ନୂଆପଡ଼ା,୧୫ା୪ (ମକାରୁ ବେମାଲ):ନୂଆପଡ଼ା ଜିଲା କୋମନା ଥାନା ଦର୍ଲିପଡା ଗଁ।ର ଜଣେ ଦାଦନ ଶ୍ରମିକ ନିଖୋଜ ହେବାର ପ୍ରାୟ ୪ବର୍ଷ ବିତିଯାଇଥିଲେ ମଧ୍ୟ ତାଙ୍କର ପତ୍ତା ମିଳିନାହିଁ। ଏ ନେଇ ପରିବାର ଲୋକେ ପୋଲିସ ଓ ଜିଲା ପ୍ରଶାସନକୁ ଲିଖିତ ଭାବେ ଜଣାଇଥିଲେ ବି ସୁଫଳ ମିଳିନାହିଁ। ଫଳରେ ସେମାନେ ପ୍ରଶାସନ ଉପରୁ ଭରସା ହରାଇ ଭାଗ୍ୟକୁ ଆଦରି ଦୁଃଖରେ ଜୀବନ ବିତାଉଛନ୍ତି। ସୂଚନା ଅନୁଯାୟୀ, ୨୦୨୨ ଡିସେମ୍ବର ୧୨ରେ ଦର୍ଲିପଡ଼ା ଗଁାର ଲକ୍ଷୀଧର ଧରୁଆ(୫୦) ଦାଦନ ସର୍ଦ୍ଦାରଙ୍କ ସହାୟତାରେ ଗାଁର ଅନ୍ୟମାନଙ୍କ ସହିତ ହାଇଦ୍ରାବାଦର ସାଙ୍ଗାରେଡ୍ଡୀ ଜିଲା ପଠାନଚୋର ଗଁ। ଇଟାଭାଟିକୁ ଇଟା ତିଆରି ପାଇଁ ଯାଇଥିଲେ। ଅନ୍ୟମାନେ ୨୦୨୩ ଜୁନ୍ରେ ଗଁ।କୁ ଫେରି ଆସିଥିଲେ ମଧ୍ୟ ଲକ୍ଷୀଧର ବର୍ତ୍ତମାନ ସୁଦ୍ଧା ଫେରିନାହାନ୍ତି। ଦାଦନ ସର୍ଦ୍ଦାରଙ୍କୁ ଫୋନ କଲେ ସେ କାଟି ଦେଉଥିବା ପରିବାର ସଦସ୍ୟ ଅଭିଯୋଗ କରିଛନ୍ତି ା ଏ ନେଇ ସେମାନେ ନୂଆପଡ଼ା ଓ କୋମନାଠାରେ ଜିଲାପାଳଙ୍କ ଅଭିଯୋଗ ଶୁଣାଣି ଶିବିରରେ ଗୁହାରି କରିଥିଲେ ମଧ୍ୟ ସୁଫଳ ପାଇନାହାନ୍ତି। ଏପରି କି ତରବୋଡ଼ ଫାଣ୍ଡି, କୋମନା ଥାନା ସହ ନୂଆପଡ଼ା ଜିଲାପାଳ ଓ ଏସ୍ପିଙ୍କୁ ଲିଖିତ ଭାବରେ ଜଣାଇଲା ପରେ ବି ଦାଦନ ସର୍ଦ୍ଦାରଙ୍କ ଉପରେ କୌଣସି କାର୍ଯ୍ୟାନୁଷ୍ଠାନ ନିଆଯାଇ ନାହିଁ। ସ୍ତ୍ରୀ ସବିତା ଧରୁଆ କହନ୍ତି, ସ୍ବାମୀ ପରିବାରର ଏକମାତ୍ର ରୋଜଗାରକ୍ଷମ ବ୍ୟକ୍ତି ଥିଲେ। ତାଙ୍କ ନିଖୋଜ ପରଠାରୁ ୩ ପିଲାଙ୍କୁ ନେଇ ବହୁତ କଷ୍ଟରେ ଚଳୁଛି। ଅନ୍ୟ ଘରେ ଯାଇ ଦିନମଜୁରିଆ କାମ କରୁଛି। ଜିଲାପାଳ ଅଭିଯୋଗ ଶୁଣାଣିରେ ଅନେକ ସମସ୍ୟା ସମାଧାନ କରୁଛନ୍ତି। ହେଲେ ଆମେ ଅନେକଥର ଲିଖିତ ଭାବରେ ଜଣାଇବା ପରେ ସୁଫଳ ପାଇନାହୁଁ। ପ୍ରଶାସନ ତୁରନ୍ତ ତାଙ୍କ ସ୍ବାମୀଙ୍କୁ ଫେରାଇଆଣିବାକୁ ସବିତା ଅନୁରୋଧ କରିଛନ୍ତି। ଜିଲା ପ୍ରଶାସନ ପ୍ରତି ସୋମବାର ପ୍ରବାସୀ ଶ୍ରମିକ ସଚେତନତାକରି ଦାଦନ ମୁକ୍ତ ଜିଲା ଗଠନ କରିବାକୁ ପ୍ରୟାସ ଜାରି ରଖିଛନ୍ତି। ହେଲେ ଏବେ ବି ଲକ୍ଷୀଧରଙ୍କ ଭଳି ଅନେକ ଶ୍ରମିକ ନିଖୋଜ ହେଉଥିବା ବେଳେ ପ୍ରତି ମାସରେ ୩ରୁ ୫ ମୃତଦେହ ଗଁାକୁ ଫେରୁଛି। ଏଥିରୁ ପ୍ରଶାସନର ପ୍ରୟାସ କେତେ ବାସ୍ତବ ରୂପ ନେଉଛି ତାହା ସାଧାରଣରେ ଆଲୋଚନାର ବିଷୟ ହୋଇଛି। ଏ ସଂକ୍ରାନ୍ତରେ ପ୍ରଭାଗୀୟ ଶ୍ରମ ଆୟୁକ୍ତ ରବୀନ୍ଦ୍ର ବାର୍ଲାଙ୍କୁ ପଚାରିବାରୁ ଯେଉଁ ଦାଦନ ଶ୍ରମିକ ନିର୍ଯାତନାର ଶିକାର ହୋଇ ଅଟକ ରହିଥିବେ ବିଭାଗ ପକ୍ଷରୁ ଉଦ୍ଧାର କରିବା କାମ ଆମର। ନିଖୋଜ ଶ୍ରମିକଙ୍କୁ ଠାବ କରିବା କାମ ପୋଲିସର। ପୋଲିସ ଦାଦନ ସର୍ଦ୍ଦାରଙ୍କୁ ଡାକି ଖୋଳତାଡ଼ କରିବା କଥା ବୋଲି କହିଥିଲେ।
Dharitri – Odisha’s No.1 Odia Daily
