ନୂଆଦିଲ୍ଲୀ,୨୭।୭(ପି.ଟି.)- ରାଜଧାନୀ ବ୍ୟାଙ୍କକ୍ରେ ଚାଲିଥିବା ଥାଇଲାଣ୍ଡ ଅନ୍ତର୍ଜାତୀୟ ବକ୍ସିଂ ଟୁର୍ନାମେଣ୍ଟର ଫାଇନାଲରେ ୫ ଜଣ ଭାରତୀୟ ପ୍ରବେଶ କରିଛନ୍ତି। ଶୁକ୍ରବାର ପୂର୍ବତନ ଜୁନିୟର ବିଶ୍ୱ ଚାମ୍ପିୟନ ନିଖାତ ଜରିନ (୫୧ କେ.ଜି.) ଓ ଦୀପକ ସିଂ (୪୯ କେ.ଜି.)ଙ୍କ ସମେତ ଆଉ ୩ ଭାରତୀୟ ବକ୍ସର ଟାଇଟଲ ମୁକାବିଲାକୁ ଉତ୍ତୀର୍ଣ୍ଣ ହୋଇଛନ୍ତି। ଏକମାତ୍ର ମହିଳା ବକ୍ସର ଭାବେ ଜରିନ ଫାଇନାଲ ଖେଳିବାକୁ ଯୋଗ୍ୟତା ହାସଲ କରିଛନ୍ତି। ୭୫ କେ.ଜି. ବର୍ଗରେ ଆଶିଷ କୁମାର, ରାଜ୍ୟଗୋଷ୍ଠୀ କ୍ରୀଡ଼ା ବ୍ରୋଞ୍ଜ୍ ପଦକ ବିଜେତା ମହମ୍ମଦ ହୁସାମ୍ମୁଦ୍ଦିନ ୫୬ କେ.ଜି. ଓ ବ୍ରିଜେଶ ଯାଦବ ୮୧ କେ.ଜି ବର୍ଗରେ ଫାଇନାଲରେ ପ୍ରବେଶ କରିଛନ୍ତି।
ତେବେ ପୂର୍ବତନ ଏସିଆନ ଯୁବ ରୌପ୍ୟପଦକ ବିଜେତା ଆଶିଷ ସିଂ (୬୯କେ.ଜି.) ସେମିଫାଇନାଲରେ ପରାସ୍ତ ହୋଇ ବିଦାୟ ନେଇଛନ୍ତି ଓ ସେ ବ୍ରୋଞ୍ଜ୍ ପଦକରେ ସନ୍ତୁଷ୍ଟ ହୋଇଛନ୍ତି। ଆଶିଷ ଥାଇଲାଣ୍ଡର ଉଟିଚାଇ ମାସୁକଙ୍କଠାରୁ ସଂଘର୍ଷ କରି ସ୍ପ୍ଲିଟ ଡିସିଶନରେ ପରାସ୍ତ ହୋଇଥିଲେ। ମହିଳା ବକ୍ସରମାନଙ୍କ ମଧ୍ୟରେ ମଞ୍ଜୁ ରାନୀ ୪୮ କେ.ଜି. ଓ ଭାଗ୍ୟବତୀ କଚାରୀ ୮୧ କେ.ଜି. ବର୍ଗରେ ତୃତୀୟ ସ୍ଥାନରେ ରହି ଅଭିଯାନ ଶେଷ କରିଛନ୍ତି। ପୂର୍ବରୁ ଦୀପକ ଭୁଟାନର ଟାଶି ଓ୍ବାଙ୍ଗଡିଙ୍କୁ ସେମିଫାଇନାଲରେ ପରାସ୍ତ କରିଥିଲେ। ସେହିପରି ନିଖାତ ଥାଇଲାଣ୍ଡର ଜୁଟ୍ମାସ ଜିଟପଙ୍ଗଙ୍କୁ୪-୧ରେ ହରାଇ ଫାଇନାଲରେ ପ୍ରବେଶ କରିଥିଲେ। ସେହିପରି ହୁସାମ୍ମୁଦ୍ଦିନ ୩-୨ରେ ଥାଇଲାଣ୍ଡର ଅମରିତ୍ ୟାଓଡାମଙ୍କୁ ସେମିଫାଇନାଲରେ ହରାଇଥିଲେ। ସେହିପରି ୭୫ କେ.ଜି. ବର୍ଗରେ ଆଶିଷ ଉଜ୍ବେକିସ୍ତାନର ଫନାଟ କାଖରମନୋଙ୍କୁ ହରାଇ ଫାଇନାଲରେ ପ୍ରବେଶ କରିଥିଲେ। ସେହିପରି ବ୍ରିଜେଶ ଲୋକାଲ ଫେଭରାଇଟ୍ ସାରାନୋନ ଲୋମ୍ପିଆନଙ୍କୁ ସେମିରେ ପରାସ୍ତ କରିଥିଲେ।
