ପାପଡାହାଣ୍ଡି,୧୨।୮(ଡି.ଏନ.ଏ)-ନବରଙ୍ଗପୁର ଜିଲା ପାପଡାହାଣ୍ଡି ବ୍ଲକ ପଣ୍ଡିକୋଟ ପଞ୍ଚାୟତ ବାଙ୍କସର୍ଗି ଗ୍ରାମରେ ନବବଧୂ ମେନକା ସୌରାଙ୍କୁ ହତ୍ୟା କରାଯାଇଥିବା ନେଇ ସୋମବାର ଥାନାରେ ଅଭିଯୋଗ ହୋଇଛି । ତେନ୍ତୁଳିଖୁଣ୍ଟି ଥାନା ବିରୀଗୁଡା ଗ୍ରାମର ମେନକା ୪ ମାସ ତଳେ ବାଙ୍କସର୍ଗି ଗ୍ରାମର ତୀର୍ଥ ସୌରାଙ୍କୁ ବିବାହ କରିଥିଲେ । ରବିବାର ରାତିରେ ତାଙ୍କର ମୃତ୍ୟୁ ହୋଇଥିବା ନେଇ ମେନକାଙ୍କ ବାପା ନୀଳ ସୌରା ଖବର ପାଇଥିଲେ । ଝିଅକୁ ହତ୍ୟା କରଯାଇଥିବା ନେଇ ପାପଡାହାଣ୍ଡି ଥାନାରେ ଏତଲା ଦେଇଥିଲେ । ଖବର ପାଇ ଏସପି ନିତିନ କୁସଲାକର ଓ ପାପଡାହାଣ୍ଡି ଥାନା ଅଧିକାରୀ ବିଲ୍ବ ମଙ୍ଗଲ ସେଠି ଘଟଣା ସ୍ଥଳରେ ପହଞ୍ଚି ତଦନ୍ତ କରିବା ସହ ମୃତଦେହ ବ୍ୟବଚ୍ଛେଦ ଲାଗି ନବରଙ୍ଗପୁର ପଠାଇଥିଲେ। ମେନକାଙ୍କ ସ୍ବାମୀ ୩ ମାସ ତଳେ ଦାଦନ ଖଟିବାକୁ ଆନ୍ଧ୍ର ଯାଇଛନ୍ତି। ଶଶୁର ମହେଶ୍ୱର, ଶାଶୁ ବେଲ ସୌରା ପାଖରେ ମେନକା ରହୁଥିଲେ । ଏନେଇ ଥାନାରେ ନଂ. ୧୦୦/୧୯ ରେ ଏକ ମାମଲା ରୁଜୁ ହୋଇଛି ।
