କେନ୍ଦ୍ରାପଡା ଅଫିସ, ୨୧।୯: କେନ୍ଦ୍ର ସରକାରଙ୍କ ମାନବ ସମ୍ଭଳ ବିଭାଗ ପକ୍ଷରୁ ଛାତୀଛାତ୍ରଙ୍କ ସ୍କୁଲ ବ୍ୟାଗ ବୋଝର ନିର୍ଦ୍ଦିଷ୍ଟ ଓଜନ ପାଇଁ ୨୦୧୮ରେ ନିୟମ ହୋଇଛି। ରାଜ୍ୟ ସରକାର ୨୦୧୯ ମାର୍ଚ୍ଚ ୮ରେ ଏ ସମ୍ପର୍କରେ ଗାଇଡଲାଇନ ଜାରି କରିଥିବାବେଳେ ରାଜ୍ୟର ସମସ୍ତ ସରକାରୀ ଓ ବେସରକାରୀ ବିଦ୍ୟାଳୟରେ ଏହାକୁ ଲାଗୁ କରାଯିବା ପାଇଁ ନିର୍ଦ୍ଦେଶନାମା ଜାରି କରାଯାଇଛି। ନିର୍ଦ୍ଦେଶନାମା ଅନୁଯାୟୀ, ପ୍ରଥମ ଓ ଦ୍ୱିତୀୟ ଶ୍ରେଣୀ ଛାତ୍ରୀଛାତ୍ରଙ୍କ ସ୍କୁଲ ବ୍ୟାଗ ଓଜନ ୧.୫ କି.ଗ୍ରା., ତୃତୀୟରୁ ପଞ୍ଚମ ଶ୍ରେଣୀ ପାଇଁ ୨ରୁ ୩ କି.ଗ୍ରା., ୬ଷ୍ଠ ଓ ୭ମ ଶ୍ରେଣୀ ପାଇଁ ୪ କି.ଗ୍ରା. ଓ ୮ମରୁ ୧୦ମ ଶ୍ରେଣୀ ପିଲାଙ୍କ ସ୍କୁଲ ବ୍ୟାଗ ଓଜନ ୪.୫ରୁ ୫ କି.ଗ୍ରା. ପର୍ଯ୍ୟନ୍ତ ରହିବ।
ସେହିପରି ରାଜ୍ୟ ସରକାରଙ୍କ ପକ୍ଷରୁ ସ୍କୁଲ ପିଲାଙ୍କ ପାଇଁ ପରିବହନ ନୀତି-୨୦୧୬ ପ୍ରଣୟନ ହୋଇଛି। ଏହି ନୀତି ଅନୁଯାୟୀ, ସ୍କୁଲଠାରୁ ଜିଲାସ୍ତରୀୟ ପର୍ଯ୍ୟନ୍ତ କମିଟି ଗଠନ ହେବ। ଏଥିରେ ସ୍କୁଲ ପ୍ରଧାନ ଶିକ୍ଷକ, ପୋଲିସ ସବ ଇନ୍ସପେକ୍ଟର, ବିଦ୍ୟାଳୟ ଓ ମହାବିଦ୍ୟାଳୟର ଜଣେ କର୍ମକର୍ତ୍ତା, ସ୍ଥାନୀୟ ଏମ୍ଭିଆଇ ଓ ଜଣେ ଅଭିଭାବକ ସଦସ୍ୟ ଭାବେ ରହିବେ। ଛୋଟ ଗାଡ଼ି ପରିବର୍ତ୍ତେ ସ୍କୁଲ ବସ୍ ନିୟୋଜିତ ହେବ। ବସରେ ରିଫ୍ଲେକ୍ଟିଂ ଟେପ୍, ଫିଟ୍ନେସ, ବୀମାପତ୍ର, ଧୂଆଁ (ପଲ୍ୟୁସନ) ସାର୍ଟିଫିକେଟ ଓ ଡ୍ରାଇଭିଂ ଲାଇସେନ୍ସ ଠିକ୍ ଥିବା ଆବଶ୍ୟକ। ଡ୍ରାଇଭର ଉତ୍ତମ ସ୍ବଭାବର ହେବା ଅବଶ୍ୟକ ଥିବାବେଳେ ଅଭିଜ୍ଞତା ଓ ଦାୟିତ୍ୱ ସମ୍ପନ୍ନ ହାଇଥିବେ। ହେଲେ କେନ୍ଦ୍ରାପଡ଼ା ଜିଲାରେ ଏହି ନିୟମ ଅଦ୍ୟାବଧି ଲାଗୁ ହୋଇନାହିଁ। ସମସ୍ତ ସରକାରୀ ଓ ବେସରକାରୀ ବିଦ୍ୟାଳୟର ଛାତ୍ରୀଛାତ୍ର ବିଦ୍ୟାଳୟ କର୍ତ୍ତୃପକ୍ଷଙ୍କ ନିର୍ଦ୍ଦେଶ ଅନୁଯାୟୀ ଅଧିକ ଓଜନର ବ୍ୟାଗ ବହନ କରୁଛନ୍ତି। ସେହିପରି ପିଲାମାନଙ୍କୁ ଛୋଟ ଗାଡ଼ିରେ ଅସୁରକ୍ଷିତ ଭାବେ ସ୍କୁଲକୁ ନିଆଯାଉଛି। ଶିକ୍ଷା ବିଭାଗ ଓ ଜିଲା ପ୍ରଶାସନ ଏ ନେଇ ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି। ଏଥିସହିତ ସ୍କୁଲ ପରିବହନରେ ନିୟୋଜିତ ମୋଟରଯାନର ଫିଟନେସ, ଡ୍ରାଇଭିଂ ଲାଇସେନ୍ସ ଆଦି ତନଖି କରିବାକୁ ଅଭିଭାବକମାନେ କହିଛନ୍ତି।
