ଭୁବନେଶ୍ୱର, ୧୬।୧୦(ବ୍ୟୁରୋ):ଦୁଇଦିନ ରାସ୍ତା କଡ଼ ଫୁଟ୍ପାଥ, ରେଳ ଷ୍ଟେଶନରେ ରାତି ବିତାଇବା ପରେ ଶେଷରେ ଆର୍ମି ରାଲି ପାଇଁ ଆସିଥିବା ହଜାର ହଜାର ପରୀକ୍ଷାର୍ଥୀଙ୍କ ମୁଣ୍ଡଗୁଞ୍ଜିବାକୁ ହୋଇଛି ସ୍ବତନ୍ତ୍ର ବ୍ୟବସ୍ଥା। ବିଏମ୍ସି ପକ୍ଷରୁ ସହରର ୭ଟି ସ୍ଥାନରେ ଅସ୍ଥାୟୀ ରହଣିସ୍ଥଳ ତିଆରି କରାଯାଇଛି। ସେଠାରେ ଆବଶ୍ୟକ ବ୍ୟବସ୍ଥା ଗ୍ରହଣ କରାଯାଇଥିବାବେଳେ ପରୀକ୍ଷାର୍ଥୀମାନେ ରହିବା ଆରମ୍ଭ କରିଛନ୍ତି।
ସୂଚନାଯୋଗ୍ୟ, ବିହାର ଟେରିଟୋରିଆଲ ଆର୍ମିରେ ନିଯୁକ୍ତି ପାଇଁ ଭୁବନେଶ୍ୱରସ୍ଥିତ ୧୨୦ ବାଟାଲିୟନ ଇନଫାଣ୍ଟ୍ରି କ୍ୟାମ୍ପସରେ ପରୀକ୍ଷା ଚାଲିଛି। ୮ବର୍ଗରେ ମୋଟ ୮୨ ପଦବୀ ପାଇଁ ୧୪ ତାରିଖରୁ ଆରମ୍ଭ ହୋଇଥିବା ପରୀକ୍ଷା ୨୦ ତାରିଖ ପର୍ଯ୍ୟନ୍ତ ଚାଲିବ। ଏଥିପାଇଁ ୬ ରାଜ୍ୟରୁ ହଜାର ହଜାର ଆଶାୟୀ ଆବେଦନକାରୀ ଯୁବକ ରାଜଧାନୀକୁ ଆସିଛନ୍ତି। ରହିବା, ଖାଇବା ଓ ବିଶ୍ରାମ ନେବାରେ ନାନା ହଟହଟା ହେଉଛନ୍ତି। ଦୁଇଦିନ ଅତି ଦୟନୀୟ ଭାବେ ଖୋଲା ଆକାଶ ତଳେ ପଡ଼ି ରହିବା ସହ ବର୍ଷା ଓ କାକରରେ ଭିଜିଥିଲେ। ଜ୍ୱର ଓ ଅସୁସ୍ଥତା ମଧ୍ୟରେ ପରୀକ୍ଷା ଦେଇଥିଲେ। ଏ ସଂକ୍ରାନ୍ତରେ ମଙ୍ଗଳବାର ଧରିତ୍ରୀର ପ୍ରଥମ ପୃଷ୍ଠାରେ ସଚିତ୍ର ତଥ୍ୟ ଭିତ୍ତିକ ଖବର ପ୍ରକାଶ ପାଇବା ପରେ ତତ୍ପରତା ପ୍ରକାଶ ପାଇଛି। ବିଏମ୍ସି କମିଶନର ପ୍ରେମଚନ୍ଦ୍ର ଚୌଧାରୀ କହିଛନ୍ତି, ସହର ଭିତରେ ୭ ସ୍ଥାନରେ ପିଲାଙ୍କ ପାଇଁ ବ୍ୟବସ୍ଥା କରାଯାଇଛି। ପରୀକ୍ଷା ସରିବା ପର୍ଯ୍ୟନ୍ତ ପିଲାଙ୍କ ପାଇଁ ବାସସ୍ଥଳୀ ସହ ସେଠାରେ ଆବଶ୍ୟକ ମୌଳିକ ସୁବିଧା ଯୋଗାଇ ଦିଆଯାଇଛି। ପିଇବା ପାଣି, ଗାଧୁଆ ଘର ଓ ଶୌଚାଳୟ ସହ ବିଶ୍ରାମ ଲାଗି ବ୍ୟବସ୍ଥା କରାଯାଇଛି। ୟୁନିଟ୍-୮, ଶାସ୍ତ୍ରୀନଗର କମ୍ୟୁନିଟି ସେଣ୍ଟର, ୟୁନିଟ-୬ କଲ୍ୟାଣ ମଣ୍ଡପ, ବଡ଼ଗଡ଼ କଲ୍ୟାଣ ମଣ୍ଡପ, ଭିଏସଏସ ନଗର କଲ୍ୟାଣ ମଣ୍ଡପ, ଚନ୍ଦ୍ରଶେଖରପୁର କଲ୍ୟାଣ ମଣ୍ଡପ, କଟକରୋଡ଼ ସ୍ଥିତ ଯାତ୍ରୀ ନିବାସଠାରେ ପିଲାମାନେ ରହିପାରିବେ। ଏହି ସେଣ୍ଟରଗୁଡିକ ଲାଗି ଜଣେ ଲେଖା ନୋଡାଲ ଅଫିସର ମଧ୍ୟ ନିଯୁକ୍ତ କରାଯାଇଛି। ଏହା ବ୍ୟତୀତ ବୁଧବାର ଓଡ଼ିଶାର ବିଭିନ୍ନ ପ୍ରାନ୍ତରୁ ଆସିବାକୁ ଥିବା ପିଲାଙ୍କ ପାଇଁ ଦ ଓ୍ବାଲର୍ଡ ଶୋ’ରୁମ୍ ନିକଟରେ ଏକ ସ୍ବତନ୍ତ୍ର ବ୍ୟବସ୍ଥା କରାଯାଇଛି। ଏହାସହ ଏଜି କଲୋନୀ ଭିତରେ ୫୦ରୁ ୬୦ ହଜାର ବର୍ଗଫୁଟ ପରିମିତ ସ୍ଥାନରେ ୪୦ ଅସ୍ଥାୟୀ ଶୌଚାଳୟ ସହ ପିଇବା ପାଣିର ବ୍ୟବସ୍ଥା କରାଯାଇଛି। କିନ୍ତୁ ଏଯାଏ ୧୨୦ ବାଟାଲିୟନ ପକ୍ଷରୁ କୌଣସି ବ୍ୟବସ୍ଥା କରାଯାଇ ନ ଥିବା ଜଣାପଡିଛି।
