ଅନୁଗୋଳ ଅଫିସ୍, ୧୭।୩
ଅନୁଗୋଳ ଜିଲା ପ୍ରଶାସନ ପକ୍ଷରୁ କରୋନା ମୁକାବିଲା ପାଇଁ ପ୍ରସ୍ତୁତି ଜୋରଦାର ଚାଲିଛି। ଏହି ଅବସରରେ ସୋମବାର ଅପରାହ୍ନରେ ଜିଲାପାଳ ମନୋଜ କୁମାର ମହାନ୍ତିଙ୍କ ଅଧ୍ୟକ୍ଷତାରେ କୋର୍ଟରୁମ୍ ଠାରେ ଏକ ଖବରଦାତା ସମ୍ମିଳନୀ ଆୟୋଜନ କରାଯାଇଥିଲା। ସାମ୍ପ୍ରତିକ ପରିସ୍ଥିତିରେ ସମସ୍ତେ ଧୈର୍ଯ୍ୟର ସହିତ କରୋନା ଭୂତାଣୁ ସଂକ୍ରମଣର ମୁକାବିଲାରେ ସହଯୋଗ କରିବାକୁ ଜିଲାପାଳ ପରାମର୍ଶ ଦେଇଥିଲେ। ଜିଲାରେ ଏହି ସଂକ୍ରମଣର ଚିହ୍ନଟ କି ସନ୍ଦିଗ୍ଧ ନ ଥିଲେ ମଧ୍ୟ ମୁକାବିଲା କରିବାକୁ ପ୍ରଶାସନ ପ୍ରସ୍ତୁତ ଥିବା ଜିଲାପାଳ କହିଛନ୍ତି। ଅନ୍ୟପକ୍ଷରେ ଜିଲାପାଳଙ୍କ ନିର୍ଦ୍ଦେଶକ୍ରମେ ସହରରେ ଥିବା ଇକୋ ପାର୍କରେ ପୌରନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା ତାଲା ପକାଇଛନ୍ତି। ସେହିପରି ସହରରେ ଥିବା ସପିଂ ମଲଗୁଡ଼ିକୁ ମଧ୍ୟ ପୋଲିସ ସନ୍ଧ୍ୟାରେ ବନ୍ଦ କରାଯାଇଥିବା ସୂଚନା ମିଳିଛି।
ଜିଲାର ପ୍ରତି ପଞ୍ଚାୟତର ଯେ କୌଣସି ଏକ ଉଚ୍ଚ ବିଦ୍ୟାଳୟର ପୃଥକ ଗୃହରେ ଆବଶ୍ୟକ ଶୌଚାଳୟ, ବିଦ୍ୟୁତ୍ ସେବା, ପାନୀୟ ଜଳ ଯୋଗାଣ ଓ ହାତଧୁଆ ଉପକରଣ ରଖାଯିବ। ଏଥିସହ ପ୍ରତି ବ୍ଲକରେ ଜରୁରିକାଳୀନ ପଞ୍ଚାୟତ ସମିତି ବୈଠକ ଡକାଇ ସରପଞ୍ଚ, ସମିତି ସଭ୍ୟ ଓ ପଞ୍ଚାୟତ ନିର୍ବାହୀ ଅଧିକାରୀଙ୍କୁ କରୋନା ନେଇ ସଚେତନ କରାଯିବ ବୋଲି ଜିଲାପାଳ କହିଥିଲେ। ସେହିଭଳି ପଞ୍ଚାୟତ ସମିତି ବୈଠକ ସରିବା ପରେ ପ୍ରତି ପଞ୍ଚାୟତରେ ମଧ୍ୟ କରୋନା ସମ୍ପର୍କିତ ବୈଠକ ପଞ୍ଚାୟତ ନିର୍ବାହୀ ଅଧିକାରୀଙ୍କ ଅଧୀନରେ ସରପଞ୍ଚ, ସମତିସଭ୍ୟ ଓ ୱାର୍ଡ ମେମ୍ବରଙ୍କୁ ନେଇ କରାଯିବ ବୋଲି ଜିଲାପାଳ ସୂଚନା ଦେଇଥିଲେ। ସରପଞ୍ଚ, ୱାର୍ଡମେମ୍ବର ଓ ପଞ୍ଚାୟତ ନିର୍ବାହୀ ଅଧିକାରୀମାନେ ଗ୍ରାମାଞ୍ଚଳକୁ ବାହାରୁ ଆସୁଥିବା ପର୍ଯ୍ୟଟକ ଓ ବିଦେଶରେ ରହି ଘରକୁ ଫେରୁଥିବା ଲୋକମାନଙ୍କ ଉପରେ ସ୍ବତନ୍ତ୍ର ଦୃଷ୍ଟି ରଖିବା ସହ ସେମାନଙ୍କ ନାମ, ବୟସ, ଟେଲିଫୋନ ନମ୍ବର ସଂଗ୍ରହ କରି ଜିଲାପାଳ କିମ୍ବା ଉପଜିଲାପାଳ ନଚେତ ବିଡିଓଙ୍କୁ ପ୍ରଦାନ କରିବେ ବୋଲି କୁହାଯାଇଛି। ଅନ୍ୟପକ୍ଷରେ ଜିଲାରେ ହେଉଥିବା ମେଳା ଓ ମହୋତ୍ସବ ଗୁଡ଼ିକୁ ବନ୍ଦ କରାଯିବା ସହ ଦୋଳ ମେଲଣ ସ୍ଥାନରେ ୧୪୪ ଧାରା ଜାରି କରାଯାଇଛି। ସାମାଜିକ ଗଣମାଧ୍ୟମରେ ହେଉଥିବା ଅପପ୍ରଚାର ଓ ଗୁଜବ ବିରୋଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଜିଲାରେ କରୋନା ସଂକ୍ରମଣ ସମ୍ପର୍କରେ ନିୟମିତ ଭାବେ ଗଣମାଧ୍ୟମକୁ ସୂଚନା ପ୍ରଦାନ କରାଯିବାକୁ ଜିଲାପାଳ ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ। ଏଥିସହ ଏକ ଟୋଲ ଫ୍ରି ନମ୍ବର ଦିଆଯିବ ବୋଲି ଜିଲାପାଳ କହିଥିଲେ। ଜିଲାର ବିଭିନ୍ନ ବଜାର, ହାଟ ଓ ଆଞ୍ଚଳିକ ପରିବହନ ଅଧିକାରୀଙ୍କ କାର୍ଯ୍ୟାଳୟରେ ଜନସାଧାରଣଙ୍କ ଭିଡ଼ ଜମୁଥିବାରୁ କିଭଳି ଏହାକୁ କମ୍ କରାଯିବ ତାହା ଉପରେ ବିଚାର କରାଯିବ ବୋଲି ଜିଲାପାଳ କହିଥିଲେ। ସମସ୍ତ ସରକାରୀ କର୍ମଚାରୀଙ୍କ ଛୁଟି ଚଳିତ ମାସ ୩୧ ତାରିଖ ପର୍ଯ୍ୟନ୍ତ ବାତିଲ କରାଯାଇଥିବାବେଳେ ବିନା ଅନୁମତିରେ କେହି ସଦର ମହକୁମା ଛାଡ଼ି ଯାଇପାରିବେ ନାହିଁ ବୋଲି ଜିଲାପାଳ କହିଥିଲେ। ଏହି ଖବରଦାତା ସମ୍ମିଳନୀରେ ଉପଜିଲାପାଳ ବାସୁଦେବ ଶତପଥୀ ଓ ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ ଶରତ ଚନ୍ଦ୍ର ସେଠୀଙ୍କ ସମେତ ଜିଲାସ୍ତରୀୟ ଗଣମାଧ୍ୟମ ପ୍ରତିନିଧିମାନେ ଯୋଗଦେଇଥିଲେ।
