ଦାରିଙ୍ଗବାଡ଼ି,୩।୮(ଡି.ଏନ୍.ଏ.) : କନ୍ଧମାଳ ଜିଲା ଦାରିଙ୍ଗବାଡ଼ି ଥାନା ସିମନବାଡ଼ି ଗାଁ ଶେଷମୁଣ୍ଡରେ ଏକ କାର୍ ଦୁର୍ଘଟଣାଗ୍ରସ୍ତ ହୋଇଛି । କାର୍ଟିର ନମ୍ବର ନ ଥିବା ବେଳେ ଅଦ୍ୟାବଧି କେଉଁ ପରିସ୍ଥିତିରେ ଦୁର୍ଘଟଣା ଘଟାଇ ଚାଳକ ଘଟଣାସ୍ଥଳରୁ ଫେରାର ହୋଇଯାଇଛି ସେନେଇ ପୋଲିସ ତଦନ୍ତ ଚଳାଇଛି। ଶନିବାର ସକାଳୁ ଲୋକେ କାର୍ ଦୁର୍ଘଟଣା ସମ୍ପର୍କରେ ପୋଲିସକୁ ଖବର ଦେଇଥିଲେ। ଖବର ପାଇ ଆଇଆଇସି ଅଲେଖ ଗରଡ଼ିଆଙ୍କ ନିର୍ଦ୍ଦେଶକ୍ରମେ ସବ୍ଇନ୍ସପେକ୍ଟର ସୌମ୍ୟରଞ୍ଜନ ଜେନା, ଏଏସ୍ଆଇ ଆର.ଭିମୋରାଓ ରେଡ୍ଡୀ, ସଦଳବଳେ ପହଞ୍ଚି କାର୍ଟିକୁ ଯାଞ୍ଚ କରିଥିଲେ। ପରେ କେହି ଦାବି ଦାର ନ ଥିବା ବେଳେ ପୋଲିସ ଏହାକୁ ଜେସିବି ସାହାଯ୍ୟରେ ଉଦ୍ଧାର କରି ଥାନାକୁ ନେଇଛି । ଉକ୍ତ କାର୍କୁ ନେଇ ପୋଲିସ ବିଭିନ୍ନ ସନ୍ଦେହ କରିବା ସହ ତଦନ୍ତକୁ ଜୋରଦାର କରିଛି। କେହି ଆହତ ହୋଇଥିବା କିମ୍ବା କୌଣସି ସୁରାକ ମିଳି ନ ଥିବା ପୋଲିସ କହିଛି। ଶନିବାର ସକାଳୁ କିଛି ଲୋକ ଉକ୍ତ କାର୍କୁ ଉଦ୍ଧାର କରିବାକୁ ଆସିଥିବାବେଳେ ଲୋକଙ୍କ ଭିଡ଼ ଦେଖି ଘଟଣାସ୍ଥଳରୁ ଫେରାର ହୋଇଯାଇଥିବାରୁ ପୋଲିସ ବିଭିନ୍ନ ସନ୍ଦେହ କରିଛି।
ସୂଚନାଯୋଗ୍ୟ, କାର୍ଟି ୫୯ନଂ ଜାତୀୟ ରାଜପଥ କଡ଼ର ଏକ ଖାଲକୁ ପ୍ରାୟ ୨୦ ଫୁଟ ତଳକୁ ଖସିପଡ଼ିଛି। ଏଥିରେ ନିଶ୍ଚିତ କେହି ଗୁରୁତର ଆହତ ହୋଇଥାଇ ପାରେ ବୋଲି ପୋଲିସ ଆଶଙ୍କା କରିଛି। ଘଟଣାଟି ବିଳମ୍ବିତ ରାତିରେ କିମ୍ବା ଭୋର୍ ସମୟରେ ହୋଇଥିବା ସନ୍ଦେହ କରାଯାଉଛି।
