ରିଷିଡା,୨୭।୮(ଡି.ଏନ.ଏ.): ପଶ୍ଚିମ ଓଡିଶାର ଗଣପର୍ବ ନୂଆଁଖାଇ ଆଉ ୬ ଦିନ ରହିଲା । ନୂଆଁଖାଇ ପର୍ବ ପାଳନ କରିବା ପାଇଁ ଏବେଠୁ ଲୋକେ ନିଜକୁ ପ୍ରସ୍ତୁତ ଆରମ୍ଭ କରିଦେଇଥିବା ବେଳେ ବିଭିନ୍ନ ଗ୍ରାମରେ ଗ୍ରାମ ଦେବୀଦେବଙ୍କ ଉପାସନା ମଙ୍ଗଳବାର ଅନୁଷ୍ଠିତ ହୋଇଯାଇଛି । ରିଷିଡା କନ୍ଧପଡା ଓ ସଲଣ୍ଡିଆ ମୁଣ୍ଡାର ଧରଣୀ ପୀଠରେ ନୂଆଁଖାଇ ପୂର୍ବ ରୋଗୀ ବଟା ପର୍ବ ପାଳନ କରାଯାଇଛି । ରୋଗୀ ବଟା ପର୍ବ ଏକ ନିଆରା ପାରମ୍ପାରିକ ପର୍ବ । ନୂଆଁଖାଇ ପୂର୍ବରୁ ପଡୁଥିବା ମଙ୍ଗଳବାର ଏହା ପାଳନ କରାଯାଏ । ଏଥିରେ ଗ୍ରାମବାସୀଙ୍କୁ ରୋଗରୁ ମୁକ୍ତି କରିବା ନିମନ୍ତେ ଧରଣୀ ମା’ଠାରେ ସ୍ବତନ୍ତ୍ର ପୂଜାର୍ଚ୍ଚନା କରାଯାଏ । ଗାଁ ଗାଁ ବୁଲି ଧୂପ, ଫୁଲ, ଅରୁଆ ଚାଉଳ ସଂଗ୍ରହ କରାଯାଇ ପୀଠ ସ୍ଥଳରେ ଗାଁର ଝାଙ୍କର (ପୂଜାରୀ)ମାନେ ପୂଜାର୍ଚ୍ଚନା କରିଥାନ୍ତି । ଏଥିରେ ଗଞ୍ଜା କୁକୁଡା ବଳି ଦିଆଯାଇଥାଏ । ପୂଜାର୍ଚ୍ଚନାରେ ପୂଜକ ସହ ଅନେକ ସହକର୍ମୀ ସହଯୋଗ କରିଥାନ୍ତି । ନୂଆଁଖାଇ ପର୍ବ ପୂର୍ବରୁ ଏହି ପୂଜା କରାଯାଇ ନୂଆଁଖାଇ ପର୍ବ ପାଇଁ ପ୍ରସ୍ତୁତି ଆରମ୍ଭ ହୋଇଯାଏ ।
