ବାଲେଶ୍ୱର ଅଫିସ,୧୭।୨-ଏକ ନାବାଳିକା ଅପହରଣ ଓ ବଳାତ୍କାର ମାମଲାର ବିଚାର କରି ବାଲେଶ୍ୱର ଜିଲା ଅତିରିକ୍ତ ଦୌରାଜଜ୍ କମ୍ ପୋକ୍ସୋ ଅଦାଲତର ବିଚାରପତି ଗିରିଜା ପ୍ରସାଦ ମହାପାତ୍ର ସୋମବାର ଅଭିଯୁକ୍ତଙ୍କୁ ୨୦ବର୍ଷ ଜେଲଦଣ୍ଡ ସହ ୩୦ହଜାର ଟଙ୍କା ଜରିମାନା ଆଦେଶ ଦେଇଛନ୍ତି। ଜରିମାନା ଅନାଦାୟ ଆଉ ୧୩ ମାସ ଜେଲଦଣ୍ଡ ଭୋଗିବାକୁ ରାୟରେ କୁହାଯାଇଛି।
୨୦୧୭ ଅଗଷ୍ଟ ୧୫ରେ ନାବାଳିକା ଜଣକ ନିଜ ଘରେ ମା’ବାପାଙ୍କ ପାଖରେ ଶୋଇଥିବା ବେଳେ ମୟୂରଭଞ୍ଜ ଜିଲା ବୈଶିଙ୍ଗା ଥାନା ରଘୁପୁର ଗ୍ରାମର ଅଗଷ୍ଟ ସିଂ ତାଙ୍କୁ ଡାକି ନେଇଥିଲେ। ସେ ତାଙ୍କ ଘରକୁ ବୁଲିଯିବା ପାଇଁ କହି କୌଶଳକ୍ରମେ ଅପହରଣ କରି ମାର୍କୋଣା ଷ୍ଟେଶନରୁ ଟ୍ରେନ୍ ଯୋଗେ ନେଇ ରୂପ୍ସା ଷ୍ଟେଶନରେ ଓହ୍ଲାଇଥିଲେ। ସେଠାରୁ ଏକ ବାଇକ୍ ଯୋଗେ ରଘୁପୁରସ୍ଥିତ ଘରକୁ ନେଇ ବଳାତ୍କାର କରିଥିଲେ। ଅଗଷ୍ଟ ସେଠାରେ ନାବାଳିକାଙ୍କୁ ମାନସିକ ଓ ଶାରୀରିକ ନିର୍ଯାତନା ଦେଇ ଆସୁଥିଲେ। ଘଟଣା ସମ୍ପର୍କରେ ନାବାଳିକାଙ୍କ ବାପା ସିମୁଳିଆ ଥାନାରେ ଲିଖିତ ଅଭିଯୋଗ କରିଥିଲେ। ଥାନାରେ ମାମଲା (ନଂ. ୨୧୯/୧୭) ରୁଜୁ କରାଯାଇଥିଲା। ଅପହରଣର ୪ ଦିନ ପରେ ଅଗଷ୍ଟ ନାବାଳିକାଙ୍କ ସହିତ ପଞ୍ଚୁଲିଙ୍ଗେଶ୍ୱର ଶୈବପୀଠକୁ ବୁଲିବାକୁ ଯାଉଥିବା ବେଳେ ବାଲେଶ୍ୱର ପୋଲିସ ଲାଇନ୍ ଛକ ନିକଟରେ ପୋଲିସ ହାତରେ ଧରାପଡ଼ିଥିଲେ। ସେଠାରୁ ନାବାଳିକାଙ୍କୁ ଉଦ୍ଧାର କରାଯାଇ ଅଗଷ୍ଟଙ୍କୁ ଗିରଫ କରାଯାଇ କୋର୍ଟଚାଲାଣ କରାଯାଇଥିଲା। ୧୩ଜଣ ସାକ୍ଷୀ ଓ ୧୮ ଦସ୍ତାବିଜ୍କୁ ଆଧାର କରି ଜଜ୍ ଏହି ଦଣ୍ଡାଦେଶ ଶୁଣାଇଛନ୍ତି। ସରକାରଙ୍କ ପକ୍ଷରୁ ଆଇନଜୀବୀ ପ୍ରଣବ କୁମାର ପଣ୍ଡା ମାମଲା ପରିଚାଳନା କରୁଥିଲେ।
