କୋଲକାତା, ୨୪।୫(ପି.ଟି.): ବାତ୍ୟା ଅମ୍ଫନ ଯୋଗୁ କ୍ଷତିଗ୍ରସ୍ତ ହୋଇଥିବା ପଶ୍ଚିମବଙ୍ଗର ଉପକୂଳବର୍ତ୍ତୀ ଜିଲାଗୁଡ଼ିକରେ ଅତ୍ୟାବଶ୍ୟକ ଭିତ୍ତିଭୂମି ଓ ସେବା ବିପର୍ଯ୍ୟସ୍ତ ହୋଇପଡ଼ିଛି। ଏହାକୁ ସ୍ବାଭାବିକ କରିବା ଲାଗି ରାଜ୍ୟ ସରକାର ଭାରତୀୟ ସେନାର ସହାୟତା ଲୋଡ଼ିଥିଲେ। ପଶ୍ଚିମବଙ୍ଗ ସରକାରଙ୍କ ଅନୁରୋଧ କ୍ରମେ କେନ୍ଦ୍ର ତୁରନ୍ତ ୫ କଲମ୍ ସେନା ପଠାଇଛି। କୋଲକାତା ମହାନଗର କର୍ତ୍ତୃପକ୍ଷଙ୍କୁ ବାତ୍ୟା ପରବର୍ତ୍ତୀ କାର୍ଯ୍ୟରେ ସହାୟତା କରିବା ଲାଗି ୩ କଲମ୍ ଯବାନଙ୍କୁ ନିୟୋଜିତ କରାଯିବା ସହ ଉତ୍ତର ଓ ଦକ୍ଷିଣ ୨୪ ପ୍ରଗଣା ଜିଲାକୁ ୨ କଲମ୍ ସେନା ପଠାଯିବ। କେନ୍ଦ୍ରରୁ ସେନା ସହାୟତା ମାଗିଥିବାରୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ରାଜ୍ୟପାଳ ଜଗଦୀପ୍ ଧନଖର ପ୍ରଶଂସା କରିଛନ୍ତି। ଉଭୟ ପରସ୍ପର ବିରୋଧୀ ଭାବେ ଜଣାଶୁଣା ଥିବାବେଳେ ରାଜ୍ୟପାଳ ମମତାଙ୍କୁ ପ୍ରଶଂସା କରିବା ଏକ ବିରଳ ଘଟଣା। ବିପତ୍ତି ସମୟରେ ଜନସାଧାରଣ ଶାନ୍ତ ରହିବା ଲାଗି ରାଜ୍ୟପାଳ ଅନୁରୋଧ କରିଛନ୍ତି।
ବାତ୍ୟା କ୍ଷତିଗ୍ରସ୍ତ ଅଞ୍ଚଳରେ ଅତ୍ୟାବଶ୍ୟକ ସେବାକୁ ସ୍ବାଭାବିକ କରିବା ଲାଗି ରାଜ୍ୟ ସରକାର ସବୁ କଳବଳ ଲଗାଇଛନ୍ତି। ଏନ୍ଡିଆର୍ଏଫ୍, ଏସ୍ଡିଆର୍ଏଫ୍ ଟିମ୍ ଉଦ୍ଧାର ଓ ରିଲିଫ୍ କାର୍ଯ୍ୟରେ ନିୟୋଜିତ ହୋଇଛନ୍ତି। ରେଲଓ୍ବେ, ବନ୍ଦର ଓ ଘରୋଇ ସଂସ୍ଥାକୁ ଲୋକବଳ ଓ ଉପକରଣ ସହାୟତା କରିବା ଲାଗି ଅନୁରୋଧ କରାଯାଇଥିବା ରାଜ୍ୟ ଗୃହ ମନ୍ତ୍ରଣାଳୟ ପକ୍ଷରୁ କୁହାଯାଇଛି। ପାନୀୟ ଜଳ ଓ ଡ୍ରେନେଜ୍ ଭିତ୍ତିଭୂମିର ପୁନରୁଦ୍ଧାରକୁ ପ୍ରାଥମିକତା ଦିଆଯାଉଛି। ରାସ୍ତାରେ ପଡ଼ି ରହିଥିବା ଗଛଗୁଡିକୁ କାଟି ହଟାଇବା କାର୍ଯ୍ୟରେ ବିଭିନ୍ନ ବିଭାଗର ଶତାଧିକ ଟିମ୍ ନିୟୋଜିତ ହୋଇଛନ୍ତି।
ଅନ୍ୟପକ୍ଷରେ ବାତ୍ୟାର ୩ ଦିନ ପରେ ମଧ୍ୟ କ୍ଷତିଗ୍ରସ୍ତ କୋଲକାତା ମହାନଗରୀରେ ବିଦ୍ୟୁତ ଓ ପାନୀୟ ଜଳ ମିଳୁ ନ ଥିବାରୁ ଶନିବାର ବିଭିନ୍ନ ସ୍ଥାନରେ ବିକ୍ଷୋଭ କରାଯାଇଥିଲା। ଦକ୍ଷିଣରେ ବେହଲାଠାରୁ ଆରମ୍ଭ କରି ଉତ୍ତରରେ ଥିବା ବେଲଘରିଆ ପର୍ଯ୍ୟନ୍ତ ଲୋକମାନେ ଗରା ବାଲ୍ତି ଧରି ରାସ୍ତା ଅବରୋଧ କରିଥିଲେ। ସପୁଇପଡା, ଯାଦବପୁରର ପଲ୍ଲିଶ୍ରୀ ଅଞ୍ଚଳ, ଗରଫା, ନର୍କେଲଦଙ୍ଗା ଓ ତେଲଙ୍ଗାବାଗାନରେ ମଧ୍ୟ ବିକ୍ଷୋଭ ପ୍ରଦର୍ଶନ କରାଯାଇଥିଲା। କୋଲକାତା ମ୍ୟୁନିସିପାଲ କର୍ପୋରେଶନର ପ୍ରସ୍ତୁତି ଅଭାବକୁ ଅନେକ ଦାୟୀ କରିଛନ୍ତି। ସ୍ବାଭାବିକ ଅବସ୍ଥା ଫେରାଇ ଆଣିବା ଲାଗି ପ୍ରଶାସନ ଦିନରାତି କାମରେ ଲାଗିଛି। ଜନସାଧାରଣ ଧୈର୍ଯ୍ୟ ରଖିବାକୁ ମୁଖ୍ୟମନ୍ତ୍ରୀ ମମତା ବାନାର୍ଜୀ ଅନୁରୋଧ କରିଛନ୍ତି। ଅମ୍ଫନ ବାତ୍ୟା ପଶ୍ଚିମବଙ୍ଗରେ ୮୬ ଲୋକଙ୍କ ଜୀବନ ନେଇଥିବାବେଳେ ୧୪ଟି ଜିଲା ପ୍ରଭାବିତ ହୋଇଛି। ଉତ୍ତର ଓ ଦକ୍ଷିଣ ୨୪ ପ୍ରଗଣା, ପୂର୍ବ ମିଦନାପୁର ଏବଂ କୋଲକାତା ସର୍ବାଧିକ କ୍ଷତିଗ୍ରସ୍ତ ହୋଇଛି।
