ପଟ୍ଟାମୁଣ୍ଡାଇ, ୩।୧(ସ୍ବ.ପ୍ର.):କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ରାଜସ୍ବ ସମ୍ପତ୍ତିର ଉପଯୁକ୍ତ ରକ୍ଷଣାବେକ୍ଷଣ ପାଇଁ ଏନ୍ଜିଟି (ନ୍ୟାଶନାଲ ଗ୍ରୀନ୍ ଟ୍ରିବ୍ୟୁନାଲ) ରାଜସ୍ବ ବିଭାଗକୁ କଡ଼ା ଚେତାବନୀ ଦେଇଛନ୍ତି। ଏହାର ବ୍ୟତିକ୍ରମ କରୁଥିବା ବାଲି ବ୍ୟବସାୟୀ ଓ ଅଧିକାରୀମାନଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କୁହାଯାଇଛି। ହେଲେ ପଟ୍ଟାମୁଣ୍ଡାଇ ଅଞ୍ଚଳରେ ଏହାର ପ୍ରଭାବ ସେତେଟା ପଡୁନାହିଁ। ବେଆଇନ ଭାବେ ମେଶିନ ଲଗାଇ ବାଲି, ମାଟି ଆଦି ଉତ୍ତୋଳନ ହୋଇ ଚୋରା ଚାଲାଣ ହେଉଛି। ରାଜନୈତିକ ଓ ପ୍ରଶାସନିକ ଅଧିକାରୀଙ୍କ ଛତ୍ରଛାୟା ତଳେ ରହି ବାଲି ବ୍ୟବସାୟୀମାନେ ଆଇନକାନୁନକୁ ଦଳିମକଚି ଦେଇ ବ୍ୟବସାୟ କରୁଛନ୍ତି। ନଦୀ ମଧ୍ୟରୁ ବେଆଇନ ବାଲି ଉଠାଣ ଯୋଗୁ ବନ୍ଧ କ୍ଷତିଗ୍ରସ୍ତ ହୋଇ ବନ୍ୟା ବିପତ୍ତି ସୃଷ୍ଟି କରୁଛି। ହେଲେ ଏଥିପ୍ରତି ସରକାର ନା ପ୍ରଶାସନ କାହାରି ନିଘାନାହିଁ। ଏ ନେଇ ସାଧାରଣରେ ଉଦ୍ବେଗ ପ୍ରକାଶ ପାଇଛି।
ତହସିଲ ଅଧୀନ ବ୍ରାହ୍ମଣୀ ନଦୀର ବାଲିଘାଟ ନିଲାମ ଧାର୍ଯ୍ୟ ପରିମାଣଠାରୁ ଢେର ଅଧିକ ବାଲି ଉତ୍ତୋଳନ ହେଉଥିବା ଅଭିଯୋଗ ହେଉଛି। ହେଲେ ନିଲାମ ଏରିଆ ବାହାରୁ ମନଇଚ୍ଛା ବେଆଇନ ଭାବେ ବାଲି ଉତ୍ତୋଳନ ହେଉଥିବା ଅଭିଯୋଗ ହୋଇଛି। ପଟ୍ଟାମୁଣ୍ଡାଇ ତହସିଲ ଅଧୀନରେ ଥିବା ତରଡ଼ିପାଳ, ଅଳପୁଆ, ପେଣ୍ଠପାଳ ଓ ଅମୃତମଣୋହି ବାଲିଘାଟ ସରକାରୀ ଭାବେ ନିଲାମ ହୋଇଛି। ନିଲାମଧାରୀ ସରକାରୀ ନିୟମ ଅନୁଯାୟୀ, ଘାଟ ନିଲାମ ନେଇ ବ୍ରାହ୍ମଣୀ ନଦୀରୁ ବାଲି ଉଠାଇ ବ୍ୟବସାୟ କରୁଛନ୍ତି। କିନ୍ତୁ ସରକାରୀ ଭାବେ ଘାଟ ନିଲାମ ହୋଇ ନ ଥିବା ନୀଳକଣ୍ଠପୁର-ଜଗନ୍ନାଥପୁର ଏବଂ ଅଲଭା-ନରେନ୍ଦ୍ରପୁର ବାଲିଘାଟରୁ ବେଆଇନ ଭାବେ ବାଲି ଉଠାଣ କରାଯାଉଥିବା ନେଇ ଗୁରୁତର ଅଭିଯୋଗ ହୋଇଛି। ନିଲାମ ହୋଇ ନ ଥିବା ନୀଳକଣ୍ଠପୁର ବାଲିଘାଟରୁ ପ୍ରତ୍ୟହ ଶତାଧିକ ଟ୍ରକ୍, ଟ୍ରାକ୍ଟର ବାଲି ଉଠାଉ ଥିବା ନେଇ କେନ୍ଦ୍ରାପଡ଼ା ଉପଜିଲାପାଳ ଓ ପଟ୍ଟାମୁଣ୍ଡାଇ ତହସିଲଦାରଙ୍କ ନିକଟରେ ଅଭିଯୋଗ କରାଯାଇଛି। ମାତ୍ର ଏହାର କୌଣସି ଫରକ ପଡୁନାହିଁ। ଏକାଧିକ ମେଶିନ ଲଗାଇ ନୀଳକଣ୍ଠପୁର ଘାଟରୁ ଦିନରାତି ବାଲି ଚାଲାଣ ହେଉଥିବା ଅଞ୍ଚଳବାସୀ କହିଛନ୍ତି। ସମାନ ଘଟଣା ଅଳଭା ଘାଟରେ ମଧ୍ୟ ଦେଖିବାକୁ ମିଳୁଛି। ଫଳରେ ବ୍ରାହ୍ମଣୀ ନଦୀପଠା ସଂଲଗ୍ନ ଗ୍ରାମଗୁଡ଼ିକର ରାସ୍ତା ବିପର୍ଯ୍ୟସ୍ତ ସହିତ ନଦୀବନ୍ଧ ଦୁର୍ବଳ ହେବା ଘଟଣା ଲୋକଙ୍କୁ ଚିନ୍ତିତ କରିଛି। ବାଲି ମାଫିଆମାନଙ୍କ ବିରୋଧରେ ମୁହଁ ଖୋଲିଲେ ମାଡ଼ ଖାଇବା ସହିତ ହତ୍ୟା ଧମକ ମିଳୁଛି । ସୂଚନା ଅନୁଯାୟୀ, ୨୦୨୨ରୁ ୨୦୨୭ ଯାଏ ୫ ବର୍ଷ ପାଇଁ ମୋଟ ୪ଟି ବାଲିଘାଟକୁ ସରକାରୀ ଭାବେ ଲିଜ୍ ଦିଆଯାଇଛି। ହେଲେ ଆବଶ୍ୟକ ଅନୁଯାୟୀ ରାଜସ୍ବ ଆଦାୟ ହେଉ ନ ଥିବାରୁ ସରକାରଙ୍କ ବିପୁଳ ପରିମାଣରେ ରାଜସ୍ବହାନି ଘଟୁଛି। ପ୍ରତିଦିନ ଶତାଧିକ ଟ୍ରିପ୍ ବାଲି ଜିଲା ବାହାରକୁ ଚାଲାଣ କରି ଯେଉଁ ବିପୁଳ ଟଙ୍କା ରୋଜଗାର ହେଉଛି ସେଥିରୁ ସିଂହଭାଗ ଦୁର୍ନୀତିଖୋର ସରକାରୀ କର୍ମଚାରୀମାନଙ୍କ ପକେଟକୁ ଯାଉଛି। ବାରମ୍ବାର ଅଭିଯୋଗ ପରେ ମଧ୍ୟ ରାଜସ୍ବ ବିଭାଗ କିମ୍ବା ଜିଲା ପ୍ରଶାସନ ପକ୍ଷରୁ କୌଣସି ଆଖିଦୃଶିଆ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ଖୁବ୍ଶୀଘ୍ର ଏହାର ସ୍ଥାୟୀ ସମାଧାନ ନ ହେଲେ ନଦୀବନ୍ଧ ପାଇଁ ଭୟଭୀତ ଥିବା ଗ୍ରାମବାସୀ ରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି। ଏ ବାବଦରେ ତହସିଲଦାର ଦିଲୀପ ସେଠୀଙ୍କୁ ପଚାରିବାରୁ ପଟ୍ଟାମୁଣ୍ଡାଇ ବ୍ଲକ ଅଞ୍ଚଳର ତରଡ଼ିପାଳ, ଅଳପୁଆ, ପେଣ୍ଠପାଳ ଓ ଅମୃତମଣୋହି ଘାଟରୁ ବାଲି ଉତ୍ତୋଳନ ପାଇଁ ସରକାରୀ ଭାବେ ନିଲାମ ଦିଆଯାଇଛି। ମାତ୍ର ଅଳଭା ଓ ନୀଳକଣ୍ଠପୁର ଘାଟରୁ ବାଲି ଉଠୁଥିବା ଖବର ମିଳିଛି। ଖୁବ୍ଶୀଘ୍ର ବାଲି ଉଠାଉଥିବା ବ୍ୟକ୍ତିଙ୍କ ବିରୋଧରେ ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
