ଭୁବନେଶ୍ୱର, ,୧୭ା୧୨(ବ୍ୟୁରୋ): ଏକାଦଶ ଭରତମୁନୀ ମହୋତ୍ସବ ସୋମବାର ରବୀନ୍ଦ୍ର ମଣ୍ଡପଠାରେ ଉଦ୍ଯାପିତ ହୋଇଯାଇଛି। ଉଦ୍ଯାପନୀ ଉତ୍ସବରେ ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ମୁଖ୍ୟଅତିଥି ଭାବେ ଯୋଗଦେଇ ନାଟ୍ୟଶାସ୍ତ୍ର ପ୍ରଣେତା ଭରତମୁନୀଙ୍କ ଅବଦାନରେ ଗାନ୍ଧର୍ବ କଳା ବିଶ୍ୱମୁଖୀ ହୋଇଛି ବୋଲି ମତବ୍ୟକ୍ତ କରିଛନ୍ତି। ଏଥିରେ ଉଚ୍ଚଶିକ୍ଷା ଓ କୃଷି ମନ୍ତ୍ରୀ ଅରୁଣ କୁମାର ସାହୁ ଏବଂ ସଂସ୍କୃତି ବିଭାଗ ପ୍ରମୁଖ ଶାସନ ସଚିବ ମନୋରଞ୍ଜନ ପାଣିଗ୍ରାହୀ ସମ୍ମାନିତ ଅତିଥିଭାବେ ଯୋଗଦେଇଥିଲେ। ଏହି ଅବସରରେ ବିଶିଷ୍ଟ ଭାରତନାଟ୍ୟମ୍ ନୃତ୍ୟଗୁରୁ ପଦ୍ମବିଭୂଷଣ ଧନଞ୍ଜୟନ୍ ଦମ୍ପତିିଙ୍କୁ ‘ଏକାଦଶ ଭରତମୁନୀ’ ସମ୍ମାନ ପ୍ରଦାନ କରାଯାଇଥିଲା। ଅସୁସ୍ଥତା ହେତୁ ଧନଞ୍ଜୟନ୍ଙ୍କ ଏହି ମର୍ଯ୍ୟାଦାଜନକ ସମ୍ମାନକୁ ତାଙ୍କ ସୁକନ୍ୟା ଦିବ୍ୟାଧରନ୍ ଧନଞ୍ଜୟନ୍ ଗ୍ରହଣ କରିଥିଲେ। ପ୍ରାରମ୍ଭରେ ଅନୁଷ୍ଠାନର ଅଧ୍ୟକ୍ଷ ଅବସର ବେଉରିଆ ସ୍ବାଗତଭାଷଣ ଦେଇଥିବାବେଳେ ଟ୍ରଷ୍ଟି ପୁଷ୍ପିତା ମିଶ୍ର ଧନ୍ୟବାଦ ଅର୍ପଣ କରିଥିଲେ। ଅଧ୍ୟାପକ ଡ. ମୃତ୍ୟୁଞ୍ଜୟ ରଥଙ୍କ ସଂଯୋଜନା ଏବଂ ଅଂଶୁମାନ୍ ମିଶ୍ରଙ୍କ ପରିଚାଳନାରେ ପ୍ରସ୍ତୁତ ସନ୍ଧ୍ୟାରେ ପ୍ରଥମ ପରିବେଷଣ ଥିଲା ‘ନୃତ୍ୟଶାଳା’ ଅନୁଷ୍ଠାନର ଦଳଗତ ଉପସ୍ଥାପନା ‘ସରସ୍ବତୀ ବନ୍ଦନା’। ପରେ ପରେ ନୃତ୍ୟାଭିନୟ ‘ବର୍ଷା, ବସନ୍ତ ଓ ବୈଶାଖ’ ପରିବେଷିତ ହୋଇଥିଲା। ଏହାପରେ ଗୁରୁ ଅଶୋକ କୁମାର ଘୋଷାଲ ଓ ବନ୍ଦିତା ଘୋଷାଲଙ୍କ ମନଛୁଆଁ ପରିବେଷଣ ପରେ ବିଶିଷ୍ଟ କଥାକଳି ଶିଳ୍ପୀ ରଣଜିଶ୍ ନାୟାର ‘ଦୁର୍ଯ୍ୟୋଧନ ବଧନ୍’ ପରିବେଷଣ କରିଥିଲେ। ଅନ୍ତିମ ଚରଣରେ ଭାରତନାଟ୍ୟମ୍ ନୃତ୍ୟାଙ୍ଗନା ଦିବ୍ୟାଧରନ୍ ଧନଞ୍ଜୟନ୍ ଶାସ୍ତ୍ରୀୟ ନୃତ୍ୟରେ ଦର୍ଶକଙ୍କୁ ବାନ୍ଧି ରଖିଥିଲେ। ଏହି ଅବସରରେ କଳିଙ୍ଗାୟନ ତୋର୍ଯ୍ୟତ୍ରିକମ୍ର ବାର୍ଷିକ ମୁଖପତ୍ରକୁ ଅତିଥିମାନେ ଉନ୍ମୋଚନ କରିଥିଲେ।
