ନୂଆଦିଲ୍ଲୀ,୩।୯: ଗତ କିଛିିଦିନ ହେବ ଭାରତ ଓ ପାକିସ୍ତାନ ମଧ୍ୟରେ ଲାଗି ରହିଥିବା ଅଶାନ୍ତ ବାତାବରଣକୁ ଦେଖି ଭାରତ କେତେଗୁଡିଏ ପଦକ୍ଷେପ ନେବାକୁ ସ୍ଥିର କରିଛି। ପାକିସ୍ତାନ ସୀମାକୁ ଲାଗି ରହିଥିବା ପଠାନକୋଟ ଏୟାରବେସ୍ରେ ମଙ୍ଗଳବାରଠାରୁ ଭାରତ ୮ଟି ଅତ୍ୟାଧୁନିକ ହେଲିକପ୍ଟର ଆପାଚେକୁ ମୁତୟନ କରିଛି। ଆମେରିକାରୁ ଭାରତ ଆସିଥିବା ଏହି ହେଲିକପ୍ଟର ପଠାନକୋଟ ଏୟାରବେସ୍ରେ ମୁତୟନ ହେବା ପରେ ଭାରତୀୟ ସେନାର ଶକ୍ତି ବୃଦ୍ଧି ହେବ। ମଙ୍ଗଳବାର ଏହି ୮ଟି ହେଲିକପ୍ଟର ପଠାନକୋଟ ଏୟାରବେସ୍ରେ ସେନାରେ ସାମିଲ ହେବା ପୂର୍ବରୁ ପ୍ରଥମେ ଓ୍ବାଟର କ୍ୟାନନରେ ସଲାମି ଦିଆଯାଇଥିଲା।
ଏହାପରେ ଏକ ଲଞ୍ଚିଙ୍ଗ ସମାରୋହରେ ଏୟାର ଚିଫ୍ ମାର୍ଶାଲ୍ ବିଏସ୍ ଧନଓ୍ବା ଓ ତାଙ୍କ ସହ ଓ୍ବେଷ୍ଟର୍ଣ୍ଣ ଏୟାର କମାଣ୍ଡର ଏୟାର୍ ମାର୍ଶାଲ୍ ଆର୍ ନାମ୍ବିୟାର ମିଶି ଆପାଚେ ହେଲିକପ୍ଟରର ପୂଜା କରିଥିଲେ। ବୋଇଂ ଇଣ୍ଡିଆର ଅଧ୍ୟକ୍ଷ ଶଲିଲ ଗୁପ୍ତେ ଏହାର ଚାବି ବିଏସ୍ ଧନଓ୍ବାଙ୍କୁ ଦେଇଥିଲେ।
ଏହାପରେ ଏୟାର ଚିଫ୍ ମାର୍ଶାଲ୍ ବିଏସ୍ ଧନଓ୍ବା ଓ ଓ୍ବେଷ୍ଟର୍ଣ୍ଣ ଏୟାର କମାଣ୍ଡର ଏୟାର୍ ମାର୍ଶାଲ୍ ଆର୍ ନାମ୍ବିୟାର ହେଲିକପ୍ଟର ନିରିକ୍ଷଣ କରିଥିଲେ। ସୂଚନାଯୋଗ୍ୟ, ଭାରତ ଆମେରିକାଠାରୁ ୨୨ଟି ଆପାଚେ ହେଲିକପ୍ଟର ଆଣିଛି।
