକୁ ମିଳିବା ଏବେ ଏକ ସାଧାରଣ ଘଟଣା ହୋଇ ଗଲାଣି। ହେଲେ ଏବେବି ଏମିତି କିଛି ଗାଡି ଅଛି, ଯାହାର ଷ୍ଟିୟରିଂ କେବଳ ପୁରୁଷଙ୍କ ହାତରେ ରହିଛି। କିନ୍ତୁ ଏହି କ୍ଷେତ୍ରରେ ଯୋଗିତା ହେଉଛନ୍ତି ଏକ ବ୍ୟତିକ୍ରମ। ବାଣିଜ୍ୟ ଓ ଆଇନ ଡିଗ୍ରୀ ସହ ଯୋଗିତାଙ୍କ ପାଖରେ ରହିଛି ବିୟୁଟିସିଆନ ସାର୍ଟିଫିକେଟ। ହେଲେ ସେ ଦୀର୍ଘ ୧୫ ବର୍ଷ ହେବ ଟ୍ରକ ଚଳାଇ ପରିବାର ପ୍ରତିପୋଷଣ କରୁଥିବା କୁହନ୍ତି। ଅଧିକ ରୋଜଗାର ଆଶାରେ ସେ ଟ୍ରକ୍ ଡ୍ରାଇଭର ହୋଇଥିବା କହିଛନ୍ତି। ୨ଟି ସନ୍ତାନର ମାଆ ଯୋଗିତା ଦୂରକୁ ଯାତ୍ରା କରିବା ସମୟରେ ଢାବାରେ ଖାଇବା, ଟ୍ରକ୍ରେ ଶୋଇବା ଏମିତିକି ବେଳେବେଳେ ରାସ୍ତା କଡ଼ରେ ଗାଡ଼ିରଖି ସେଇଠି ରୋଷେଇ କରି ଖାଇ ଦିଅନ୍ତି ବୋଲି କୁହନ୍ତି।
ଯୋଗିତାଙ୍କ ଜୀବନ ବହୁ ଉତ୍ଥାନ ପତନ ଦେଇ ଗତି କରିଥିବା ବେଳେ ୨୦୦୩ରେ ତାଙ୍କ ସ୍ବାମୀଙ୍କର ସଡ଼କ ଦୁର୍ଘଟଣାରେ ମୃତ୍ୟୁ ହେବା ପରେ ତାଙ୍କ ଅନ୍ତିମ ସଂସ୍କାରରେ ଯୋଗ ଦେବାକୁ ଯାଇଥିବା ଯୋଗିତାଙ୍କ ଭାଇଙ୍କର ମଧ୍ୟ ମୃତ୍ୟୁ ହୋଇଥିଲା। ସେବେଠାରୁ ଯୋଗିତା ଟ୍ରକ୍ ଡ୍ରାଇଭର ହେବେ ବୋଲି ସ୍ଥିର କରିଥିଲେ। ଏବେ ସେ ବିଭିନ୍ନ ରାଜ୍ୟ ଗସ୍ତ କରି ହିନ୍ଦୀ, ଇଂଲିଶ, ଗୁଜରାଟୀ, ମରାଠୀ, ତେଲ୍ଗୁ ଆଦି ଭାଷା ଶିଖି ସାରିଲେଣି। ଏମିତିକି ସେ ଯେତେବେଳେ କୌଣସି ଢାବାକୁ ଯାଆନ୍ତି, ସେତେବେଳେ ତାଙ୍କୁ ସମସ୍ତେ ସ୍ବାଗତ କରିବା ସହ ଅନ୍ୟ ଡ୍ରାଇଭରମାନେ ଉତ୍ସାହିତ କରନ୍ତି ବୋଲି ଯୋଗିତା କହିଛନ୍ତି।
