ରାୟଗଡ଼ା ଅଫିସ , ୧୨ା୧୨-ରାୟଗଡ଼ା ଜିଲାରେ ଅନେକ ପର୍ଯ୍ୟଟନସ୍ଥଳୀ ପ୍ରାକୃତିକ ସୌନ୍ଦର୍ଯ୍ୟରେ ଭରପୂର। ସେଥିମଧ୍ୟରୁ ଅନେକ ଲୋକଲୋଚନକୁ ଆସିପାରୁନାହିଁ। ପର୍ଯ୍ୟଟନସ୍ଥଳୀର ଉନ୍ନତି ନେଇ ସରକାର ଲକ୍ଷ ଲକ୍ଷ ଟଙ୍କା ବ୍ୟୟ କରୁଛନ୍ତି। ହେଲେ ସେଥିରେ କିଛି ସୁଧାର ଆସୁନାହିଁ। ରାୟଗଡ଼ା ବ୍ଲକ ବୈରାଗୀହାଲୁଆ ପଞ୍ଚାୟତରେ ଥିବା ହାଲୁଆ ଜଳ ପ୍ରପାତ ଏମିତି ଏକ ପର୍ଯ୍ୟଟନସ୍ଥଳୀ, ଯାହା ପ୍ରଶାସନର ଦୃଷ୍ଟି ଆଢ଼ୁଆଳରେ ରହିଛି।
ରାୟଗଡ଼ାଠାରୁ ୨୦ କିଲୋମିଟର ଦୂର ବୈରାଗୀହାଲୁଆ ବ୍ରିଜ ପରେ ରହିଛି ଏହି ଜଳ ପ୍ରପାତ। ଆଗକୁ ନୂଆବର୍ଷ ଥିବାରୁ ବର୍ତ୍ତମାନ ଏହି ଜଳପ୍ରପାତରେ ଦିନକୁ ଦିନ ଲୋକଙ୍କ ଭିଡ଼ ଜମୁଛି। ଏହି ଜଳ ପ୍ରପାତ ଅତି ମନୋରମ ହୋଇଥିବାରୁ ସହର ଏବଂ ସହର ବାହାରୁ ଅନେକ ଲୋକ ଏଠାକୁ ବଣ ଭୋଜି କରିବାକୁ ଆସିଥାନ୍ତି। ପ୍ରକୃତିର ଏହି ସୁନ୍ଦର ପାହାଡ଼ ଏବଂ ପଥର ଦେଇ ଆସୁଥିବା ଝରଣା ପାଣିକୁ ଉପଭୋଗ କରିବାକୁ ପ୍ରତିଦିନ ୨୦୦ ରୁ ଅଧିକ ଲୋକ ଆନ୍ଧ୍ରପ୍ରଦେଶ , ରାୟଗଡ଼ା , ଜେକେପୁର , ଥେରୁବାଲି ଆଦି ବିଭିନ୍ନ ଜାଗାରୁ ଆସିଥାନ୍ତି। ବିଶେଷକରି ବୁଧବାର ଏବଂ ରବିବାର ଏଠାରେ ଲୋକଙ୍କ ବେଶି ଭିଡ଼ ଜମିଥାଏ। ହେଲେ ଏଠାରେ ପର୍ଯ୍ୟଟକଙ୍କ ପାଇଁ କୌଣସି ଆନୁଷଙ୍ଗିକ ବ୍ୟବସ୍ଥା ନାହିଁ। ପିକ୍ନିକ୍ କରିବାକୁ ଏଠାକୁ ଆସୁଥିବା ଲୋକେ ବସିବା ଓ ରୋଷେଇ କରିବା ଲାଗି ବହୁ ଅସୁବିଧା ଭୋଗିଥାନ୍ତି। ଯେଉଁ ଜାଗା ରହିଛି ସେଥିରେ ବଡ଼ ବଡ଼ ପଥର ରହିଛି। ଏଠାରେ ଲୋକଙ୍କ ଲାଗି ସୁବିଧା କରାଗଲେ ଏହି ପର୍ଯ୍ୟଟନସ୍ଥଳୀର ବିକାଶ ହୋଇପାରିବ। ଆହୁରି ଅଧିକ ଲୋକଙ୍କ ଭିଡ଼ ଜମିବ ବୋଲି ବୁଦ୍ଧିଜୀବୀମାନେ ମତ ପ୍ରକାଶ କରିଛନ୍ତି। ଏଠାକୁ ଭୋଜି କରିବାକୁ ଆସିଥିବା ରାୟଗଡ଼ା ବ୍ୟାଙ୍କ କଲୋନୀର କେ. ସୁରେଶ କୁହନ୍ତି, ଆଗକୁ ନୂଆବର୍ଷ ଆସୁଛି। ତେଣୁ ଆମ ପରିବାରର ସମସ୍ତ ସଦସ୍ୟ ଏଠାକୁ ପିକ୍ନିକ୍ କରିବାକୁ ଆସିଛୁ। ପ୍ରାକୃତିକ ସୌନ୍ଦର୍ଯ୍ୟରେ ଭରପୂର ହୋଇଥିବାରୁ ଏହି ସ୍ଥାନ ବହୁତ ଭଲ ଲାଗେ। ଏହି ସ୍ଥାନର ବିକାଶ କରାଯିବା ଦରକାର। ପାହାଡ଼ରୁ ଝରୁଥିବା ଝରଣା ପାଣି ନିକଟକୁ ଯିବା ଲାଗି ଲୋକଙ୍କୁ ବାରଣ କରାଯିବା ଦରକାର। କାରଣ ଗତବର୍ଷ ଜଣେ ପିଲା ଏହି ଝରଣା ପାଖକୁ ଯାଇ ତଳକୁ ଖସି ପଡ଼ିଥିଲେ। ଏହାର ସୁରକ୍ଷା ନେଇ ଜିଲା ପ୍ରଶାସନ ଦୃଷ୍ଟି ଦେବା ଦରକାର ବୋଲି ସେ କହିଛନ୍ତି। ସେହିପରି ରାୟଗଡ଼ା ଅଶୋକ ନଗରର ରୀତାଳୀ ମିଶ୍ର କହିଛନ୍ତି ,ଏହି ପର୍ଯ୍ୟଟନସ୍ଥଳୀ ବେଶ୍ ଆକର୍ଷଣୀୟ। ବହୁ ଲୋକ ଏଠାକୁ ପିକ୍ନିକ୍ କରିବାକୁ ଆସିଥାନ୍ତି। ତେଣୁ ଏହି ପର୍ଯ୍ୟଟନସ୍ଥଳୀର ବିକାଶ କରାଯାଉ ବୋଲି ସେ କହିଛନ୍ତି। ଏନେଇ ଭାରପ୍ରାପ୍ତ ଜିଲା ପର୍ଯ୍ୟଟନ ଅଧିକାରୀ ସୁରେନ୍ଦ୍ର ଲିମାଙ୍କୁ ପଚାରିବାରୁ, ଏହି ପର୍ଯ୍ୟଟନସ୍ଥଳୀ ଲୋକଲୋଚନକୁ ଆସିନାହିଁ। ଯଦି ଉକ୍ତ ସ୍ଥାନକୁ ଅଧିକ ଲୋକ ଯାଉଛନ୍ତି, ଏହାର ସର୍ଭେ କରାଯାଇ ପର୍ଯ୍ୟଟନ ସ୍ଥଳୀ ଅନୁମୋଦନ ପାଇଁ କେନ୍ଦ୍ରକୁ ପ୍ରସ୍ତାବ ଦିଆଯିବ ବୋଲି କହିଛନ୍ତି।
