ବରଗଡ଼ ଅଫିସ,୨୨।୧୧: ରାଜ୍ୟ ସରକାରଙ୍କ ଟୋକନ ବ୍ୟବସ୍ଥାକୁ ନେଇ ଗତ କିଛିଦିନ ଧରି ଖରିଫ ଧାନ ସଂଗ୍ରହ ପ୍ରକ୍ରିୟାରେ ଦେଖାଯାଇଥିବା ଅଚଳାବସ୍ଥା ଆପାତତଃ ଦୂର ହୋଇଛି। ଗୁରୁବାର ବରଗଡ଼ ଜିଲା ଅତାବିରା ଥାନା ଗୋଡଭଗା ସମଲେଶ୍ବରୀ ମନ୍ଦିର ସମ୍ମୁଖ ରାଜପଥ ଉପରେ ଚାଲିଥିବା ଚାଷୀଙ୍କ ଆନ୍ଦୋଳନସ୍ଥଳରେ ଗ୍ରାମ୍ୟ ଉନ୍ନୟନ ମନ୍ତ୍ରୀ ସୁଶାନ୍ତ ସିଂ, ଜିଲା ଯୋଜନା କମିଟି ଅଧ୍ୟକ୍ଷ ତଥା ବରଗଡ଼ ବିଧାୟକ ଦେବେଶ ଆଚାର୍ଯ୍ୟ, ଜିଲାପାଳ ଜ୍ୟୋତିରଞ୍ଜନ ପ୍ରଧାନ ପ୍ରମୁଖ ପହଞ୍ଚି ବିନା ଟୋକନରେ ମଣ୍ଡିକୁ ଆସିଥିବା ସମସ୍ତ ଧାନ କିଣାଯିବ ବୋଲି ନିର୍ଭର ପ୍ରତିଶ୍ରୁତି ଦେଇଥିଲେ। ପରେ ଚାଷୀ ମହଲରେ ଆଶ୍ବସ୍ତି ପରିଲକ୍ଷିତ ହୋଇଥିବା ବେଳେ ଧାନ କିଣାବିକା ସ୍ବାଭାବିକ ହେବାରେ ଲାଗିଛି।
ଏହି କ୍ରମରେ ଶୁକ୍ରବାର ବରଗଡ଼ ନିୟନ୍ତ୍ରିତ ବଜାର କମିଟି (ଆର୍ଏମ୍ସି) ଅଧୀନ କଲାପାଣି ମଣ୍ଡିରୁ ଧାନ ଉଠାଣ ତଥା ବିକ୍ରି ଆରମ୍ଭ ହୋଇଛି। ବରାହଗୋଡା ଗ୍ରାମର ଚାଷୀ କୃଷ୍ଣ ସାହୁ ନଡ଼ିଆ ଫଟାଇ ଧାନବିକ୍ରିର ଶୁଭାରମ୍ଭ କରିଥିଲେ। ଏହାପରେ ଗତ ୧୬ ତାରିଖରୁ ଉକ୍ତ ମଣ୍ଡିକୁ ସେ ଆଣିଥିବା ୧୬୦ ପକେଟ ଧାନ ବିକ୍ରି ହୋଇଥିଲା। ଧାନ ବିକ୍ରିର ଶୁଭାରମ୍ଭ ସମୟରେ ବିଧାୟକ ଦେବେଶ ଆଚାର୍ଯ୍ୟ, ଆରଏମସି ସମ୍ପାଦକ ଦୁର୍ଗାପ୍ରସାଦ ଛୁରିଆ, ସହକାରୀ ସମବାୟ ନିବନ୍ଧକ ଶରତ ଚନ୍ଦ୍ର ପାଣିଗ୍ରାହୀ ପ୍ରମୁଖ ଉପସ୍ଥିତ ଥିଲେ।
